Números 7 - Quechua Ayacucho Bible 1987

Santuario dedicanankupaq ofrendakunamanta

¹ Diosman asuykuna karpata Moises sayarichiyta tukuruspanmi santuariota llapa servicionkunatawan chaynataq altartapas llapa servicionkunatawan aceitewan tallispa Diospaq sapaqcharqa.

² Hinaptinmi Israel ayllukunapa jefenkuna otaq Moiseswan llapa runakunata yupaqkuna aparqaku ofrendakunata.

³ Tayta Diospa qayllanman chay apasqanku ofrendakunaqa karqa toldoyoqkama soqta carretakunam chaynataq chunka iskayniyoq bueyeskunam. Iskay jefekunam aparqaku huk carretata, sapa jefeñataqmi aparqa huk bueyesta. Chaykunatam ofrecerqaku Diospa *f**yachanan karpapa ñawpaqninpi.

⁴ Hinaptinmi Moisesta Tayta Dios nirqa:

⁵ —Chaskiy paykunamanta carretakunatawan bueyeskunata asuykuwanaykichik karpapa servicionpaq. Tukuy chaykunataqa qonki Leviy ayllu runakunamanmá chaynapi imam ruranankuman hina sapakama servichikunankupaq —nispa.

⁶ Hinaptinmi Moises chaskirqa chay carretakunatawan chay bueyeskunata hinaspam qorqa Leviy ayllu runakunaman.

⁷ Iskay carretakunatawan tawa bueyeskunatam qorqa Gersonpa castankunaman chaynapi imam ruranankuman hina servichikunankupaq.

⁸ Tawa carretatawan pusaq bueyeskunatam qorqa Meraripa castankunaman chaynapi imam ruranankuman hina servichikunankupaq. Paykunaqa chaykunata rurananku karqa sacerdote Aaronpa churin Itamarpa kamachisqanman hinam.

⁹ Coatpa castankunamanmi ichaqa mana qorqachu carretakunatapas nitaq bueyeskunatapas. Paykunaqa Diospaq sapaqchasqa kaqkunatam hombrollapi aparqaku.

¹⁰ Altarta aceitewan tallispa Diospaq dedicaptinkum chay jefekuna aparqaku ofrendankuta hinaspam churarqaku altarpa ñawpaqninman.

¹¹ Hinaptinmi Moisesta Tayta Dios nirqa: —Altarta dedicawaptinkuqa sapa ayllupa jefenmi tocasqanman hina sapa punchawninkama ofrendata qowanqa —nispa.

¹² Punta kaq punchawpim ofrendanta ofrecerqa Juda ayllumanta kaq Aminadabpa churin Naason.

¹³ Payqa qorqa yaqa kilo parten llasaq qollqemanta bandejatam, qorqataqmi parte kilo masnin llasaq qollqemanta medianotapas. Tukuy chaykunapa llasayninqa karqa santuariopi pesoman hinam. Chay bandejapiwan medianopim huntay-huntay karqa aceitewan chapusqa fino harina, chayqa karqa kawsaykunamanta ofrendapaqmi.

¹⁴ Qorqataqmi yaqa tawa onza llasaq qorimanta wisllatapas, chay wisllataqa qorqa huntay-huntay incienso ukuyoqtam.

¹⁵ Qorqataqmi malta torotapas, poqosqa carnerotapas hinaspa watayoq carnerotapas, chaykunataqa qorqa lliwta kañana ofrendapaqmi.

¹⁶ Hucha pampachasqa kananpaqmi qorqataq chivatotapas.

¹⁷ Dioswan allinlla kasqankumantapas qorqataqmi iskay bueyeskunata, poqosqa pichqa chivatokunata chaynataq pichqa carnerokunatapas. Chaynaqa tukuy chaykunamá karqa Aminadabpa churin Naasonpa ofrendankuna.

¹⁸ Iskay kaq punchawpim ofrendanta ofrecerqa Zuarpa churin Natanael. Natanaelqa karqa Isacar ayllupa jefenmi.

^19-23 Paypas ofrendankunatam ofrecerqa Naasonpa qosqanta hinalla.

²⁴ Kimsa kaq punchawpim ofrendanta ofrecerqa Helonpa churin Eliab. Eliabqa karqa Zabulon ayllupa jefenmi.

^25-29 Paypas ofrendankunatam ofrecerqa chay qoq jefekunapa qosqankuta hinalla.

³⁰ Tawa kaq punchawpim ofrendanta ofrecerqa Sedeurpa churin Elisur. Elisurqa karqa Ruben ayllupa jefenmi.

^31-35 Paypas ofrendankunatam ofrecerqa chay qoq jefekunapa qosqankuta hinalla.

