Números 26 - Quechua Ayacucho Bible 1987

Israel casta runakunaqa mosoqmanta yupasqa kasqankumanta

¹ Chay peste onqoy taniruptinmi Moisestawan sacerdote Aaronpa churin Eleazarta Tayta Dios nirqa:

² —Israelpa llapa mirayninkunamantam ayllunkuman hina iskay chunka watayoqmanta hanayman guerrapi peleay atiqkunata yupankichik —nispa.

³ Chaymi Jordan Mayupa hichpan Moab sutiyoq pampapi otaq Jerico llaqtapa chimpanpi Moisespiwan sacerdote Eleazar runakunata kamachirqa.

⁴ Kamachirqaqa iskay chunka watayoqmanta hanayman imaynam Tayta Diospa kamachisqanpi hina yupanankupaqmi. Egipto nacionmanta lloqsimuq Israelpa mirayninkunam karqa kaykuna:

⁵ Israelpa piwi churin Ruben ayllumanta kaq runakunam lloqsirqa churin Enocpa mirayninkuna, churin Falupa mirayninkuna,

⁶ Hezronpa mirayninkuna hinaspa Carmipa mirayninkuna.

⁷ Chaynapimá Ruben ayllumanta yupasqakunaqa karqa tawa chunka kimsayoq waranqa qanchis pachak kimsa chunkan runakuna.

⁸ Falupa churinmi karqa Eliab,

⁹ Eliabpa churinkunañataqmi karqa Nemuel, Datan hinaspa Abiram.

¹⁰ Datanwan Abiramqa runakunapa cabecillanmi karqa. Kay iskayninkumá Coreypa umachasqankunawan huñunakuruspanku Moisespa hinaspa Aaronpa contranpi hatarirqaku. Chaynataqa rurarqaku Tayta Diospa contranpi hatarispankum chaymi allpa kicharikuykuspan millpururqa Datantawan Abiramta chaynataq Coreytapas. Chaypitaqmi iskay pachak pichqa chunkan runakunapas ninapa rupasqan wañururqaku. Chaynaqa pasakurqa manaña masta ruranankupaqmi.

¹¹ Chaywanpas Coreypa churinkunaqa manam wañurqakuchu.

¹² Simeon ayllumanta kaq runakunam lloqsirqa Nemuelpa miraynin, Jaminpa miraynin, Jaquinpa miraynin,

¹³ Zerapa miraynin hinaspa Saulpa miraynin.

¹⁴ Chaynaqa Simeonpa ayllumanta kaqkunaqa karqa iskay chunka iskayniyoq waranqa iskay pachaknin runakunam.

¹⁵ Gad ayllumanta kaq runakunam lloqsirqa Zefonpa mirayninkuna, Haguipa mirayninkuna, Sunipa mirayninkuna,

¹⁶ Oznipa mirayninkuna, Eripa mirayninkuna,

¹⁷ Arodpa mirayninkuna hinaspa Arelipa mirayninkuna.

¹⁸ Chaynapimá Gad ayllumanta yupasqakunaqa karqa tawa chunka waranqa pichqa pachaknin runakuna.

¹⁹ Juda sutiyoq runapa churinkunam karqa Er hinaspa Onan, ichaqa paykunaqa Canaan allpapi kachkaspallaraqmi wañukurqaku.

²⁰ Chaynaqa Juda ayllumanta lloqsiq runakunaqa karqa kaykunam: Selapa mirayninkuna, Farespa mirayninkuna hinaspa Zerapa mirayninkuna.

²¹ Farespa churinkunañataqmi karqa Hezron hinaspa Hamul.

²² Chaynapimá Juda ayllumanta yupasqakunaqa karqa qanchis chunka soqtayoq waranqa pichqa pachaknin runakuna.

²³ Isacar ayllumanta kaq runakunam lloqsirqa Tolapa mirayninkuna, Fuapa mirayninkuna,

²⁴ Jasubpa mirayninkuna hinaspa Simronpa mirayninkuna.

²⁵ Chaynapimá Isacar ayllumanta yupasqakunaqa karqa soqta chunka tawayoq waranqa kimsa pachaknin runakuna.

²⁶ Zabulon ayllumanta kaq runakunam lloqsirqa Seredpa mirayninkuna, Elonpa mirayninkuna hinaspa Jahleelpa mirayninkuna.

²⁷ Chaynapimá Zabulon ayllumanta yupasqakunaqa karqa soqta chunka waranqa pichqa pachaknin runakuna.

²⁸ Joseypa churinkunamantam karqa Manases ayllu hinaspa Efrain ayllu.

²⁹ Manases ayllumanta kaq runakunam lloqsirqa Maquirpa mirayninkuna, Maquirpa churin Galaadpa mirayninkuna,

³⁰ Galaadpa mirayninkunamantam lloqsirqa Jezerpa mirayninkuna, Helecpa mirayninkuna,

³¹ Asrielpa mirayninkuna, Siquempa mirayninkuna,

³² Semidapa mirayninkuna hinaspa Heferpa mirayninkuna.

³³ Heferpa churin Zelofehad sutiyoq runapaqa manam qari churinkuna karqachu, kaspaqa-karqa warmi churinkunallam. Chay warmi churinkunam karqa Maala, Noa, Hogla, Milca hinaspa Tirsa.

³⁴ Chaynapimá Manases ayllumanta yupasqakunaqa karqa pichqa chunka iskayniyoq waranqa qanchis pachaknin runakuna.

