Números 36 - Quechua Ayacucho Bible 1987

Warmikunapaq herencia allpamanta

¹ Joseypa churinmi karqa Manases, Manasespa churinmi karqa Maquir, Maquirpa churinmi karqa Galaad, chay Galaadpa mirayninkunamanta kamachikuqkunam asuykurqaku Moisesmanwan Israelpa miraynin ayllukunapa kamachiqninkunaman

² hinaspam kaynata nirqaku: —Moises, qamtam Tayta Dios kamachisurqanki Israelpa mirayninkunaman sorteaspa allpata partinaykipaq. Kamachisurqankitaqmi Zelofehad sutiyoq castayku runapa allpantapas warmi churinkunaman partinaykipaq.

³ Ichaqa chay warmikuna Israel wakin ayllukunamanta kaq huk kaqnin qariwan casarakuruptinqa chay tupaqnin herenciaqa aylluykupa herencianmantach menosyarunqa, chaynapich chay herenciaqa chay casaraqnin runapa herencianmanña yapakurunqa hinaptinchá suerteman hina tupawasqanku herenciaykuqa menosyarunqa.

⁴ Israelpa mirayninkunapaq Jubileo sutiyoq wata chayaramuptinqa chay warmikunapa herencia allpanqa yapakurunqa qosankupa herencianmanñach chaynapichiki aylluykumanta kaq herencia allpaykuqa menosyarunqa —nispa.

⁵ Hinaptinmi Tayta Diospa kamachisqanta hina Israelpa mirayninkunata Moises kamachispan nirqa: —Josey ayllumanta kaq runakunaqa allintam rimachkanku.

⁶ Chaynaqa Zelofehad sutiyoq runapa warmi churinkunatam Tayta Dios kaynata nin: “Munasqaykichikman hinayá piwanpas casarakuychik aswanqa casarakunkichikqa taytaykichikpa ayllunmanta kaqkunallawanmi,

⁷ chaynapim Israelpa mirayninkunapa herencianqa mana ayllun-ayllunchu pasanakunqa. Israelpa mirayninkunaqa sapakamam taytankupa ayllunpa herencianwan dueño kanqaku.

⁸ Israelpa miraynin ayllumanta kaq herenciayoq warmiqa, taytanpa ayllumanta kaq runallawanmi casarakunqa chaynapim Israelpa mirayninkunaqa sapakama ayllunkuman tupaq herencianwan dueño kanqaku.

⁹ Chaynapimá chay herenciaqa mana ayllun-ayllunchu pasanakunqa, Israelpa mirayninmanta kaq ayllukunaqa sapakamam herenciankuwan dueño kanqaku” nispa.

¹⁰ Moisesman Tayta Diospa kamachisqanta hinamá Zelofehadpa warmi churinkuna rurarqaku.

¹¹ Paykunam casarakurqaku taytankupa wawqenpa churinkunawan, chay warmikunam karqa: Maala, Tirsa, Hogla, Milca hinaspa Noa.

¹² Chaynapim Joseypa churin Manases ayllumanta kaq warmikunapa herenciankuqa hinalla karqa abuelonkupa herencian ukupi.

¹³ Chay kamachikuykunatawan reglamentokunatam Israelpa mirayninkunaman ninanpaq Moisesman Tayta Dios kamachirqa, chaykunataqa qorqa Moab sutiyoq chunniq pampakunapim otaq Jordan Mayupa hichpan Jerico llaqtapa chimpanpim.