Números 3 - Quechua Ayacucho Bible 1987

Leviy ayllu runakunamanta

¹ Sinai Orqopi Moisesman Tayta Dios rimapayasqan tiempopim Aaronpa chaynataq Moisespa churinkuna karqa.

² Aaronpa churinkunapa sutinmi karqa Nadab. Payqa karqa piwi churinmi. Paymanñataqmi qatirqa Abiu, Eleazar hinaspa Itamar.

³ Paykunaqa tawankum aceitewan tallisqa kaspanku sacerdote kanankupaq Diospa nombrasqan karqaku.

⁴ Aswanqa Nadab sutiyoq sacerdoteqa Abiu sutiyoq sacerdotepiwanmi wañururqaku Tayta Diospa qayllanpi. Paykunaqa wañururqaku Sinai sutiyoq chunniqpi Diospa mana kamachisqan ninawan ofrecesqankuraykum. Paykunaqa wañukurqaku mana churiyoqmi. Chaynapim sacerdote Eleazarwan sacerdote Itamarpas imam ruranankuta rurarqaku taytanku Aaronpa qawasqantaña.

⁵ Chaymi Moisesta Tayta Dios nirqa:

⁶ —Leviy ayllu runakunata asuykachiy sacerdote Aaronman chaynapi paypa qayllanpi servinankupaq.

⁷ Paykunaqa ruranqaku Aaronpa kamachisqan rurana kaqkunatam. Ruranqakutaqmi Israel casta runakunapa rantinpipas. Paykunaqa servikunqaku asuykamuwanaykichik karpapim chaypi imakunatapas ruraspanku.

⁸ Paykunaqa asuykamuwanaykichik karpapi kaq serviciokunatapas cuidaspam Israelpa mirayninkunapa imam ruranankuta chay karpapi ruranqaku.

⁹ Chaynaqa Leviy ayllu runakunataqa Aaronmanwan mirayninkunamanmi qonki. Paykunataqa regalota hinamá Israelpa mirayninkunamanta qonki.

¹⁰ Chaynaqa sacerdotekunapa rurananmanta cuentallikunanpaqmi kunanki Aarontawan churinkunata. Mana sacerdote kachkaspa santuarioman asuykuq runaqa wañuchisqam kanqa.

Leviy aylluqa Tayta Diosllapaqña sapaqchasqa kasqankumanta

¹¹ Tayta Diosmi Moisesman nirqataq kaynata:

¹² —Israelpa mirayninkunamantam akllakuykuni Leviy aylluta, paykunataqa akllakuykuni puntallaraq nacemuq wawakunapa rantinpim. Chaynaqa Leviy ayllu runakunaqa ñoqapaqñam.

¹³ Egipto nacionpi piwi churikunata wañurachisqaymantapunim Israel casta runakunapa piwi churinkunaqa ñoqapaña. Chay piwi kaqkunataqa ñoqallapaqñam sapaqchakurqani, sapaqchakurqanitaqmi animalkunapa punta criankunatapas. Chaynaqa tukuy chaykunaqa ñoqapam. Ñoqa Tayta Diosmi chaynata nini.

Leviy casta runakuna yupasqa kasqankumanta

¹⁴ Sinai sutiyoq chunniqpim Moisesta Tayta Dios nirqa:

¹⁵ —Leviypa mirayninkunatayá yupay castankuman hina chaynataq familiankuman hina. Huk killayoqmanta hanaymanyá qari wawakunata yupay —nispa.

¹⁶ Tayta Diospa nisqanman hinamá Moises yuparqa.

¹⁷ Leviypa churinkunam karqa Gerson, Coat hinaspa Merari.

¹⁸ Gersonpa churinkunam familianman hina karqa Libni hinaspa Simei.

¹⁹ Coatpa churinkunam familianman hina karqa Amram, Izhar, Hebron hinaspa Uziel.

²⁰ Meraripa churinkunam familianman hina karqa Mahli hinaspa Musi. Kaykunamá karqa Leviypa familiankuna castankuman hina.

²¹ Libnipa chaynataq Simeipa familiankunapas karqa Gersonpa mirayninkunam.

²² Chaynaqa Gersonpa mirayninmanta kaqkunata huk killayoqmanta hanayman yupaptinkum qarikunalla karqa qanchis waranqa pichqa pachaknin runakuna.

²³ Gersonpa familiankunam samarqaku intipa seqaykunan law Diosman asuykuna karpapa qepanpi.

²⁴ Gersonpa mirayninkunapa capitanninqa karqa Laelpa churin Eliasafmi.

²⁵ Diosman asuykuna karpapim Gersonpa mirayninkunaqa nanachikurqaku santuariomanta, karpapa cortinankunamanta chaynataq karpapa punkunpi telanmantapas.

²⁶ Nanachikurqakutaqmi patiopa cortinankunamantapas chaynataq patiopa punkunpi telakunamantapas. Chaykunaqa kachkan karpapa muyuriqninpim chaynataq altarpa muyuriqninpim. Hina paykunataqmi nanachikurqaku tukuy chaykunapa waskankunamantapas.

²⁷ Amrampa, Izharpa, Hebronpa hinaspa Uzielpa familiankunapas karqaku Coatpa mirayninkunam.

