Números 6 - Quechua Ayacucho Bible 1987

Tayta Diospaq sapaqchakusqa runakunaqa imaynam kawsanankumanta

^1-2 Israelpa mirayninkunaman ninanpaqmi Moisesta Tayta Dios nirqa kaynata: —Qaripas warmipas ñoqa Tayta Diosta serviwananpaq rakikuspanqa

³ amam tomanqachu vinota nitaq poqosqa aqatapas nitaq uvasmanta rurasqa vinagretapas nitaq aqamanta rurasqa vinagretapas nitaq uvasmanta rurasqa ima upitapas. Amataqmi mikunqachu uvastapas nitaq uvasmanta pasastapas.

⁴ Chaynaqa ñoqapaq rakisqa kanankamaqa amam mikunqachu uvasmanta ima mikuytapas nitaq uvaspa murunmanta otaq qaranmanta ima rurasqatapas.

⁵ Prometekusqanman hina ñoqapaq rakisqa kanankamaqa amam chukchanta nitaq barbantapas rutuchikunqachu. Ñoqa Tayta Diospaq rakisqa kasqan punchawkamataqmi ñoqallapaqña sapaqchasqa kanqa hinaspam chukchantapas wiñachikunqataq.

⁶ Ñoqa Tayta Diospaq rakisqa kasqan punchawkamataqmi wañuqpa ayanmanqa ama asuykunqachu.

⁷ Tayta-mamanña otaq wawqe-paninña wañuruptinpas amam paykunamanqa asuykunqachu, mana chayqa manam ñoqamanqa asuykuwanmanchu. Payqariki ñoqa Diosninpaq rakisqam kachkan.

⁸ Payqa tukuy tiempo rakisqa kanankamaqa ñoqa Tayta Diospaq sapaqchasqam kachkan.

⁹ —Paypa qayllanpi qonqaymanta pipas wañuruptinqa chay ñoqapaq rakikuq runapa chukchanmi millakuypaqña kanqa. Chaynaqa chukchantam kachiy-kachiyta rutuchikunqa qanchis kaq punchawpi otaq chuyanchakunan punchawpi.

¹⁰ Pusaq kaq punchawpiñataqmi apanqa iskay qoqñuta otaq iskay mallqo palomata asuykuwanaykichik karpapa punkunman.

¹¹ Sacerdotem huknin qoqñuta ofrecewanqa chay runapa huchanmanta, huknintañataqmi kañapuwanqa lliw kañana ofrendata hina. Chaynapim chay wañuqpa ayan hapirusqanmanta chay ñoqapaq rakikuq runapa huchan pampachasqa kanqa. Chay punchawmantam chukchanta sapaqchapuwanqa.

¹² Ñoqapaq rakikusqan punchawkunaqa Ñoqa Tayta Diospaqmi rakikunqa. Huchanmanta ofrecewananpaqmi apamuwanqa watayoq carnerota. Punta kaq punchawkunapi ñoqapaq rakikusqanqa mana valeqmi kanqa. Chaynaqa kanqa ñoqapaq rakisqa kachkaspan millarikuypaq rikurirusqanraykum.

¹³ —Chaynaqa chay ñoqapaq rakikuq runa prometekusqanta tukuruptinqa kay yachachikuyman hinam ruranqa: Payqa asuykuwanaykichik karpapa punkunmanmi pusasqa kanqa.

¹⁴ Chaypim ñoqa Tayta Diosman ofrecemuwanqa lliw kañanapaq watayoq sano carnerota, huchankunamantam ofrecemuwanqataq watayoq sano ovejatapas. Ofrecemuwanqataqmi ñoqawan allinlla kasqanmanta huk ofrenda carnerotapas.

¹⁵ Canastillapim ofrecemuwanqataq fino harinamanta aceitewan masa rurasqa mana qonchuyoq tantakunatapas chaynataq aceitewan untasqa mana qonchuyoq tortillakunatapas, chaykunawan kuskatam ofrecemuwanqataq kawsaykunamanta ofrendatapas chaynataq tallinapaq vino ofrendatapas.

¹⁶ —Tukuy chaykunataqa sacerdotem Ñoqa Tayta Diospa qayllayman apamuspan hucharayku ofrendapaq ofrecewanqa, kañapuwanqataqmi lliw kañapuwanan kaq ofrendatapas chaynataq huknin carnerotapas.

¹⁷ Ofrecewanqaqa chay ofrecewaqniy runa ñoqa Tayta Dioswan allinlla kasqanmantam. Chay carnerotaqa ofrecewanqa canastillapi kaq mana qonchuyoq tantatawanmi. Ofrecewanqataqmi kawsay ofrendatawan tallinapaq vino ofrendatapas.

¹⁸ Chaynaqa chay ñoqapaq rakikuq runaqa asuykuwanaykichik karpapa punkunpim ñoqapaq rakisqa chukchanta kachiy-kachiyta rutuchikunqa hinaspam chay chukchantaqa ninaman wischuykunqa. Wischuykunqaqa ñoqawan allinlla kasqanmanta rupaq ofrendapa ukun ninamanmi.

¹⁹ Sacerdotem chay ñoqapaq rakikuq runaman qonqa carneropa yanusqa brazonta, qonqataqmi canastillapi kaq mana qonchuyoq tantatapas chaynataq mana qonchuyoq tortillatapas. Chaykunataqa qonqa ñoqapaq rakisqan chukchanta ruturachikuptinñam.

²⁰ Chaymantañam sacerdoteqa kuyuchispan ofrendakunata ñoqa Tayta Diosman presentamuwanqa. Animalpa pechon presentamuwasqan aychaqa chaynataq piernanqa ñoqallapaqña sapaqchasqa kasqanraykum sacerdotepaqña kanqa. Chaynata ruraruptinñam chay ñoqapaq rakikuq runaqa vinota tomanman.

²¹ —Chaynaqa kay yachachikuykunaman hinamá ruranqa ñoqa Tayta Diospaq rakikuq runaqa. Atisqanman hinam huk prometekusqankunatapas ruranqataq. Chaytaqa ruranqa ñoqapaq rakikusqan yachachikuyman hinam.

Runakunapaq sacerdotekuna Diospa favorninta imaynam mañakunankumanta

^22-23 Aaronman chaynataq churinkunaman ninanpaqmi Moisesta Tayta Dios nirqa kaynata: —Israelpa mirayninkunata bendecinaypaq mañakuwaspaykichikqa kaynatam ninkichik:

²⁴ “Tayta Diosyá bendecisuspayki waqaychasunki.

²⁵ Tayta Diosyá allin ñawinwan qawarisuspayki llakipayasunki.

²⁶ Tayta Diosyá kuyakuywan qawariykususpayki hawkayaykachisunki.”

²⁷ Chaynatam sacerdotekuna sutiyta rimarinkichik Israelpa mirayninkunapa favorninpi hinaptinmi paykunata bendecisaq.