Números 23 - Quechua Ayacucho Bible 1987

¹ Chaymi Balaam nirqa Rey Balacta: —Kaypi hatarichipuway qanchis altarkunata hinaspayá nakamuy qanchis torokunatawan qanchis carnerokunata —nispa.

² Rey Balacmi rurarqa Balaampa nisqanta hina. Chaymi Rey Balacpiwan Balaam animalkunata wañuchispanku kañarqaku sapa altarpi huk torota chaynataq huk carnerota.

³ Chaymantam Rey Balacta Balaam nirqa: —Lliw kañanayki animalpa ladonpi sayaykuchkay. Ñoqañataqyá rirusaq, ichapas Tayta Dioswan tuparamuyman. Imapas nimuwasqantam willasqayki —nispa. Chaynata niruspanmi Balaamqa pasarqa qala orqo lawman,

Israel casta runakunapa favorninpi Balaam rimarisqanmanta

⁴ chaypim Dios rikuriykurqa hinaptinmi Balaamñataq nirqa: —Qanchis altarkunata perqarachispaymi sapa altarpi huk torotawan huk carnerota ofrecemurqayki —nispa.

⁵ Rimananpaq Balaamta yachaykachispanmi Tayta Dios nirqa: —Rey Balacman kutispaykim nisqayta hinalla nimunki —nispa.

⁶ Balaam kutiruptinmi Rey Balacqa Moab nacionpi llapallan kamachikuqkunapiwan kañasqanku animalpa ladonpi sayachkasqa.

⁷ Hinaptinmi Balaam kaynata rimarirqa: Aram nacionmantaraqmi Rey Balac pusachimuwarqa. Intipa qespimunan law orqomantaraqmi Moab nacionpa reynin pusachimuwarqa. Paymi kunamuwarqa: “Hamuspayki Jacobpa mirayninkunata ñakaykapuway” nispa. “Hamuspayki Israelpa mirayninkunata ñakaykapuway” nispa.

⁸ Ichaqa Diospa mana ñakasqankunataqa ¿imanispaytaqsi ñoqaqa ñakayman? Paykunapaq mana allinta mana munachkaptinqa ¿imaynataq mana allintaqa rimariyman?

⁹ Kay alto orqokunamantam paykunata qawariykuni. Kay moqokunamantam paykunata rikuykuni. Paykunaqa sapaqchakuspa *f**yachakuq runakunam. Wakin nacionkunamantapas rakisqa runakunam.

¹⁰ Ñutu allpa hinaña Jacobpa mirayninkunataqa ¿pitaqsi yupayta atinman? Wakillan kachkaptinkupas Israelpa mirayninkunataqa ¿hayka kasqankutapas pitaqsi yachanman? ¡Ima allinraq kanman wak allin ruraq runakuna hina ñoqapas wañukuptiyqa! ¡Ima allinraq kanman paykunapa wañukuyninta hina ñoqapas chinkaruptiyqa!

¹¹ Hinaptinmi Rey Balacñataq reclamarqa Balaamta: —¿Imatataq nichkanki? Enemigoykunata ñakanaykipaqmi ñoqaqa pusachimurqayki, aswanqa paykunapa favorninpiraqmi qamqa rimarichkanki —nispa.

¹² Hinaptinmi Balaamñataq nirqa: —Ñoqaqa nirqaykiñam Tayta Diospa rimachiwasqallanta rimanaypaq —nispa.

¹³ Rey Balacñataqmi nirqa: —Hakuchik huklaw sitioman, chaymantañam lliw campamentota mana rikuchkaspapas patallantapas qawaykamunki chaynapi ñakaykapamuwanaykipaq —nispa.

¹⁴ Chaymi Rey Balac pusarqa Balaamta Pisga Orqopi kaq Zofim patakama. Balaanmi chaypi qanchis altarkunata hatarichispan sapa altarpi wañuchispa kañarqa huk torotawan huk carnerota.

¹⁵ Chaypim Rey Balacta nirqa: —Lliw kañanayki animalpa ladonpi sayaykuchkay. Ñoqañataqyá rirusaq, ichapas Tayta Dioswan tuparamuyman —nispa.

¹⁶ Balaanman Tayta Dios rikuriykuspanmi yachachirqa kaynata: —Rey Balacman kutispaykiqa nisqayta hinallam nimunki —nispa.

¹⁷ Balaam kutiruptinmi Rey Balacqa Moab nacionpi kamachikuqkunapiwan kañasqanku animalpa ladonpi suyachkasqaku. Hinaptinmi Rey Balac tapurqa: —¿Imanimusurqankitaq Tayta Diosqa? —nispa.

¹⁸ Chaymi Balaam kaynata rimarirqa: ¡Yaw Balac, qamqa hatarimuyá! ¡Yaw Ziporpa churin, qamqa uyariwayá!

¹⁹ Diosqa manam runakuna hinachu. Manam payqa llullakunmanchu. Piensasqantapas manam cambianmanchu. Imapas rimasqantaqa ruranqapunim. Imapas nisqantaqa cumplinqapunim.

²⁰ Runankunapa favorninpi rimanaypaqmi ñoqataqa kamachiwarqa. Manam harkakuymanchu Diospuni bendecichkaptinqa.

²¹ Jacobpa mirayninkunataqa manam pipas huchayoqmi ninmanchu. Israel casta runakunataqa manam pipas mana allin ruraqmi ninmanchu. Yupaychasqanku Tayta Diosqa paykunawanmi kachkan. Reyninkuta hinam paykunaqa payta alabachkan.

²² Llumpay kallpasapallañam monte toroqa. Chayna kallpawanmi Diospas paykunata Egipto nacionmanta horqomurqa.

²³ Jacobpa mirayninpa contranpiqa manam brujopas atinmanchu. Israelpa mirayninpa contranpiqa manam adivinaqpas atinmanchu. Kunanqariki Jacobpa mirayninkunatam ninqaku. Kunanqariki Israelpa mirayninkunatam ninqaku: “¡Mayna admirakuypaqmi qamkunarayku Diospa rurasqanqa!” nispa.

²⁴ Kay llapa runakunaqa leon hinam hatarichkanku. Kay llapa runakunaqa leon hinam chutaparikuchkanku. Manam samaykunqachu wañuchisqanpa yawarninta llaqwanankama.

²⁵ Hinaptinmi Rey Balacñataq nirqa Balaamta: —Wak runakunata ñakaykuyta manaña atispaykiqa amataqyá bendeciontapas rimaytaqchu —nispa.

²⁶ Chaymi Balaamñataq nirqa: —¿Manachum ñoqaqa nirqayki: “Tayta Diospa niwasqallantam rurasaq” nispay?

²⁷ Chaymi Rey Balacñataq nirqa: —Hakuchik huklaw sitiomanña ichapas chay sitiomantaqa Dios munanman ñakaykapuwanaykipaq —nispa.

²⁸ Chaynapim Rey Balacqa pusarqa Balaamta Peor sutiyoq orqopa puntaman. Chay sitiomantam sutillata rikurqaku tukuy chunniq pampata.

²⁹ Chaymi Balaam nirqa Rey Balacta: —Kaypi hatarichipuway qanchis altarkunata hinaspañataq nakamuy qanchis torotawan qanchis carnerota —nispa.

³⁰ Chaynapim Rey Balac rurarqa Balaampa tukuy kamachisqanta hinaspam wañuchispa kañarqa huk torotawan huk carnerota sapa altarpi.