²⁸ Chaynaqa Coatpa mirayninmanta kaqkunata huk killayoqmanta hanayman yupaptinkum qarikunalla karqa pusaq waranqa soqta pachaknin runakuna. Paykunamá Diosman asuykuna carpamanta nanachikurqaku.

²⁹ Coatpa familiankunam samarqaku Diosman asuykuna karpapa surlawninpi.

³⁰ Coatpa mirayninkunapa capitanninqa karqa Uzielpa churin Elizafanmi.

³¹ Paykunam nanachikurqaku baulmanta, mesamanta, candeleromanta, altarkunamanta, santuariopi imapas serviciokunamanta, cuarto rakinaq telamanta chaynataq tukuy ima servichikuna kaqkunamantapas.

³² Levi castamanta jefekunapa kamachiqninmi karqa sacerdote Aaronpa churin Eleazar. Paymi cuentallikurqa santuariopi cuidaqkunamanta.

³³ Mahlipa chaynataq Musipa familiankunaqa karqa Meraripa mirayninkunam.

³⁴ Chaynaqa Meraripa miraynin kaqkunata huk killayoqmanta hanayman yupaptinkum qarikunalla karqa soqta waranqa iskay pachaknin runakuna.

³⁵ Meraripa mirayninkunapa capitanninqa karqa Abihail sutiyoq runapa churin Zurielmi. Paykunamá samarqaku Diosman asuykuna karpapa norte lawninpi.

³⁶ Merari castakunam nanachikurqaku Diospa karpanpa marconkunamanta, qerunkunamanta, pilarninkunamanta, toqoyoq tiyanankunamanta chaynataq tukuy ima servichikuna kaqkunamantapas.

³⁷ Nanachikurqakutaqmi patiopa muyuriqninpi pilarkunamantapas, toqoyoq tiyanankunamantapas, estacankunamantapas chaynataq waskankunamantapas.

³⁸ Intipa qespimunan lawpim santuariopa chimpanpi otaq karpapa ñawpaqninpi samarqaku Moises, Aaron chaynataq Aaronpa churinkunapas. Paykunam Israelpa mirayninkunapa rantinpi karpata nanachikurqaku. Mana sacerdote kachkaspan pipas santuarioman asuykuqqa wañuchisqam kanan karqa.

³⁹ Tayta Diospa nisqanman hinam Moisespiwan Aaron yuparqaku Leviy casta runakunata familiankuman hina. Chaymi huk killayoqmanta hanayman qarikunalla karqaku iskay chunka iskayniyoq waranqa runakuna.

Piwi churikunaqa imaynam reclamasqa kanankumanta.

⁴⁰ Tayta Diosmi nirqa Moisesta: —Israelpa mirayninkunamantam llapa piwi kaq qarikunata yuparunki. Paykunataqa huk killayoqmanta hanaymanmi sutin-sutin listaman churarunki.

⁴¹ Israelpa miraynin llapa piwi churikunapa rantinpim rakipuwanki Leviy aylluta. Israelpa mirayninkunapa animalninkunapa rantinpipas rakipuwankitaqmi Leviy ayllupa animalninkunata. Ñoqa Tayta Diosmi chaynata nini.

⁴² Tayta Diospa kamachisqanta hinamá Moises yuparqa Israelpa mirayninkunapa llapa piwi churinkunata.

⁴³ Llapa piwi churikunata huk killayoqmanta hanayman yuparuptinmi karqa iskay chunka iskayniyoq waranqa iskay pachak qanchis chunkan kimsayoq runakuna.

⁴⁴ Tayta Diosmi nirqa Moisesta:

⁴⁵ —Israelpa miraynin llapa piwi churikunapa rantinpim rakipuwanki Leviy aylluta, animalninkupa rantinpipas rakipuwankitaqmi Leviy ayllupa animalninkunata. Leviy ayllu runakunaqa ñoqapam. Ñoqa Tayta Diosmi chaynata nini.

⁴⁶ Israel casta runakunapa piwi churinkunaqa achkallañam kachkanku, Leviy ayllu runakunam ichaqa aslla. Chay iskay pachak qanchis chunkan kimsayoq puchuq churikunata reclamanankupaqmi Leviy ayllu runakunaqa mana haypankuchu,

⁴⁷ chayraykum chay puchuq sapa piwi churimanta mañanki iskay onza qollqeta santuariopi pesoman hina. Chay santuariopi pesoqa yaqa media onzam.

⁴⁸ Chay puchuq piwi churikunamanta reclamasqanku qollqetaqa qonki Aaronmanwan churinkunamanmi —nispa.

^49-50 Leviy ayllu runakuna aslla kasqankuraykum Israelpa miraynin puchuq piwi churikunata reclamanankupaq Moises chaskirqa chunka soqtayoq kilo tumpa masnin qollqeta, chaskirqaqa santuariopi pesoman hinam.

⁵¹ Chay piwi churikuna reclamasqankupa chanin qollqetaqa Moisesmi qorqa Aaronmanwan churinkunaman. Chaynataqa rurarqa Moisesman Tayta Diospa kamachisqanpi hinam.