Números 22 - Quechua Ayacucho Bible 1987

Balaam sutiyoq runata Rey Balac qayachimusqanmanta

¹ Chaymanta pasaspankum Israelpa mirayninkuna samarurqaku Moab sutiyoq pampakunapi, chay pampakunaqa kachkan Jordan Mayupa waklawnin Jerico llaqtapa chimpanpim.

² Amor casta runakunapa contranpi Israel runakuna tukuy ima rurasqankutam Ziporpa churin Rey Balac yacharurqa.

³ Moab nacionniyoq runakunapas anchallatañam mancharikurqaku Israelpa mirayninkunaqa achkallaña kasqankurayku. Chaynaqa Israelpa mirayninkunaraykumá Moab nacionniyoq runakunaqa ancha mancharisqallaña karqaku.

⁴ Moab nacionniyoq runakunam Madian casta ancianokunata nirqaku: —Qorata bueyes mikuchkaq hinachiki kay runakunaqa muyuriqninchikpi imanchiktapas tukurunqaku —nispa. Chay tiempopiqa Moab nacionpa reyninqa karqa Ziporpa churin Balacmi.

⁵ Chayraykum payqa Beorpa churin Balaam sutiyoq runaman kacharqa. Balaam sutiyoq runaqa kachkarqa Petor llaqtapim, chay Petor llaqtaqa tarikurqa Eufrates Mayupa hichpan Amav lawpim. Balaam sutiyoq runaman nimunankupaqmá Rey Balac runankunaman kaynata nirqa: —Egipto nacionmantam runakuna lloqsiramunku allpapas tapaykuq, kunanqa hichpallaypiñam samaruspa kachkanku.

⁶ Chaylla hamuspaykiyá kay runakunata ñakaykapuway, paykunaqariki ñoqamantaqa aswan atiyniyoqmi kachkanku. Ichapas ñakaykuptikiqa venceruspay allpaymanta qarqoruyman. Ñoqaqariki yachanim pipaqpas mañakuptikiqa bendecisqa kasqanta chaynataq ñakaykuptikipas ñakasqa kasqanta —nispa.

⁷ Chaynapim Moab nacionniyoq ancianokuna chaynataq Madian castapa ancianonkuna Balaam sutiyoq runaman adivinaqpa pagonta apaspanku pasarqaku. Balaampa kasqanman chayaruspankuñataqmi Rey Balacpa kunasqanta willarqaku.

⁸ Hinaptinmi Balaamñataq paykunata nirqa: —Kunan tutaqa kaypiyá samaychik. Tayta Diospa niwasqanta hinam paqarinña willasqaykichik —nispa. Chaynapimá Moab nacionmanta riq ancianokunaqa Balaampa kasqanki samarurqaku.

⁹ Ichaqa Diosmi Balaaman rikuriykuspan nirqa: —¿Pikunataq kay samakuqkunaqa? —nispa.

¹⁰ Chaymi Balaamñataq Diosta nirqa: —Moab nacionpa reynin Ziporpa churin Balacmi kaynata kunamuwasqa:

¹¹ “Egipto nacionmantam runakuna lloqsiramun allpapas tapaykuq chaynaqa hamuspaykiyá ñakaykapuway, icharaqpas chaynapiqa contrankupi peleaspay qarqoruyman” nispa.

¹² Hinaptinmi Balaamta Dios nirqa: —Ama paykunawanqa riychu, amataq chay runakunatapas ñakamuychu. Paykunaqa ñoqapa bendecisqay runakunam —nispa.

¹³ Achikyaruptinmi Rey Balacpa kachamusqan kamachikuqkunata Balaam nirqa: —Kutikuychik llaqtaykichikman, Tayta Diosmi mana munanchu qamkunawan rinayta —nispa.

¹⁴ Moab nacionpi kamachikuqkunam kutiruspanku Rey Balacta nirqaku: —Balaamqa manam ñoqaykuwan hamuyta munanchu —nispa.

¹⁵ Ichaqa Rey Balacmi yapatawan kacharqa aswan achkataña hinaspa ancha reqsisqa kamachikuqkunataña.

¹⁶ Balaampa kasqanman chayaruspankum Ziporpa churin Rey Balacpa kunasqanta nirqaku: —Ama hina kaspaykiyá ama demoramuspa chaylla hamuruy.

¹⁷ Ñoqaqa anchallaña reqsisqa runatam rurasqayki. Imam mañawasqaykitapas rurasaqtaqmi. Hamuspaykiyá kay runakunata ñakaykapuway —nispa.

¹⁸ Ichaqa Balaanmi kaynata nirqa: —*f**Yachasqan palacionpi huntataña qori-qollqeta Rey Balac qowaptinpas yupaychasqay Tayta Diospa kamachiwasqanpa contranpiqa manam imatapas ruraymanchu.

¹⁹ Chaywanpas ama hina kaspayá kunan tuta kaypi samakuychik. Kunan tutam yachaykusaq imatawanraqsi Tayta Dios niwananta —nispa.

²⁰ Chay tutam Balaanman Dios rikuriykuspan nirqa: —Chay runakuna pusaqniki hamuptinqa riyá paykunawan ichaqa ñoqapa nisqallaytam ruranki —nispa.

