Números 31 - Quechua Ayacucho Bible 1987

Madian casta runakunata wañuchisqankumanta

¹ Tayta Diosmi Moisesta nirqa:

² —Israelpa mirayninkunapaqyá Madian casta runakunata vengakuy hinaspañam wañukunki —nispa.

³ Moisesmi runakunata nirqa: —Wakinnikichikyá guerrapaq alistakuspa riychik Madian casta runakunapa contranpi, paykunatayá vengakamuychik Tayta Diospa sutinpi.

⁴ Israelpa llapallan mirayninkunamantam sapa ayllumanta kachankichik waranqa peleaq runakunata —nispa.

⁵ Chaynapimá sapa ayllumanta akllarqaku guerrapi peleaq waranqa runakunata, alistasqan llapallan runakunaqa karqa chunka iskayniyoq waranqam.

⁶ Guerramanmá sapa ayllumanta Moises kacharqa waranqa runakunata. Sacerdote Eleazarpa churin Fineestapas guerramanmi kacharqa, payqa rirqa santuariopa servicionkunatapas chaynataq tocanankupaq cornetillakunatapas aparikuspam.

⁷ Moisesman Tayta Diospa kamachisqanpi hinam Madian casta runakunawan peleaspa wañuchimurqaku llapallan qarikunata.

⁸ Chay runakunatawan kuskatataqmi wañuchimurqaku Madian casta runakunapa pichqantin reyninkutapas, chay reykunam karqa Evi, Requem, Zur, Hur hinaspa Reba. Espadawanmi wañuchirqakutaq Beorpa churin Balaam sutiyoq runatapas.

⁹ Israelpa mirayninkunam Madian casta warmikunatapas hinaspa wawankunatapas presota pusarqaku, qatikurqakutaqmi tukuy animalninkutapas hinaspam apakurqakutaq tukuy imankutapas.

¹⁰ Kañaykurqakutaqmi paykunapa *f**yachasqan llapallan llaqtakunatapas chaynataq llapallan campamentonkutapas.

¹¹ Chaynapimá warmikunatapas hinaspa wawakunatapas animalkunatawan hinaspa tukuy qechumusqankutawan hapikuykurqaku.

¹² Chaykunatam aparqaku Moisesman, sacerdote Eleasarman hinaspa huñunasqa Israelpa mirayninkunaman Moab sutiyoq chunniq pampa campamentopi kachkaptinku. Chay campamentoqa kachkarqa Jordan Mayupa hichpan Jerico llaqtapa chimpanpim.

¹³ Moisesmi sacerdote Eleazarwan hinaspa huñunasqa runakunapa jefenkunawan campamentomanta taripaqnin lloqsirqaku

¹⁴ ichaqa waranqa soldado chaynataq pachak soldado kamachiq guerramanta kutimuq jefekunapaqmi Moises piñakurqa.

¹⁵ Paykunatam nirqa: —Llapa warmikunataqa ¿manachum wañuchimurqankichik?

¹⁶ Chay warmikunaqa Balaampa umachasqan kaspankum Tayta Diospa contranpi Israelpa mirayninkunata hoqarichirqaku chaynapi Baal-peor sutiyoq taytachankutaña servinankupaq. Chayraykum Tayta Diospas runankunata castigarqa peste onqoywan.

¹⁷ Kunanpuniyá wañuchiychik llapallan qari wawakunatapas chaynataq mana doncella kaq warmikunatapas.

¹⁸ Doncella kaq sipaskunallatañam amaqa wañuchinkichikchu.

¹⁹ Runata llapa wañuchiqkunaqa wañusqa runapa ayan hapiqkunapiwanyá campamentomanta hawapi samaychik qanchis punchawpuni. Kimsa kaq punchawpiwan qanchis kaq punchawpim qamkunaqa chuyanchakunkichik, chuyanchakunqakutaqmi chay presochamusqaykichikkunapas.

²⁰ Chuyanchankichiktaqmi llapa pachakunatapas chaynataq qaramanta tukuy ima rurasqa kaqkunatapas chaynataq cabrapa pelonmanta awasqa pachakunatapas hinaspa kullumanta llapa serviciokunatapas —nispa.

²¹ Guerramanta kutimuq soldadokunatam sacerdote Eleazar nirqa: —Moisesman kamachispanmi Tayta Dios kay decretota yachachirqa:

²² “Qoritapas, qollqetapas, broncetapas, fierrotapas, estañotapas, tititapas

²³ chaynataq imapas ninapa mana ruparunan kaqtaqa chuyanchanaykichikpaqmi ninanta pasachinkichik hinaspam chuyanchana yakuwan chuyanchankichik. Tukuy imapas ninapa ruparunan kaqkunatañataqmi yakuwan mayllankichik.

²⁴ Qanchis kaq punchawpi pachaykichikta taqsaspam chuyanchasqaña kankichik, chaymantañam campamentomanpas kutiykunkichik” nispa.

Imakunapas qechumusqanku rakinakusqankumanta

²⁵ Tayta Diosmi Moisesta nirqa:

²⁶ —Qampiwan sacerdote Eleazarmi runakunapa jefenkunapiwan yupankichik pusamusqanku runakunata chaynataq animalkunatapas.

