Números 32 - Quechua Ayacucho Bible 1987

Jordan Mayupa waklawninpi allpa dueñochakuq ayllukunamanta

¹ Rubenpa chaynataq Gadpa mirayninkunam animalsapa kaspanku, Jazer lawpi hinaspa Galaad lawpi allpakunata qawaykurqaku animalkunapaq kusallaña kasqanta.

² Chaynapim Gadpa chaynataq Rubenpa mirayninkunaqa rirqaku Moisesman, sacerdote Eleazarman hinaspa runakunapa jefenkunaman, paykunatam kaynata nirqaku:

³ —Atarot lawpi, Dibon lawpi, Jazer lawpi, Nimra lawpi, Hesbon lawpi, Eleale lawpi, Sebam lawpi, Nebo lawpi hinaspa Beon lawpi

⁴ allpakunatam Tayta Dios qechururqa Israelpa mirayninkunapaq. Chay allpakunaqa animalpaq allin allpakunam, ñoqaykuqariki achkallaña animalniyoqmi kaniku.

⁵ Chaynaqa ama hina kaspaykiyá kay allpakunata qoykuwayku dueñochakunaykupaq chaynapi kay Jordan Mayutaqa amaña chimpanaykupaq —nispa.

⁶ Chaymi Gadpa chaynataq Rubenpa mirayninkunata Moises nirqa: —¿Castaykichikkuna guerraman richkaptinchu qamkunañataq kaypi quedakuykunkichik?

⁷ ¿Imanasqataq Israelpa mirayninkunatapas hukmanyachinkichik Tayta Diospa qosqan allpaman mana rinankupaq?

⁸ Chaynatam taytaykichikkunapas rurarqaku Cades-barnea lawmanta wak chimpa allpata qawamunankupaq kachamuptiypas.

⁹ Escol Wayqokama chayaruspankum allpata qawaykurqaku hinaspam Israelpa mirayninkunata hukmanyachirqaku Tayta Diospa qosqan allpaman mana rinankupaq.

¹⁰ Chayraykum Tayta Dios anchallataña piñakurqa hinaspam juraspan kaynata nirqa:

¹¹ —“Abrahanman, Isaacman hinaspa Jacobman juraspa prometesqay allpamanqa manam yaykunqakuchu Egipto nacionmanta lloqsimuqkunaqa, manamá yaykunqakuchu iskay chunka watayoqmanta hanayman runakunaqa, paykunaqariki manam tukuy sonqonkuwanchu qatiwarqaku.

¹² Yaykuspaqa-yaykunqaku Cenez casta runa Jefonepa churin Calebwan Nunpa churin Josueyllam. Paykunallam ñoqa Tayta Diostaqa tukuy sonqonkuwan qatiwarqaku” nispa.

¹³ Chayraykum Tayta Dios anchallataña piñakurqa Israel casta runakunapa contranpi hinaspam chunniqpi purichirqa tawa chunka wata. Chaynataqa purichirqa paypa qayllanpi mana allin ruraq miraykuna wañuspa tukunankukamam.

¹⁴ Yaw huchasapa runakunapa churinkuna, qamkunaqa taytaykichikkunapa qatiqninñam rikurirunkichik chaynapi Israel casta runakunapa contranpi Tayta Diosta astawan piñachinaykichikpaq.

¹⁵ Tayta Diosmanta astawanraq karunchakuptikichikqa paypas Israelpa mirayninkunata saqerusqanpi hinam chunniqpi saqerusunkichik. Qamkunaraykutaqmi kay llapa runakunatapas Tayta Diosqa chinkarachinqa —nispa.

¹⁶ Rubenpa hinaspa Gadpa mirayninkunam Moisesman asuykuspanku nirqaku: —Kay sitiokunapiyá animalniykupaq perqarusaqku chaynataqyá familiaykupaqpas churiykupaqpas llaqtata hatarirachisaqku.

¹⁷ Hinaspam armasqa risaqku Israelpa mirayninkunapa ñawpaqninta *f**yachananku allpaman chayachinaykukama. Ichaqa familiaykuqa murallasqa llaqtakunapiyá quedachunku kaylawpi yachaq runakunarayku.

¹⁸ Israelpa mirayninkuna sapakama herencianku allpata chaskinankukamam wasiykumanqa mana kutimusaqkuchu.

¹⁹ Manañam chaskisaqkuñachu herenciataqa Jordan Mayupa chimpanpiqa, herenciaykuqariki kachkanñam Jordan Mayupa kaylawnin intipa qespimunan lawpi —nispa.

²⁰ Chaymi Moisesñataq nirqa: —Nisqaykichikpi hina peleanaykichikpaqyá Tayta Diospa ñawpaqninta guerraman armasqa riychik.

