Números 24 - Quechua Ayacucho Bible 1987

¹ Israel casta runakunata Tayta Dios bendeciy munasqanta Balaam yacharuspanmi manaña rirqañachu wakin kutikunapi hinaqa Diospa imam nimunanta uyariq, payqa chunneq lawmanñam qawarirqa.

² Israel casta runakunata ayllupuralla samasqankuta qawachkaptinmi Diospa Espiritun Balaamta huntaykurqa.

³ Chaymi Balaam kaynata rimarirqa: Beorpa churin ñoqa Balaanmi, imakunapas allinta qawaq ñoqa Balaanmi,

⁴ Diospa rimasqankuna uyariq ñoqa Balaanmi, Tukuy Atiyniyoq Diospa qawachisqan qawaq ñoqa Balaanmi, mosqoypi hina kaspay revelacionkuna qawaq ñoqa Balaanmi kaynata nini:

⁵ Jacobpa miraynin runakuna, ¡mayna kuyayllapaqmi karpaykikunaqa! Israelpa mirayninkuna, ¡mayna kuyayllapaqmi *f**yachanaykikunaqa!

⁶ Qamkunaqa rikchakunkichik seqella plantasqa palmera sachakunamanmi chaynataq mayu patanpi huertakunamanmi. Qamkunaqa rikchakunkichik Tayta Diospa plantasqan aloes plantakunamanmi chaynataq yaku patanpi cedro sachakunamanmi.

⁷ Israel casta runakunaqa manam yakumantapas muchunqakuchu. Tukuy ima tarpukusqankupaqpas manam yakuqa pisinqachu. Reyninkuqa Rey Agagmantapas aswan hatunraqmi kanqa. Payqa hatun munaychakuqmi kanqa.

⁸ Paykunataqa Diosmi Egipto nacionmanta horqomurqa. Monte toro hina kallpasapallañam payqa. Israel casta runakunaqa enemigon nacionkunatapas pasaypaqtam tukurunqa. Israel casta runakunaqa enemigonkunapa tulluntapas ñutuypaqmi-ñutuparunqa. Paykunaqa enemigonkutam flechankuwan tuksiypaq-tuksiparunqa.

⁹ Paykunaqa leon hinaraqmi kurkuykunpas. Paykunaqa china leon hinaraqmi waqtapanpas. ¿Pitaqsi atinman rikchachiytaqa? ¡Diospa bendecisqanyá kachun bendecesuqnikichik runaqa! ¡Diospa ñakasqanyá kachun ñakasuqnikichik runaqa!

Hamuq punchawkunapaq Balaam imam rimarisqanmanta

¹⁰ Balaampa nisqanta uyarispanmi Rey Balac anchallataña rabiarurqa hinaspam rabiamanta makintapas taqllakuspanraq Balaamta nirqa: —Enemigoykunata ñakanaykipaqmi qayachimurqayki, aswanqa kimsakamañam paykunapaq bendicionta mañakurunki.

¹¹ Chaynaqa wasikimanyá kutikuy. Ñoqaqa allin reqsisqatam ruraykiman karqa aswanqa Tayta Diosmi harkakurun —nispa.

¹² Chaymi Balaamñataq nirqa: —Ñoqapas nimurqaniñam kachamuwasqayki runakunata:

¹³ “*f**Yachasqayki palaciopi huntataña qori-qollqeta qowaptikipas, Tayta Diospa kamachiwasqanpa contranpiqa manam imatapas ruraymanchu. Allin kaqtapas otaq mana allin kaqtapas kikillaymantaqa manam ruraymanchu, Tayta Diospa niwasqallantam rimasaq” nispa.

¹⁴ Arí kunanqa llaqtaymanmi kutikusaqña aswanqa willaykusqaykiyá hamuq tiempokunapi runaykikunata wak runakuna imam ruranankumanta —nispa.

¹⁵ Balaanmi kaynata rimarirqa: Beorpa churin ñoqa Balaanmi, imakunapas allinta qawaq ñoqa Balaanmi,

¹⁶ Diospa rimasqankunata uyariq ñoqa Balaanmi, Alto-altopi kaq Diospa tanteasqankuna yachaq ñoqa Balaanmi, Tukuy Atiyniyoq Diospa qawachisqan qawaq ñoqa Balaanmi, mosqoypi hina kaspay revelacionkuna qawaq ñoqa Balaanmi kaynata nini:

¹⁷ Rikuchkaniñam aswanqa manam kunankuna kaqtachu, qawachkaniñam aswanqa manam hichpallapi kaqtachu. Lucerom Jacobpa mirayninmanta lloqsimunqa. Munayniyoq reymi Israelpa castamanta hatarimunqa. Moabpa castan runakunapa umantam taqñunqa. Setpa llapallan mirayninkunatam ñutuparunqa.

¹⁸ Edompa allpantam dueñochakunqa. Seir Orqopi kaq enemigonkunatam vencenqa. Israelpa castankunaqa atiywanmi ruranqa.

¹⁹ Jacobpa mirayninmantam munaychakuq lloqsinqa. Payqa llaqtapi puchuqkunatam chinkachinqa.

²⁰ Amalec casta runakunapa allpan lawman Balaam qawarispanmi kaynata rimarirqa: Amalec nacionqa wakin nacionkunamantapas ancha reqsisqallañam. Chaywanpas wiñaypaq tuñichisqa kaspam purmarunqaña.

^21-22 Balaamqa Cain casta runakunatapas qawarispanmi kaynata rimarirqa: Cainpa mirayninkuna, amparakunayki sitiokuna mayna seguroña kaptinpas, qesachakuq hina qaqa rumikunapi yachaptikipas, chay qesaykiqa kañasqam kanqa. Asiria lawmanta hamuqkuna presocharusuptikichikmi chaynaqa kankichik.

²³ Balaamqa rimarirqataqmi: Ay ¿piraq kawsanqa tukuy kaykunata Dios ruraptinqa?

²⁴ Chipre islamantam buquekuna hamunqa. Hinaspam Asiria nacionpi munaychakunqa. Heberpa mirayninkunapim munaychakunqa. Ichaqa chay munaychakuqkunapas wiñaypaqmi puchukarunqa.

²⁵ Chaymantam llaqtanman Balaam kutikurqa, Rey Balacpas ñannintam pasakurqa.