Números 28 - Quechua Ayacucho Bible 1987

Sapa punchaw ofrendakuna qonankumanta

^1-2 Israelpa mirayninkunaman kamachinanpaqmi Moisesta Tayta Dios nirqa kaynata: —Tiempollanpim ofrecemuwankichik mikuy ofrendaytapas chaynataq kañapuwanaykichik ofrendaytapas, chaykunataqa ofrecemuwankichik miski asnaq ofrendakunata hinam.

³ Ñoqa Tayta Diosman kañapuwananku ofrendakunamantapas ninkitaqmi kaynata: “Watayoq sano iskay carnerokunatam mana tipiyta sapa punchaw lliwta kañapuwankichik.

⁴ Tempranonpim kañapuwankichik malta carnerota, huknintañataqmi kañapuwankichik inti seqaykuytaña.

⁵ Ofrecewankichiktaqmi kawsaykunamanta ofrendatapas, chaykunaqa kanqa iskay kilo fino harinam hinaspa kutasqa aceitunamanta horqosqa huk litro aceitewan chapusqam.

⁶ Sinai Orqopi kamachisqayta hinam chaykunataqa sapa kutilla kañapuwankichik miski asnaq ofrendaypaq, chayqariki ñoqa Tayta Diospaq kañapuwasqaykichik ofrendam.

⁷ Sapa carnero ofrendawanmi ofrecewankichiktaq tallinapaq huk litro vinotapas, chay vinotaqa tallinkichik santuarioypim ñoqa Tayta Diospaq.

⁸ Kañapuwankichiktaqmi huknin carnerotapas inti seqaykuytaña, chaytaqa rurankichik tempranonpi kañapuwanaykichikta hinallam kawsay ofrendayoqta chaynataq tallinapaq vinoyoqta. Chay ofrendakunaqariki ñoqa Tayta Diospaq kañana miski asnaq ofrendam.”

Samana punchawpi ofrenda qonankumanta

⁹ —Samana punchawpiñataqmi ofrecemuwankichik watayoq sano iskay carnerokunata, aceitewan chapusqatataqmi ofrecemuwankichik tawa kilo fino harinatapas, chay ofrendaqa kanqa tallinapaq vino ofrendayoqmi.

¹⁰ Sapa punchaw chay tallina ofrendayoq lliw kañapuwanaykichik ofrendamantapas, kañapuwankichikmá sapa samana punchawpi lliw kañana ofrendakunata.

Mosoq killapi ofrenda qonankumanta

¹¹ —Sapa killapa qallariyninpipas ñoqa Tayta Diospaqmi kañapuwankichik iskay malta torokunata, poqosqa carnerota chaynataq watayoqkama sano qanchis carnerokunatapas.

¹² Sapa malta toro ofrendapaqmi kanqa aceitewan chapusqa soqta kilo fino harina.

¹³ Watayoq sapa carneropaqnñataqmi kanqa aceitewan chapusqa iskay kilo fino harina. Chay ofrendakunaqariki ñoqa Tayta Diospaq miski asnaq ofrendam.

¹⁴ Tallinapaq kaq iskay litro vinom kanqa huk malta toro ofrendapaq, litro parten tallinapaq vinoñataqmi kanqa huk poqosqa carnero ofrendapaq, huk litro tallinapaq vinoñataqmi kanqa watayoq sapa carnero ofrendapaq. Chay lliw kañana ofrendataqa chaynatamá ofrecewankichik watantinpuni sapa killapa qallariyninpi.

¹⁵ Sapa punchaw tallina ofrendayoq lliw kañapuwanaykichik ofrendakunamantapas ñoqa Tayta Diospaqmi wañuchipuwankichiktaq hucha pampachanapaq kaq huk chivato ofrendatapas.

Pascua Fiestapi ofrendakunamanta

¹⁶ —Punta kaq killapa chunka tawayoq kaq punchawninpim ñoqa Tayta Diospaq Pascua Fiestata rurankichik.

¹⁷ Chunka pichqayoq kaq punchawpiñataqmi hatun fiesta kanqa. Qanchis punchawpunim mikunkichik mana qonchuyoq tantata.

¹⁸ Chay fiestapa punta kaq punchawninpim qayanakuspa ñoqallapaqña huñunakuyta rurankichik. Chay punchawpiqa amam imapipas llamkankichikchu.

¹⁹ Ñoqa Tayta Diosmanmi lliwta kañaspa ofrecewankichik iskay malta torota, huk poqosqa carnerota chaynataq watayoqkama qanchis carnerokunatapas. Chay animalkunaqa kanqa sanokamam.

²⁰ Kawsaykunamanta aceitewan chapusqa fino harina ofrendañataqmi kanqa soqta kilo sapa toro ofrendapaq, tawa kilo harinañataqmi kanqa huk poqosqa carnero ofrendapaq,

²¹ iskay kilo harinañataqmi kanqa watayoqkama sapa carnero ofrendapaq.

²² Huchaykichik pampachasqa kananpaqmi ofrecewankichik huk chivatota.

²³ Sapa tempranonpi lliw kañapuwanaykichik ofrendakunamantapas ofrecewankichikmá chay fiestapi ofrendakunatapas.

²⁴ Hina chaynallatamá rurankichik qanchisnintin punchawpuni mikunapaq ofrendatapas. Chay ofrendakunaqariki ñoqa Tayta Diospaq miski asnaq ofrendam. Sapa punchaw tallinapaq ofrendayoq ofrendakunamantapas chay ofrendakunatamá ofrecewankichik.

²⁵ Chay fiestapa qanchis kaq punchawninpim qayanakuspa ñoqallapaqña huñunakuyta rurankichik. Chay punchawpiqa amam imapipas llamkankichikchu.

Kawsaykunapa punta kaq rurun ofrendamanta

²⁶ —Semanakuna sutiyoq fiestapi ñoqa Tayta Diosman kawsaykunapa punta kaq rurunkunata ofrecewaspaykichikqa qayanakuspam ñoqallapaqña huñunakuyta rurankichik, chay punchawpiqa amam imapipas llamkankichikchu.

²⁷ Ñoqa Tayta Diospaq miski asnaq ofrenda kananpaqmi lliwta kañaspa ofrecewankichik iskay malta torokunata, huk poqosqa carnerota hinaspa watayoqkama qachis carnerokunata.

²⁸ Kawsaykunamanta aceitewan chapusqa fino harina ofrendañataqmi kanqa soqta kilo sapa toro ofrendapaq, tawa kilo harinañataqmi kanqa huk poqosqa carnero ofrendapaq,

²⁹ iskay kilo harinañataqmi kanqa watayoqkama sapa carnero ofrendapaq.

³⁰ Huchaykichik pampachasqa kananpaqmi ofrecewankichik huk chivatota.

³¹ Kawsaykunamanta ofrendayoq sapa punchaw lliw kañana ofrendakunamantapas, chay ofrendakunatamá kañapuwankichik, chay animalkunaqa kanqa sanokamam. Chay fiestapi ofrendakunatamá kañapuwankichik tallinapaq ofrendayoqta.