³⁵ Efrain ayllumanta kaq runakunam lloqsirqa Sutelapa mirayninkuna, Bequerpa mirayninkuna hinaspa Tahanpa mirayninkuna.

³⁶ Sutelapa mirayninkunaqa karqa Eranpa mirayninkunam.

³⁷ Chaynapimá Efrain ayllumanta yupasqakunaqa karqa kimsa chunka iskayniyoq waranqa pichqa pachaknin runakuna. Chaynamá karqaku Josey ayllumanta kaq casta runakunaqa.

³⁸ Benjamin ayllumanta kaq runakunam lloqsirqa Belapa mirayninkuna, Asbelpa mirayninkuna, Ahirampa mirayninkuna,

³⁹ Sufampa mirayninkuna hinaspa Hufampa mirayninkuna.

⁴⁰ Bela castamanta kaq runakunam karqa Ardpa mirayninkuna hinaspa Naamanpa mirayninkuna.

⁴¹ Chaynapimá Benjamin ayllumanta yupasqakunaqa karqa tawa chunka pichqayoq waranqa soqta pachaknin runakuna.

⁴² Dan ayllumanta kaq runakunam lloqsirqa Suhampa mirayninkuna. Paykunamá karqa Danpa mirayninkuna.

⁴³ Chaynapimá Suham castamanta yupasqakunaqa karqa soqta chunka tawayoq waranqa tawa pachaknin runakuna.

⁴⁴ Aser ayllumantañataqmi lloqsirqa Imnapa mirayninkuna, Isuipa mirayninkuna hinaspa Beriapa mirayninkuna.

⁴⁵ Beria castamanta kaq runakunam lloqsirqa Heberpa mirayninkuna, Malquielpa mirayninkuna.

⁴⁶ Aser sutiyoq runapaqa karqataqmi warmi churinpas Sera sutiyoq.

⁴⁷ Chaynapimá Aser ayllu yupasqakunaqa karqa pichqa chunka kimsayoq waranqa tawa pachaknin runakuna.

⁴⁸ Neftaliy ayllumanta kaq runakunam lloqsirqa Jahzeelpa mirayninkuna, Gunipa mirayninkuna,

⁴⁹ Jezerpa mirayninkuna hinaspa Silempa mirayninkuna.

⁵⁰ Chaynapimá Neftaliy ayllumanta yupasqakunaqa karqa tawa chunka pichqayoq waranqa tawa pachaknin runakuna.

⁵¹ Chaynaqa Israelpa mirayninkunata yuparuptinkum karqa soqta pachak hukniyoq waranqa qanchis pachak kimsa chunkan runakuna.

Diospa prometesqan allpaqa imaynam partisqa kananmanta

⁵² Tayta Diosmi Moisesta nirqa:

⁵³ —Chay yupasqa kasqankuman hinamá partinki herencia allpataqa.

⁵⁴ Achka ayllu kaqkunamanmi qonki hatunnin herenciata, pisi kaqkunamanñataqmi qonki taksan kaqta. Chaynaqa sapa ayllukunamanmá herencia allpataqa qonki yupasqa kasqankuman hina.

⁵⁵ Allpataqa partinki sorteaspam, sapakamam abuelonkupa ayllunman hina herenciataqa chaskinqaku.

⁵⁶ Chaynaqa suerteaspam achkapas otaq asllapas kasqankuman hina herenciankutaqa partinki.

Leviy ayllu runakuna yupasqa kasqankumanta

⁵⁷ Leviy ayllumanta yupasqa kaqkunam karqaku Gersonpa mirayninkuna, Coatpa mirayninkuna hinaspa Meraripa mirayninkuna.

⁵⁸ Leviy ayllumanta kaqmi karqa Libnipa mirayninkunapas, Hebronpa mirayninkunapas, Mahlipa mirayninkunapas, Musipa mirayninkunapas hinaspa Coreypa mirayninkunapas. Coatpa mirayninmi karqa Amram.

⁵⁹ Egipto nacionpiraq Leviypa mirayninkuna kachkaptinmi nacerqa Jocabed sutiyoq warmi, chay warmiwanmi casarakurqa Amram. Paykunapa wawa-churinmi karqa Aaron, Moises hinaspa paninku Mariapas.

⁶⁰ Aaronpa churinkunam karqa Nadab, Abiu, Eleazar hinaspa Itamar.

⁶¹ Ichaqa Nadabwan Abiumi wañururqaku Tayta Diospaq mana kamachisqan inciensota qontichisqankurayku.

⁶² Huk killayoqmanta hanayman Leviy ayllu runakunata yupasqankum karqa iskay chunka kimsayoq waranqa qarikuna. Wakin Israel ayllukunawanqa manam yupasqachu karqa Leviy ayllukunaqa. Chaynaqa karqaku Israel wakin ayllukunawan herencia allpata mana chaskisqankuraykum.

⁶³ Israelpa mirayninkunatamá Moisespiwan Sacerdote Eleazar yuparqa Jordan Mayupa hichpan Jerico llaqtapa chimpanpi otaq Moab sutiyoq pampakunapi.

⁶⁴ Kay yupasqankupiqa manañam karqañachu Moiseswan sacerdote Aaronpa Sinai sutiyoq chunniqpi yupasqan runakunaqa.

⁶⁵ Chay wañuruq runakunamantaqa Tayta Diosmi nirqaña kaynata: —Paykunaqa chunniqpim wañunqakupuni hinaptinmi huk qaripas mana puchunqachu, puchuspaqa-puchunqa Jefonepa churin Calebwan Nunpa churin Josueyllam.