Números 34 - Quechua Ayacucho Bible 1987

Canaan allpapa linderonkunamanta

^1-2 Israelpa mirayninkunaman kamachinanpaqmi Moisesta Tayta Dios kaynata nirqa: —Canaan allpaman yaykuruptikichikmi chay allpaqa herenciaykichikña kanqa.

³ Surlawpa linderonkunam kanqa Zin sutiyoq chunniqmanta qallarispa Edom nacionpa linderonkama, surlawpa linderonkunaqa qallarinqa intipa qespimunan lawpi kaq Kachi Qochamantam

⁴ hinaspam surlawninta muyurimunqa Acrabim sutiyoq qasakama, chaymantañataqmi chutarikunqa Zin sutiyoq chunniqkama. Chaymantañataqmi chutarikunqa surlawpi kaq Cades-barnea llaqtakama, chay sitiomantañataqmi chutarikunqa Hasar-adar llaqtakama, chaymantañataqmi chayanqa Asmon lawkama.

⁵ Chay Asmon lawmantañataqmi muyurimunqa Egipto sutiyoq chaki wayqokama, chaymantañataqmi chutarikunqa Mediterraneo Lamar Qochakama.

⁶ —Intipa seqaykunan lawpi linderoykichikqa kanqa Mediterraneo Lamar Qochapa patankunam.

⁷ —Norte lawpi linderoykichikñataqmi Mediterraneo Lamar Qochamanta qallarispa chutarikunqa norte lawpi kaq Hor Orqokama.

⁸ Hor Orqomantam derecholla chutarikunqa Hamat lawman yaykunakama, chaymantañataqmi chutarikunqa Zedad llaqtakama.

⁹ Chaymantañataqmi Zifron llaqtanta chutarikuspa Hazar-enan llaqtapi tukurunqa. Chaynamá kanqa norte lawpi linderoykichikqa.

¹⁰ —Intipa qespimunan lawpi linderoykichikqa derechollam chutarikunqa Hazar-enan llaqtamanta qallarispa Sefam lawkama.

¹¹ Sefam lawmantañataqmi uraykamunqa Ribla llaqtakama, chay llaqtaqa kachkan Ain lawpa intipa qespimunan lawninpim. Chaymantañataqmi chay linderoqa uray lawman chutarikunqa Cineret sutiyoq qochapa patankama otaq intipa qespimunan lawpi kaq patankama.

¹² Chaymantañataqmi Jordan Mayuntakama uray lawman chutarikunqa Kachi Qochapi tukunankama, chayna muyuriqninpi linderoyoq allpamá qamkunapaqa kanqa.

Canaan allpa partinakunankumanta

¹³ Israelpa mirayninkunatam Moises kamachirqa kaynata: —Sorteaspam kay allpataqa partinakunkichik herenciaykichik kananpaq, Tayta Diosmi kamachikurqa isqonnintin ayllukunamanpas chaynataq Manasespa parten ayllumanpas partinaykichikpaq.

¹⁴ Ruben chaynataq Gad ayllukunaqa, abuelonkupa castankuman hinam chaskirunkuña herenciankuta, chaskirunñataqmi Manasespa parten ayllupas.

¹⁵ Iskay ayllu partenqa chaskirunkuñam herenciankuta Jordan Mayupa kaylawninpi otaq Jerico llaqtapa kaylaw chimpan intipa qespimunan lawpi —nispa.

¹⁶ Tayta Diosmi Moisesta nirqa:

¹⁷ —Allpa partisuqnikichikmi kanqa sacerdote Eleazarwan Nunpa churin Josuey.

¹⁸ Sapa ayllumantam huk kamachikuqta akllankichik herencia allpata partisunaykichikpaq:

¹⁹ —Juda ayllumantam akllankichik Jefonepa churin Calebta.

²⁰ —Simeon ayllumantam akllankichik Semuelpa churin Amiudta.

²¹ —Benjaminpa ayllunmantam akllankichik Quislonpa churin Elidadta.

²² —Dan ayllumantam akllankichik Joglipa churin kamachikuq Buqui sutiyoq runata.

²³ —Joseypa miraynin Manases ayllumantam akllankichik Efodpa churin kamachikuq Hanielta.

²⁴ Efrain ayllumantam akllankichik Siftanpa churin kamachikuq Kemuelta.

²⁵ —Zabulon ayllumantam akllankichik Parnacpa churin kamachikuq Elizafanta.

²⁶ —Isacar ayllumantam akllankichik Azanpa churin kamachikuq Paltielta.

²⁷ —Aser ayllumantam akllankichik Selomipa churin kamachikuq Ahiudta.

²⁸ —Neftaliy ayllumantam akllankichik Amiudpa churin kamachikuq Pedaelta —nispa.

²⁹ Chay kamachikuqkunatamá Tayta Dios kamachirqa herenciankupaq Israelpa mirayninkunaman Canaan allpata partinankupaq.