Números 27 - Quechua Ayacucho Bible 1987

Zelofehadpa warmi churinkuna herencia mañakusqankumanta

¹ Joseypa huknin churinmi karqa Manases, chay Manasespa churinmi karqa Maquir, Maquirpa churinmi karqa Galaad, Galaadpa churinmi karqa Hefer, Heferpa churinñataqmi karqa Zelofehad, paypañataqmi karqa pichqa warmi churinkuna, paykunam karqa Maala, Noa, Hogla, Milca hinaspa Tirsa. Paykunaqa karqa Manases ayllumantam.

² Paykunam pichqantin rirqaku Diosman asuykuna karpapa punkunman chaypi Moiseswan, sacerdote Eleazarwan hinaspa ayllukunapa kamachiqninkunawan rimanankupaq. Paykunatam nirqaku:

³ —Taytayku Zelofehadmi chunniqpi wañururqa. Ichaqa payqa wañukurqa manam Tayta Diospa contranpi hoqarikuq Coreypa umachasqankunawan kuskachu. Kikinpa huchanmantam payqa wañukurqa mana qari churiyoq.

⁴ Chaynaqa ¿imaynanpitaq taytaykupa sutinqa chinkachisqa kanman castamasinkunamantaqa? ¿Mana qari churiyoq kasqanraykuchu sutin chinkachisqa kanman? Qoykuwaykuyá allpata taytaykupa wawqenkunaman qosqaykichik allpatawan kuskata —nispa.

⁵ Hinaptinmi Moises chay warmikunapa asuntonta Tayta Diosman willarqa.

⁶ Chaymi Tayta Diosñataq nirqa:

⁷ —Allintam nichkanku Zelofehadpa warmi churinkunaqa, tionkuman herencia allpa qosqaykichikta hinam wañukuq taytankumanpas tupaqnin allpata qonkichik chaynapi chay herencia allpaqa chay warmi churinkunapaqña kananpaq.

⁸ Israelpa mirayninkunamanpas ninkitaqmi kaynata: “Qamkuna ukupi pipas wañukunqa mana qari churiyoq hinaptinqa warmi churinkunamanñam qonkichik chay herencia allpataqa.

⁹ Sichum warmi churinpas manaña kaptinqa chay herencia allpataqa qonkichik wañukuqpa wawqenkunamanñam.

¹⁰ Chay wañukuqpa wawqenkunapas manaña kaptinqa chay herencia allpatam qonkichik chay wañukuqpa taytanpa wawqenkunamanña.

¹¹ Sichu chay wañukuqpa taytanpa wawqenkuna manaña kaptinqa chay herencia allpatam dueñochakunanpaq qonkichik chay wañukuqpa hichpa ayllunmanña” nispa. Kay decretoqa kanqa Israelpa mirayninkunaman reglamento qonaykipaqmi imaynam qanman kamachisqaypi hina.

Moisespa rantinpi Josueyña nombrasqa kasqanmanta

¹² Tayta Diosmi Moisesman kaynata nirqa: —Riyá Abarim sutiyoq orqoman, chay orqomantam qawarinki Israelpa mirayninkunaman qosqay allpata.

¹³ Chay allpata qawaykuspaykiñam wañukunki chaynapim wawqeki Aaronpa hinaspa abueloykikunapa kasqanman rinki.

¹⁴ Kayllapiqa wañukunki Zin sutiyoq chunniqpi mana kasuwasqaykichikraykum, chaynataqa rurarqankichik huñunasqa runakuna atipanakuptinkum, paykunapa qayllanpimá yakuta mañakuptinku chuya kasqayta mana qawachirqankichikchu. Chaymi lloqsiq yakuta suticharqaku Meriba nispa, chayqa tarikun Zin sutiyoq chunniq Cades lawpim.

¹⁵ Chaymi Tayta Diosta Moises nirqa:

¹⁶ —Llapallan runakuna kawsachiq Dios Taytalláy, qamyá nombray huk kaqnin runata huñunasqa runakunata kamachinanpaq

¹⁷ chaynapi guerra kaptinpas paykunata pusananpaq, qam Tayta Diospa huñunasqa runaykikuna mana michiqniyoq ovejakuna hina mana kananpaqmi payña pusanqa —nispa.

¹⁸ Hinaptinmi Tayta Diosñataq nirqa: —Espiritupa huntasqan Nunpa churin Josueytam akllanki hinaspam paypa umanman makikita churanki.

¹⁹ Paytaqa sayachinki sacerdote Eleazarpa hinaspa huñunasqa llapallan runakunapa qayllanpim. Paykuna qawachkaptinkumá imam ruranankunata kunanki.

²⁰ Atiynikitamá paymanña qonki Israelpa llapallan mirayninkuna paytaña kasukunankupaq.

²¹ Sacerdote Eleazarpa ñawpaqninpi Josuey sayaykuptinmi paypaq Eleazar tapuwaspa asuntokuna arreglana Urim sutiyoq rumita qawanqa. Josueymi kamachinqa Israelpa llapallan mirayninkunata tukuy imatapas ruranankupaq —nispa.

²² Tayta Diospa kamachisqanta hina Moises ruraspanmá Josueyta sayachirqa sacerdote Eleazarpa hinaspa huñunasqa llapallan runakunapa ñawpaqninpi.

²³ Paypa umanman Moises makinkunata churaspanmi imam ruranankunata kunarqa imaynam Tayta Diospa kamachisqanpi hina.