Números 19 - Quechua Ayacucho Bible 1987

Chuyanchana yakumanta

^1-2 Israelpa mirayninkunaman yachachinanpaqmi Moisesmanwan Aaronman Tayta Dios kay decretota nirqa: —Sumaqnin puka sano vaquillatayá apamuwaychik, chay vaquillaqa kanqa manaraq haykapipas yugo churkusqam.

³ Chay vaquillataqa qonkichik sacerdote Eleazarmanmi, payñataqmi campamentopa waklawninman pusachispan qayllanpi nakachinqa.

⁴ Sacerdote Eleazarñataqmi vaquillapa yawarninman dedonta challpuspan karpapa ñawpaqnin lawman challanqa qanchis kutikama.

⁵ Chaymantam hina qayllanpitaq chay vaquillata kañachinqa, kañachinqamá qaranta, aychanta, yawarninta chaynataq akantapas.

⁶ Chay sacerdotem chay vaquillapa rupasqanman wischuykunqa cedro kaspita, hisopota chaynataq guindo qaytutapas.

⁷ Chay sacerdotem pachankunata taqsakuspan kikinpas bañakunqataq hinaspañam campamentoman kutiykunqa. Payqa tutaykuqkamam ama asuykamuwanqachu.

⁸ Vaquilla kañaqpas pachankunata taqsaspanmi kikinpas bañakunqataq. Tutaykuqkamam paypas ama asuykamuwanqachu.

⁹ Asuykamuwananpaq hina kaq runam kañasqanku vaquillapa uchpantaqa huñuykuspan apanqa campamentopa hawa lawninman hinaspam chaypaq akllasqa sitioman churamunqa. Chay uchpataqa Israelpa mirayninkunam waqaychanqaku chaynapi yakuman polvospa chaywan chuyanchakunankupaq. Chaynataqa ruranqaku huchankumanta chuyanchasqa kanankupaqmi.

¹⁰ Uchpa hoqariqpas pachankunatam taqsakunqa hinaspam tutaykuqkama ama asuykamuwanqachu. Chayqa wiñaypaq decretom Israelpa mirayninkunapaq chaynataq qamkunawan *f**yachaq forasterokunapaqpas.

¹¹ Wañusqa runapa ayan llachpaq runaqa qanchis punchawmi mana asuykuwanmanchu.

¹² Kimsa kaq punchawpi hinaspa qanchis kaq punchawpi chuyanchakuna yakuwan chuyanchakuspanñam ñoqamanqa asuykamuwanman. Kimsa kaq punchawpi chaynataq qanchis kaq punchawpipas mana chuyanchakuspaqa manam asuykamuwanmanchu.

¹³ Pipas wañusqa runapa ayanta llachparuchkaspan mana chuyanchakuq runaqa *f**yachanay karpatam millakuypaqtaña rurachkan. Chayna runaqa Israel runakuna ukumanta chinkachisqam kanqa. Chuyanchana yakuwan mana challachikusqanraykum payqa millakuypaq kanqa. Chaynapimá payqa hina millakuyllapaq kachkan.

¹⁴ —Pipas kikinpa karpanpi wañuruptinqa kay yachachikuyman hinam rurankichik: Wañuqpa kasqan karpapi tarikuqkunapas chaynataq yaykuqkunapas qanchis punchawpunim mana asuykuwanmanchu.

¹⁵ Kicharayaq mankakunapas otaq tapanwan mana sumaq tapasqa mankakunapas millarikuypaqmi kanqa.

¹⁶ —Chay-chay chakrapi pipapas wañurachisqan runapa ayanta llachparuq runaqa otaq kikillanmanta wañuruq runapa ayanta llachparuq runaqa otaq runapa tullunta otaq sepulturanta llachparuq runaqa qanchis punchawpunim mana asuykuwanmanchu.

¹⁷ —Pipas chaykunata llachparuchkaspan mana asuykuwaqniy runaqa hucharayku wañuchisqa vaquillapa uchpanta mankaman polvospam chayman tallinqa chayraq wisimusqa yakuta.

¹⁸ Asuykuwananpaq kaq runam hisopo sutiyoq plantachata chay yakuman challpuspan chaywan challanqa chay runapa *f**yachanan karpata, challanqataqmi tukuy servicionkunatawan chaypi *f**yachaq runakunatapas. Challanqataqmi tullu llachparuq runatapas otaq pipapas wañuchisqan runapa ayan llachparuq runatapas otaq kikillanmanta wañuruq runapa ayan llachparuq runatapas otaq sepultura llachparuq runatapas.

¹⁹ Asuykuwananpaq kaq runam kimsa kaq punchawpi chaynataq qanchis kaq punchawpi challanqa chay millakuypaq hina kaq runataqa. Qanchis kaq punchawpi chuyancharuptinmi pachankunata taqsakuspan kikinpas bañakunqataq. Payqa inti seqaykuytañam asuykuwanman.

²⁰ Mana asuykamuwananpaq hina kachkaspa mana chuyanchachikuq runaqa runakuna ukumanta chinkachisqam kanqa, chaynaqa kanqa ñoqa Tayta Diospa santuarioyta millakuypaqtaña rurarusqanraykum. Chuyanchana yakuwan mana challachikusqanraykum payqa millakuypaq kanqa.

²¹ Chay decretoqa wiñaypaq decretom. Chuyanchana yakuwan challaq runapas pachankunatam taqsakunqa. Pipas chuyanchana yakuta llachpaq runaqa tutaykuqkamam mana asuykuwanmanchu.

²² Ñoqaman mana asuykamuwaqniy runapa tukuy ima llachpasqanqa millakuypaqmi kanqa, pipas millakuypaq runata llachparuqqa tutaykuqkamam mana asuykuwanmanchu.