Diospa angelninwan Balaam tuparusqanmanta

²¹ Achikyaruptinmi Balaamqa asnonpi sillakuykuspan Moabpi kamachikuqkunawan rirqa.

²² Aswanqa Diosmi piñakurqa Balaampa risqanwan. Chaymi Tayta Diospa angelnin paypa contranpi ñanpi sayarurqa, chayqa pasakurqa iskay serviqninkunawan compañachikuspa asnonpi sillasqa richkaptinmi.

²³ Chay asnonmi Tayta Diospa angelninta ñanpi espadan hapirisqata rikururqa hinaspam ñanmanta muyuruspan chakrantaña rirqa ichaqa Balaanmi asnonta maqarqa ñanman kutinanpaq.

²⁴ Aswanqa Tayta Diospa angelninmi uvas huertakunapa chawpin riq kichki ñanpi sayarurqa, sayarurqaqa kaylawnin-waklawnin rumiwan perqasqa kasqanraykum.

²⁵ Chay angelta asno huktawan rikuruspanmi perqa kuchuntaña rispan Balaampa chakinta perqaman qemirurqa chaymi Balaamqa asnonta yapatawan maqarqa.

²⁶ Ichaqa Tayta Diospa angelninmi ñawparuspan manaña pasay atina kichki ñanpi sayarurqa.

²⁷ Hinaptinmi chay asnoqa Tayta Diospa angelninta rikurusqanrayku pampamanña sirikuykurqa. Chaymi Balaam rabiaruspan tawnanwan asnonta waqtaparurqa.

²⁸ Chay ratopim asnota Tayta Dios rimarirachirqa hinaptinmi Balaamta chay asno nirqa: —¿Imanarqaykitaq kimsakamaña maqawanaykipaq? —nispa.

²⁹ Chaymi Balaamñataq nirqa: —Burlakuwasqaykiraykum maqayki. Makiypi espada kaptinqa kunallanmi wañurachikiman —nispa.

³⁰ Chaymi asnoñataq Balaamta nirqa: —¿Manachum Ñoqaqa asnoyki kani? ñoqaqariki unayña sillakusqayki asnoykim kani, manam huk kutillatapas kaynataqa rurarqaykichu —nispa. Hinaptinmi Balaamñataq nirqa: —Arí chaynam —nispa.

³¹ Balaamta Tayta Dios qawarirachiptinmi chayraq rikururqa paypa angelninta, chay angelqa espadanta hapispam ñanpi sayachkasqa. Chaymi Balaam qonqoranpa pampakama kumuykurqa.

³² Hinaptinmi Tayta Diospa angelnin payta nirqa: —¿Imanasqataq kimsakamaña asnoykita maqaparunki? Ñoqaqa hamurqani qamta harkanaypaqmi, kay risqaykiqa qampa munasqaykiman hinallam.

³³ Asnoqa rikuruwaspanmi ñawpaqniymanta muyururqa kimsa kutikama, mana chaynata ruranmanchu karqa hinaptinqa qamtam wañurachikiman karqa, asnoykitam ichaqa mana wañuchiymanchu karqa —nispa.

³⁴ Hinaptinmi Balaamñataq Tayta Diospa angelninta nirqa: —Huchallikurunim. Ñawparuspa ñanpi sayarusqaykitaqa manam yacharqanichu. Mana allinpaq rikchakapusuptikiqa kutikusaqyá —nispa.

³⁵ Ichaqa Tayta Diospa angelninmi Balaamta nirqa: —Hinatayá riy chay runakunawan aswanqa ñoqapa nisqallaytam rimamunki —nispa. Chaymi Balaam rirqa Rey Balacpa kachamusqan runakunawan.

Balaamta Rey Balac chaskisqanmanta

³⁶ Balaampa risqanta Rey Balac yacharuspanmi chaskiqnin rirqa Arnon Mayupa hichpan Moab llaqtakama. Chay llaqtaqa kachkan Arnon Mayupa hichpanpi kaq Moab allpapa linderonpiñam.

³⁷ Rey Balacmi Balaamta nirqa: —¿Manachu kikiypuni qamtaqa qayachimurqayki? ¿Imanasqataq manaqa hamuyta munarqankichu? ¿Manachum ñoqaqa llumpa-llumpay reqsisqataña ruraykiman? —nispa.

³⁸ Hinaptinmi Balaamñataq Rey Balacta nirqa: —Arí, hamurqanim qawaykuqniki. Aswanqa manam munasqaytachu rimasaq, Diospa rimachiwasqallantam rimasaq —nispa.

³⁹ Balaanmi pasarqa Rey Balacwan Quiriat-huzot llaqtaman.

⁴⁰ Chaypim Rey Balac nakachirqa toronkunatawan ovejankunata. Chaynataqa rurachirqa Balaanman chaynataq compañaqnin kamachikuqkunaman convidananpaqmi.

⁴¹ Paqarinnintinmi Rey Balac pusarqa Balaamta Bamot-baal Moqoman. Chay sitiomantam qawarirqaku Israelpa mirayninkunapa campamentonpa patankunallata.