Números 5 - Quechua Ayacucho Bible 1987

Diosman mana asuykunanpaq hina kaqkunamanta

¹ Tayta Diosmi nirqa Moisesman:

² —Israelpa mirayninkunatayá kamachiy lepra onqoywan llapallan kaqkunata campamentomanta lloqsichinankupaq. Lloqsichinqakutaqmi qari kayninmanta otaq warmi kayninmanta kikillanmanta ima lloqsiptinpas chaynataq wañuqpa ayanta llachparuspa mana asuykuwananpaq hina kaqkunatapas.

³ Chaynaqa qaripas warmipas mana asuykamuwananpaq hina kaqkunataqa campamentomantamá lloqsichinkichik. Chaynapim qamkuna ukupi *f**yachanay campamentoqa mana millakuypaqchu kanqa —nispa.

⁴ Israelpa mirayninkunamá chaynata rurarqaku Moisesman Tayta Diospa kamachisqanpi hina, chaypunillam chayna runakunataqa campamentonmanta hawaman qarqorqaku.

Runamasinkupa contranpi huchallikuptinku imaynam ruranankumanta

^5-6 Israelpa mirayninkunaman ninanpaqmi Moisesta Tayta Dios nirqa kaynata: —Qaripas warmipas ñoqa Tayta Diosta traicionawaspa runamasinpa contranpi ima dañotapas ruraspaqa culpayoqmi kanqa.

⁷ Chay huchanta willakuspanmi runamasinman qopunqa imam chay daño rurasqanta hinaspam chaymanpas yapanqaraq pichqa parteman rakisqapa huknin parteta.

⁸ Ichaqa chay daño rurasqanmanta qopunanpaq manaña pipas reclamaq kaptinqa, chay qopunantaqa ñoqa Tayta Diospaqñam sacerdoteman qonqa. Qowanqakutaqmi hucha pampachanaypaq carnero ofrendatapas, chayta sacerdote ofrecewaptinmi chay daño ruraqtaqa pampachasaq.

⁹ —Tukuy imakunamantapas sapaqchapuwasqanku ofrendayta Israelpa mirayninkuna sacerdoteman qoptinkuqa, chay ofrendakunaqa kanqa sacerdotepaqmi.

¹⁰ Ñoqapaq sapaqchaspa sacerdoteman apasqanku ofrendakunaqa kanqa sacerdotepaqmi.

Warminta qosan celosaptin imaynam ruranankumanta

^11-12 Israelpa mirayninkunaman ninanpaqmi Moisesta Tayta Dios nirqa kaynata: —Sichu huk kaqnin warmi pierdikuruspan qosanta traicionarunman

¹³ otaq qosanpa mana yachasqanta huk kaqnin runawan puñurunman chaynapi mana pipas testigo kaptinqa otaq huchallikuchkaqta mana pipas tariruptinqa.

¹⁴ Qosanmi celosanman chay warminta, celosanmantaqmi mana cheqapta huchallikuchkaptinpas.

¹⁵ Chayna mana yachasqa kaptinqa chay runam warminta pusanqa sacerdoteman. Pusaspanqa sacerdotemanmi apanqa warminrayku iskay kilo cebada kutata ichaqa amam aceitetapas cebada kutamanqa tallinqachu nitaqmi inciensotapas hinanqachu. Chay ofrendaqariki celosmanta kawsay ofrendam hinaspapas mana allin rurasqanmanta yuyarichina ofrendam.

¹⁶ —Sacerdotem chay tumpasqa warmita asuykachimunqa ñoqa Tayta Diospa qayllayman.

¹⁷ Chaymantam allpamanta vasopi kaq ñoqapaq sapaqchasqanku yakuman allpata polvonqa, chay allpaqa hoqarisqa kanqa santuariopa pampanmantam.

¹⁸ Sacerdotem chay warmita ñoqa Tayta Diospa qayllaypi sayaykachispan chukcha watakusqanta paskarunqa hinaspam hapiykachinqa celosrayku hucha yuyarichina kawsaykunamanta ofrendata. Sacerdotepa makinpiñataqmi kanqa ñakay apamuq qatqe yaku.

¹⁹ Sacerdotem juramentachispan ninqa: “Sichu huk runawan mana kakurqankichu hinaspa manataq qosaykitapas traicionarqankichu nitaq piwanpas millakuypaq kaqtaqa rurarqankichu hinaptinqa ñakayta apamuq kay qatqe yakuta tomaptikim mana imapas sucedesunkichu.

²⁰ Ichaqa qosaykita traicionaspa millakuypaq kaqtapas rurarqanki otaq hukwan kakurqanki hinaptinqa

²¹ Tayta Diosyá runamasikikunapa ñakasqanta rurasunki, warmi kaynikipas ismuruptinmi wiksaykipas punkipakurunqa.

²² Ñakay apamuq kay yakuta tomaruptikim castigo qanman wichiykusunki” nispa. Hinaptinmi chay warmiñataq ninqa: “Nisqaykiman hinayá kachun” nispa.

²³ —Chaymantam sacerdoteqa qellqanqa kay ñakaykunata hinaspam qatqe yakuman challpuspa borranqa.

²⁴ Hinaspam chay tumpasqa warmiman tomachinqa ñakay apamuq qatqe yakuta chaynapi ukunpi qatqenanpaq.

²⁵ Chaymantañataqmi sacerdoteqa warmimanta chaskinqa celosrayku kawsay ofrendata. Chay ofrendatam ñoqa Tayta Diospa qayllaypi sacerdote kuyuchispan altarman churanqa.

²⁶ Yuyarichikuq kawsay ofrendatapas sacerdote aptaykuspanmi kañapuwanqa altarpi hinaspam chay warmiman qatqe yakuta tomachinqa.

²⁷ Chaynapim sichu chay warmi qosanta traicionaruptinqa ñakay apamuq kaq yaku warmipa ukunta qatqenqa hinaptinmi warmi kayninpas ismuruptin wiksanpas punkipakurunqa. Hinaptinmi chay warmiqa runamasinkuna qawananpaq ñakasqa kanqa.

²⁸ Ichaqa chay warmi mana millakuypaq kaqta rurasqanrayku inocente kaptinqa kanqam wawankunapas.

²⁹ —Chaynamá chay celosmanta yachachikuyniyqa qosanta warmi traicionaspan millakuypaq kaqta ruraptinqa

³⁰ otaq mana cheqap kachkaptin yanqamanta warminta qosan celosaptinqa, chay warmitam ñoqa Tayta Diospa qayllaypi sayachinqa hinaptinmi sacerdoteñataq tukuy kay yachachikuykunaman hina ruranqa.

³¹ Chay warmipa qosanqa inocentem kanqa imapas rurasqanmantaqa, ichaqa chay warmi mana allinta ruraspanqa kikillanmi huchayoq kanqa.