²¹ Chaynataqyá paypa qayllanmanta enemigonkunata wischurunankama guerrapi peleanaykichikpaq Tayta Diospa ñawpaqninta llapallaykichik Jordan Mayuta chimpaychik.

²² Tayta Diospa ñawpaqninpi allpakunapas dueñochakusqaña karuptinqa kutikamunkichikñam chaynapim libreña kankichik Tayta Diospaq chaynataq Israel casta runakunapaqpas ruranaykichikmanta. Chaynapim kay allpaqa Tayta Diospa ñawpaqninpi herenciaykichik kanqa.

²³ Nisqaykichikta hina mana ruraspaqa Tayta Diospa contranpim huchallikunkichik, chaynata ruraspaqa cheqaptapunipas castigasqam kankichik.

²⁴ Nisqaykichikpi hinayá familiaykichikpaq llaqtakunata rurapuychik, perqaychiktaqyá animalnikichikkunapaq kanchakunatapas —nispa.

²⁵ Hinaptinmi Gadpa hinaspa Rubenpa mirayninkuna Moisesta nirqaku: —Kamachiwasqaykikuta hinam ñoqaykuqa rurasaqku.

²⁶ Churiykuqa warmiykuqa, tukuy animalniykupiwanmi Galaad law llaqtakunapi quedanqaku.

²⁷ Ñoqaykuqa nisqaykipi hinam llapallayku peleamunaykupaq armasqa risaqku Tayta Diospa ñawpaqninta —nispa.

²⁸ Chaymi Moises rimarqa sacerdote Eleazarwan, Nunpa churin Josueywan hinaspa Israelpa mirayninkunamanta kaq ayllukunapa jefenkunawan, paykunatam nirqa:

²⁹ —Sichum Gadpa chaynataq Rubenpa mirayninkuna llapallanku guerrapaq armasqa qamkunawan Tayta Diospa ñawpaqninta Jordan Mayuta chimpaptinkuqa allpakunata dueñochakuykuspañam paykunamanpas qonkichik chay dueñochakusqanku Galaad law allpata.

³⁰ Guerrapaq armasqa qamkunawan kuska mana riptinkum ichaqa Canaan allpapi qamkunawan kuska allpata chaskinqaku —nispa.

³¹ Hinaptinmi Gadpa chaynataq Rubenpa mirayninkuna nirqaku: —Ñoqaykuqa rurasaqku Tayta Diospa niwasqankuta hinam.

³² Guerrapaq armasqam Tayta Diospa ñawpaqninta Canaan allpaman chimpasaqku. Ichaqa dueñochakunayku herencia allpaqa Jordan Mayupa kaylawninpim kanqa —nispa.

³³ Chaynapimá Gadpa mirayninkunaman, Rubenpa mirayninkunaman chaynataq Joseypa churin Manasespa miraynin parten aylluman Moises qorqa Amor casta runakunapa reynin Sehonpa allpanta chaynataq Basan nacionpa reynin Ogpa allpanpa linderonpi llaqtakunatapas.

³⁴ Gadpa mirayninkunam mosoqmanta hatarichirqaku Dibon llaqtata, Atarot llaqtata, Aroer llaqtata,

³⁵ Atarot-sofan llaqtata, Jazer llaqtata, Jogbeha llaqtata,

³⁶ Bet-nimra llaqtata chaynataq Bet-aran llaqtatapas, chay llaqtakunaqa karqa murallasqakamam. Ovejankupaqpas perqarqakutaqmi kanchakunata.

³⁷ Rubenpa mirayninkunam mosoqmanta hatarichirqaku Hesbon llaqtata, Eleale llaqtata, Quiriataim llaqtata,

³⁸ Nebo llaqtata, Baal-meon llaqtata, chay wakin llaqtakunapa sutintaqa cambiarurqakum. Hatarichirqakutaqmi Sibma sutiyoq llaqtatapas, chay yapamanta hatarichisqanku llaqtakunataqa suticharqaku huk sutiwanñam.

³⁹ Manasespa churin Maquirpa mirayninkunam Galaad lawman rispanku dueñochakuykurqaku hinaspam chaypi *f**yachaq Amor casta runakunatapas qarqorurqaku.

⁴⁰ Chayraykum Manasespa churin Maquirpa mirayninkunaman Moises qoykurqa chay Galaad lawpi allpata chaypi *f**yachanankupaq.

⁴¹ Manasespa miraynin Jairpas Galaad lawpi taksa llaqtachakunatam dueñochakuykurqa hinaspam suticharqa “Havot-jair” nispa.

⁴² Noba sutiyoq runapas rispanmi dueñochakuykurqa Kenat sutiyoq llaqtata chaynataq taksa llaqtachankunatapas hinaspam suticharqa kikinpa sutinwan “Noba” nispa.