Números 25 - Quechua Ayacucho Bible 1987

Baal Peor sutiyoq taytachata adorasqankumanta

¹ Israelpa mirayninkuna Sitim lawpi samaruptinkum paykunamanta kaq qarikuna Moab nacionniyoq warmikunawan huchallikuyta qallaykurqaku.

² Chay warmikunam taytacha-mamachaman imapas ofrecesqankuta chay runakunaman convidarqa hinaptinmi mikuspanku Moab casta runakunapa taytachankuta adorarqaku.

³ Chaynapimá Israel casta runakunaqa qatirqaku Baal-peor sutiyoq taytachataña adoranankupaq, chayraykum Tayta Diosqa paykunapa contranpi anchallataña piñakururqa.

⁴ Hinaspam Moisesta nirqa: —Chay huchallikuq runakunapa llapallan kamachiqninkunata huñuruspayá ñoqa Tayta Diospa qayllaypi warkurachiy, paykunataqa llapa runapa qawasqantam warkurachinki, chaynapiñam Israel casta runakunapa contranpi ancha piñakuyniyqa taninqa —nispa.

⁵ Chaymi Israel casta runakunapa kamachiqninkunata Moises nirqa: —Baal-peor sutiyoq taytachaman aysaypaq-aysachikuq castaykichiktam sapakama wañuchinkichik —nispa.

⁶ Diosman asuykuna karpapa punkunpi Moiseswan Israel casta runakuna waqachkaptinkum, llapallankupa qawasqanta huk kaqnin Israel casta runa kikinpa karpanman pusaykurqa Madian casta warmita.

⁷ Chayta rikuspanmi Aaronpa willkan otaq Eleazarpa churin sacerdote Finees chay huñunakusqankumanta lloqsispan lanzata aparikurqa.

⁸ Hinaspam chay warmi pusaykuq runapa karpanman yaykuruspan iskayninkuta wiksanpatakama lanzawan pasarachirqa. Chayñam Israel casta runakunata wañuchiq peste onqoyqa tanirurqa.

⁹ Chaywanpas ñam wañururqakuña iskay chunka tawayoq waranqa runakuna.

¹⁰ Chaymi Moisesta Tayta Dios nirqa:

¹¹ —Aaronpa willkan otaq Eleazarpa churin sacerdote Fineesmi Israel casta runakunapa contranpi piñakuyniyta tanirachin, payqa ñoqamanta sientisqanraykum piñakuyninpi chay runata wañurachirqa. Chayraykum Israel casta runakunapa contranpi llumpayllataña piñakuchkaspaypas paykunataqa manaña tukururqanichu.

¹² Chaynaqa niyá paywan hawkayay contratota rurasqaymanta.

¹³ Ñoqamanta sientisqanraykum paywanpas chaynataq mirayninkunawanpas contratota rurachkani chaynapi sacerdoteykunaña wiñaypaq kanankupaq. Chaynataqariki rurachkani Israel casta runakunapa huchankunatapas pampachaykachisqanraykum —nispa.

¹⁴ Madian casta warmiwan kuska wañuruq runaqa karqa Salupa churin Zimrim, chay Zimri sutiyoq runaqa karqa Simeon ayllupa jefenmi.

¹⁵ Chay Madian casta warmiñataqmi karqa Zurpa churin Cozbi. Chay Zur sutiyoq runaqa karqa Madian casta runakunapa huk kaqnin kamachiqninmi.

¹⁶ Tayta Diosmi Moisesta nirqa:

¹⁷ Madian casta runakunawan peleaspayá venceruychik.

¹⁸ Paykunaqa engañasurqankichikmi Baal-peor sutiyoq taytachankuwan, engañasurqankichiktaqmi chay Madian casta kamachikuqpa warmi churin Cozbiwanpas. Chay warmiqariki karqa paykunapa ayllunmi. Baal-peor sutiyoq taytachata castiganaypaqmi peste onqoyta kachaykamurqani chaymi chay Cozbi sutiyoq warmipas lanzawan wañuchisqa karqa.