³⁶ Pichqa kaq punchawpim ofrendanta ofrecerqa Zurisadaipa churin Selumiel. Selumielqa karqa Simeon ayllupa jefenmi.

^37-41 Paypas ofrendankunatam ofrecerqa chay qoq jefekunapa qosqankuta hinalla.

⁴² Soqta kaq punchawpim ofrendanta ofrecerqa Deuelpa churin Eliasaf. Eliasafqa karqa Gad ayllupa jefenmi.

^43-47 Paypas ofrendankunatam ofrecerqa chay qoq jefekunapa qosqankuta hinalla.

⁴⁸ Qanchis kaq punchawpim ofrendanta ofrecerqa Amiudpa churin Elisama. Elisamaqa karqa Efrain ayllupa jefenmi.

^49-53 Paypas ofrendankunatam ofrecerqa chay qoq jefekunapa qosqankuta hinalla.

⁵⁴ Pusaq kaq punchawpim ofrendanta ofrecerqa Pedasurpa churin Gamaliel. Gamalielqa karqa Manases ayllupa jefenmi.

^55-59 Paypas ofrendankunatam ofrecerqa chay qoq jefekunapa qosqankuta hinalla.

⁶⁰ Isqon kaq punchawpim ofrendanta ofrecerqa Gedeonipa churin Abidan. Abidanqa karqa Benjamin ayllupa jefenmi.

^61-65 Paypas ofrendankunatam ofrecerqa chay qoq jefekunapa qosqankuta hinalla.

⁶⁶ Chunka kaq punchawpim ofrendata ofrecerqa Amisadaipa churin Ahiezer. Ahiezerqa karqa Dan ayllupa jefenmi.

^67-71 Paypas ofrendankunatam ofrecerqa chay qoq jefekunapa qosqankuta hinalla.

⁷² Chunka hukniyoq kaq punchawpim ofrendanta ofrecerqa Ocranpa churin Pagiel. Pagielqa karqa Aser ayllupa jefenmi.

^73-77 Paypas ofrendankunatam ofrecerqa chay qoq jefekunapa qosqankuta hinalla.

⁷⁸ Chunka iskayniyoq punchawpim ofrendanta ofrecerqa Enanpa churin Ahira. Ahiraqa karqa Neftaliy ayllupa jefenmi.

^79-83 Paypas ofrendankunatam ofrecerqa chay qoq jefekunapa qosqankuta hinalla.

⁸⁴ Chaynaqa chay altarta dedicaptinkumá Israel ayllukunamanta jefekuna ofrecerqaku tukuy kay ofrendakunata: qollqemanta chunka iskayniyoq bandejakunata, qollqemanta chunka iskayniyoq medianokunata hinaspa qollqemanta chunka iskayniyoq wisllakunata.

⁸⁵ Sapa bandejapa llasayninqa karqa yaqa kilo partenmi, sapa medianoñataqmi llasarqa parte kilo masninta. Chaynaqa chay bandejakunapa hinaspa medianokunapa llasayninqa karqa iskay chunka soqtayoq kilo tumpa masninmi. Tukuy chaykunapa llasayninqa karqa santuariopi pesoman hinam.

⁸⁶ Chay huntay-huntay incienso ukuyoq qorimanta wisllakunañataqmi sapakama llasarqa yaqa tawa onzatakama. Chaynaqa qorimanta llapallan wisllakunapa llasayninqa karqa yaqa kilo cuartonmi.

⁸⁷ Lliw kañanapaq animal ofrendakunapas karqa kaykunam: chunka iskayniyoq malta torokuna, chunka iskayniyoq poqosqa carnerokuna, chunka iskayniyoqtaqmi karqa watayoq carnerokunapas. Chay animalkunawan kuskatam ofrecerqakutaq kawsaykunamanta ofrendakunatapas. Ofrecerqakutaqmi hucharayku ofrendapaq chunka iskayniyoq chivatokunatapas.

⁸⁸ Dioswan allinlla kasqankumanta ofrendapaq animalkunam karqa iskay chunka tawayoq malta torokuna, soqta chunka poqosqa carnerokuna, soqta chunka chivatokuna hinaspa watayoq soqta chunka carnerokuna. Chaynaqa tukuy chaykunamá karqa aceitewan tallispa altarta dedicanankupaq ofrendakuna.

⁸⁹ Dioswan rimananpaq asuykuna karpaman Moises yaykuruptinmi chunkantin kamachikuykuna waqaychana baulpa tapanmanta otaq querubin sutiyoq angelkunapa chawpinmanta uyarirqa Diospa rimapayamusqanta.