Números 30 - Quechua Ayacucho Bible 1987

Diosman prometekuspaqa cumplinamanta

¹ Tayta Diospa kamachisqantam Israel ayllukunapa jefenkunaman Moises kaynata nirqa:

² —Tayta Diosman pipas prometekuspanqa otaq juramentowan kikinmanta imatapas obligakuspanqa, chay rimasqantam cumplinqapuni, tukuy imapas rimasqanman hinamá ruranqa.

³ —Soltera warmi taytanpa wasinpiraq kachkan Tayta Diosman imatapas prometekuspanqa otaq kikinmanta imatapas obligakuspanqa,

⁴ cumplenqapunim imapas obligakusqanta, chaynataqa ruranqa taytanpas uyarichkaspan paywan acuerdo kasqanraykum. Llapallantamá cumplinqa imapas prometekusqantaqa chaynataq kikinmanta llapallan obligakusqantaqa.

⁵ Aswanqa chay soltera warmipa prometekusqanta otaq kikinmanta imatapas obligakusqanta taytan uyariruspan hina chay punchawllapi harkakuruptinqa chay warmiqa manam cumplinanchu, Tayta Diospas pampachaykunqam chay warmipa taytan harkakurusqanrayku.

⁶ —Sichu huk warmi imatapas prometekuruchkaspan otaq imatapas mana ancha piensarispa kikinmanta obligakuruchkaspan casarakurunman

⁷ hinaptinñataq qosanpas chayta yacharuchkaspan mana imatapas niptinqa, chay warmim imam prometekusqanman hina hinaspa kikinmanta obligakusqanman hina cumplinqapuni.

⁸ Ichaqa chay warminpa prometekusqanta otaq mana ancha piensarispa kikinmanta imatapas obligakusqanta yacharusqan punchawpi qosan harkakuruptinqa chay warmiqa manam cumplinanchu, Tayta Diospas pampachaykunqam.

⁹ —Viuda warmipa otaq leyman hina rakinasqa warmipa imapas prometekusqanqa hinaspa kikinmanta obligakusqanqa cumplisqapunim kanqa.

¹⁰ —Sichu casada warmi qosanpa wasinpiraq kachkaspan imatapas prometekuptinqa otaq kikinmanta jurasparaq obligakuptinqa

¹¹ chaynapi qosanpas chayta yacharuchkaspan upallakuykuspa mana harkakuptinqa chay warmim prometekusqantawan kikinmanta obligakusqanta cumplinqapuni.

¹² Ichaqa chay warmipa prometekusqanta otaq kikinmanta obligakusqanta hina chay punchawllapi qosan uyariruspan harkakuruptinqa chay warmiqa manam cumplinanchu tukuy nisqankunataqa. Qosan harkakurusqanraykum Tayta Diospas pampachaykunqa.

¹³ —Mayqan warmipapas tukuy imapas prometekusqantaqa otaq kikinmanta jurasparaq ayunananpaq tukuy imapas obligakusqantaqa qosanmi “allinmi” ninqa otaq “manam” ninqapas.

¹⁴ Paqarinnintin punchawkama qosan upallakuykuspan mana harkakuspanqa chay warmipa tukuy prometekusqankunatawan tukuy obligakusqankunatam cumplinanpaq “allinmi” nichkan, payqa aceptachkan chay warminpa rimarisqan punchawpi uyarichkaspan mana harkakusqanraykum.

¹⁵ Chay warminpa rimarisqankunata uyarichkaspan mana chay punchawllapi harkakuruspanqa kikinñam warminpa huchanwan cuentallikunqa —nispa.

¹⁶ Chay decretokunatam Tayta Dios kamachirqa Moisesman chaynapi chaykunaman hina warminwan qosan rurananpaq chaynataq taytanpas wasinpiraq kaq soltera churinwan imaynam rurananpaq.