Números 20 - Quechua Ayacucho Bible 1987

Qaqamanta pawamuq yakumanta

¹ Israelpa llapallan mirayninkunam punta kaq killapi chayarurqaku Zin nisqanku chunniqman hinaspam samarurqaku Cades lawpi. Maria chaypi wañukuptinmi pamparurqaku.

² Runakunapaq yaku mana kaptinmi paykuna huñunakururqaku Moisespa chaynataq Aaronpa contranpi.

³ Moisespa contranpi rimaspankum nirqaku: —¡Amalaya Tayta Diospa wañuchisqan runakunawan kuska wañukuchwan karqa!

⁴ ¿Imapaqtaq Tayta Diospa runankunataqa kay chunniqman pusamuwarqankiku? ¿Ñoqaykupas chaynataq animalniykupas kaypi wañunaykutachu munankichik?

⁵ ¿Imapaqtaq Egipto nacionmanta pusamuwarqankiku kay mana imapa kanan sitioman? Kaypiqa manam tarpuchwanchu imatapas. Manam kanchu higospas, uvaspas, granadapas nitaq tomanaykupaq yakupas —nispa.

⁶ Runakunapa qayllanmantam Moiseswan Aaron pasarqaku Diosman asuykuna karpapa punkunman chaypim qonqoranpa pampakama kumuykurqaku hinaptinmi Tayta Diospa kanchariynin paykunaman rikuriykamurqa.

⁷ Moisestam Tayta Dios nirqa:

⁸ —Tawnaykita hapispayá wawqeki Aaronwan huñuychik runakunata. Paykuna qawachkaptinmi qaqata rimapayanki yaku pawamunanpaq hinaptinmi chay qaqa rumimanta lloqsimuq yakuta runakuna tomanqaku chaynataq animalkunapas —nispa.

⁹ Chaymi Tayta Diospa kamachisqanman hina qayllanmanta Moises tawnanta aparqa.

¹⁰ Runakunata qaqapa ñawpaqninman Aaronpiwan huñuruspam Moises nirqa: —Uyariychik llapa mana kasukuqkuna: ¿Yaqachum kay qaqa tomanaykichikpaq yakuta pawarachimunman? —nispa.

¹¹ Chaynata niruspanmi Moises altoman makinta hoqarispan tawnanwan iskaykama qaqata waqtarurqa hinaptinmi achka yaku pawaramuptin runakunapas chaynataq animalkunapas tomarqaku.

¹² Ichaqa Moisestawan Aarontam Tayta Dios nirqa: —Israelpa mirayninkunaman chuya kasqaymanta yachachinaykichikpaq mana confiakuq kasqaykichikraykum ñoqapa qosqay allpamanqa paykunata mana yaykuchinkichikchu —nispa.

¹³ Chay yakutam Meribawan suticharqaku. Chaypim Israelpa mirayninkuna Tayta Dioswan atipanakurqaku chaypitaqmi chuya kasqanta paykunaman qawachirqa.

Edom nacionniyoq runakuna Israelpa mirayninkunata harkakusqankumanta

¹⁴ Cades lawmantam Moises huk kaqninta kacharqa Edom nacionpa reyninta kaynata nimunanpaq: —Castayki Israel runakunapa tukuy ñakarisqantaqa yachankim.

¹⁵ Abueloykum Egipto nacionman ripukuspa chaypi unay watakuna yachamurqaku. Aswanqa Egipto runakunam abueloykutapas hinaspa ñoqaykutapas ñakarichimuwarqaku.

¹⁶ Chaymi Tayta Diosta qayakuptiyku uyariykuwaspanku angelninta kacharqa hinaspam Egipto nacionmanta horqoramuwarqaku. Kunanqa allpaykipa linderonwan tupaq Cades llaqta lawpiñam kachkaniku.

¹⁷ Ruegakuykikum allpaykipa chawpinta pasarunaykupaq. Manam tarpusqa ukuntachu nitaq uvas huertantachu risaqku, manataqmi pozoykipi yakutapas tomasaqkuchu. Hatun ñanllanta rispaykum mana maylawmanpas muyusaqkuchu allpaykita pasarunaykukama —nispa.

¹⁸ Ichaqa Edom nacionpa reyninmi nirqa: —Manam allpaypa chawpintaqa pasawaqchikchu, pasaptikichikqa qamkunawan peleaqmi lloqsimusaqku —nispa.

¹⁹ Hinaptinmi Israelpa mirayninkunañataq nirqaku: —Hatun ñanllantam risaqkuqa, sichum pozoykipi yakuta ñoqaykupas otaq animalniykupas tomaruspaqa pagapusqaykikum. Chaki-purilla pasarunaykutayá dejaykuwayku —nispa.

²⁰ Ichaqa Edompa reyninmi nirqa: —Manapunim pasawaqchikchu —nispa. Paykunapa contranpim lloqsimurqa achkallaña tropayoq qari-qarillaña.

²¹ Allpanku hawan pasanankuta harkakuptinkum Israelpa mirayninkunaqa huklaw ñannintaña pasakurqaku.

Aaronpa wañukusqanmanta

²² Israelpa mirayninkunam Cades llaqta lawmanta pasaspanku Hor sutiyoq orqoman chayarurqaku.

²³ Edom nacionwan tupaq Hor sutiyoq orqopim Tayta Dios nirqa Moisestawan Aaronta:

²⁴ —Aaronqa wañukuspam mana yaykunqachu Israelpa mirayninkunaman qosqay allpamanqa. Meriba lawpi yakuta qoptiy mana kasuwasqaykichikraykum payqa mana yaykunqachu.

²⁵ Yaw Moises, qamyá Aarontawan churin Eleazarta pusay Hor sutiyoq orqoman.

²⁶ Chaypim Sacerdote kaspan hinakunan pachanta horqonki hinaspam chay pachankunawanqa churin Eleazartaña pachachinki. Chaypim Aaron wañukunqa —nispa.

²⁷ Tayta Diospa kamachisqanta hinam Moises rurarqa. Llapa runakuna qawachkaptinkum Hor sutiyoq orqoman rirqaku.

²⁸ Chaypim sacerdote kaspan hinakunan pachata Aaronmanta Moises horqospan chay pachakunawan pachachirqa Aaronpa churin Eleazartaña. Aaronmi wañukurqa chay orqopa puntanpi. Moiseswan Eleazarñataqmi chay orqomanta kutikamurqaku.

²⁹ Aaronpa wañukusqanta yacharuspankum Israelpa llapallan mirayninkuna waqayllawanña lutokurqaku kimsa chunka punchaw.