²⁷ Iskayman rakiruspaykichikmi partenta qonkichik guerrapi peleamuqkunam, partentañataqmi qonkichik wakin runakunaman.

²⁸ Ñoqa Tayta Diospaqpas contribuciontam rakipuwanki chay guerrapi peleamuq runakunapa qechumusqankumanta, sapa pichqa pachakmantam rakipuwanki hukninta, rakipuwankimá runakuna, vacakuna, asnokuna chaynataq ovejakuna kaptinpas.

²⁹ Chay ofrendakunataqa ñoqa Tayta Diospaqña kananpaqmi qonkichik sacerdote Eleazarman.

³⁰ Mana guerraman riq Israel casta runakunaman qonaykichikmantam mañanki contribucionta, sapa pichqa chunkamantam mañanki hukninta, mañankimá runakuna, vacakuna, asnokuna, ovejakuna hinaspa ima animalkuna kaptinpas. Chaykunataqa qonki Leviy ayllu runakunamanmi, paykunaqariki *f**yachanay karpamantam cuentallikunku —nispa.

³¹ Moisesman Tayta Diospa nisqanta hinamá Eleazarpiwan Moises rurarqaku.

³² Guerraman rispa tropakunapa qechumusqankum karqa: soqta pachak qanchis chunkan pichqayoq waranqa ovejakuna,

³³ qanchis chunka iskayniyoq waranqa vacakuna,

³⁴ soqta chunka hukniyoq waranqa asnokuna.

³⁵ Doncella sipaskunañataqmi karqa kimsa chunka iskayniyoq waranqa.

³⁶ Chaynaqa ovejakunamanta rakiptinkum guerrapi peleamuq runakunaman tuparqa kimsa pachak kimsa chunkan qanchisniyoq waranqa pichqa pachaknin ovejakuna.

³⁷ Chay animalkunamanta Tayta Diosman tupaq contribucionñataqmi karqa soqta pachak qanchis chunkan pichqayoq ovejakuna.

³⁸ Vacakunañataqmi guerraman riqkunapaq karqa kimsa chunka waranqa. Chay vacakunamantam Tayta Diospaq rakirqaku qanchis chunka iskayniyoq vacakunata.

³⁹ Asnokunamantañataqmi paykunapaq karqa kimsa chunka waranqa pichqa pachaknin. Chay asnokunamantam Tayta Diospaq rakirqaku soqta chunka hukniyoq asnokunata.

⁴⁰ Sipaskunamantañataqmi chay guerraman riqkunapaq karqa chunka soqtayoq waranqa sipaskuna. Paykunamantam Tayta Diospaq rakirqaku kimsa chunka iskayniyoq sipaskunata.

⁴¹ Moisesman Tayta Diospa kamachisqanpi hinam Tayta Diospaq rakisqanku ofrendata qorqa sacerdote Eleazarman.

⁴² Guerrapi peleamuqkunaman aypuruspanña Israelpa mirayninkunaman wakin partenta Moisespa rakisqanmi karqa:

⁴³ Kimsa pachak kimsa chunkan qanchisniyoq waranqa pichqa pachaknin ovejakuna,

⁴⁴ kimsa chunka soqtayoq waranqa vacakuna,

⁴⁵ kimsa chunka waranqa pichqa pachaknin asnokuna,

⁴⁶ chunka soqtayoq waranqa sipaskuna.

⁴⁷ Israelpa mirayninkunaman rakisqankumantamá sapa pichqa chunkamanta Moises chaskirqa hukninta sipaskunamanta kaptin otaq animalkunamanta kaptinpas. Chay rakisqankunatam qorqa Tayta Diospa *f**yachanan karpawan cuentallikuq Leviy ayllukunaman. Chaynataqa rurarqa payman Tayta Diospa kamachisqanpi hinam.

⁴⁸ Guerrapi peleamuq waranqa soldado kamachiqkunam pachak soldado kamachiqkunapiwan Moisesman rispanku

⁴⁹ nirqaku: —Guerraman pusasqayku tropakunata yuparuptiykum chulla runapas mana faltanchu.

⁵⁰ Chayraykum Tayta Diosman qori alhajakunamanta sapakama tarisqaykuman hina ofrendata apamuniku: brazaletekunata, pulserakunata, anillokunata, aretekunata, collarkunata. Kaykunataqa Tayta Diosmanmi apamurqaniku huchaykuta pampachaykunanpaq —nispa.

⁵¹ Chay sumaqllaña rurasqan qorimanta alhajakunatamá Moiseswan sacerdote Eleazar chaskirqaku.

⁵² Waranqa soldado kamachiqkunapa hinaspa pachak soldado kamachiqkunapa Tayta Diosman qorimanta llapa alhajakuna qosqankum karqa pachak pusaq chunkan tawayoq kilo masnin.

⁵³ Guerraman riq soldadokunapa imapas qechumusqankuqa kikinkupaqmi karqa.

⁵⁴ Chaynaqa chay waranqa soldado kamachiqkunapa hinaspa pachak soldado kamachiqkunapa qosqanku qoritamá Moisespiwan sacerdote Eleazar chaskispanku apaykurqaku Diosman asuykuna karpaman, chaynataqa rurarqaku Israelpa mirayninkuna Tayta Diospa qayllanpi mana qonqasqa kanankupaqmi.