Números 17 - Quechua Ayacucho Bible 1987

Aaronpa tawnan ikllirusqanmanta

^1-2 Israelpa mirayninkunata kamachinanpaqmi Moisesta Tayta Dios kaynata nirqa: —Sapa ayllupa jefenmantayá mañay huk tawnata, paykunamantaqa ayllunkunaman hinam mañanki chunka iskayniyoq tawnakunata hinaspam chay tawnakunapi qellqanki sapakama jefepa sutinta.

³ Aaronpa sutintam qellqanki Leviy ayllupa tawnanpi. Sapa aylluman hinam sapa jefekunapa tawnanqa kanqa.

⁴ Chay tawnakunataqa ñoqaman asuykuna karpapim churanki Chunkantin Kamachikuynin waqaychana baulpa ñawpaqninpi, chaypim qamkunawan tupasaq.

⁵ Akllasqay runapa tawnanta ikllirachiptiymi Israelpa mirayninkunaqa manaña contraykichikpi rimanqakuñachu qayllaypiqa —nispa.

⁶ Israelpa mirayninkunaman Moises rimaruptinmi, paykunapi kaq sapa ayllupa jefen tawnanta qoykurqa chaymi karqa chunka iskayniyoq tawnakuna. Aaronpa tawnanpas paykunapa tawnanwanmi karqa.

⁷ Hinaptinmi Moises churarqa chay tawnakunata Tayta Diospa qayllanman Chunkantin Kamachikuy waqaychana karpapi.

⁸ Paqarinnintinta asuykuna karpaman Moises yaykuykuptinmi Leviy ayllumanta kaq Aaronpa tawnan iklliramuspa waytachkasqa hinaspam almendraskunatapas poqosqataña ruruchkasqa.

⁹ Chaymi Moises Tayta Diospa qayllanmanta tawnakunata horqoramurqa Israelpa mirayninkuna qawanankupaq hinaptinmi qawaykuspanku sapakama tawnankuta hapirqaku.

¹⁰ Hinaptinmi Moisesta Tayta Dios nirqa: —Aaronpa tawnanta kutichiy Chunkantin Kamachikuy waqaychana baulpa ñawpaqninman, mana kasukuq Israelpa mirayninkuna yuyarinankupaq chaynapim contraypi rimayninkuta tukuchinki manaña wañunankupaq —nispa.

¹¹ Moisesmi rurarqa Tayta Diospa tukuy kamachisqanta hina.

¹² Israelpa mirayninkunañataqmi Moisesta nirqaku: —Kunanqa ¿ñoqaykupas wañuspachu llapallayku chinkarusaqku?

¹³ Tayta Diospa *f**yachanan karpaman pipas asuykuq runaqariki wañurunpunim —nispa.