Números 16 - Quechua Ayacucho Bible 1987

Moisespa contranpi Coreywan hoqarikuq runakuna castigasqa kasqankumanta

¹ Izharpa churin Coreymi Moisespa contranpi runakunata umacharqa. Coreyqa karqa Leviy ayllumanta kaq Coat sutiyoq runapa mirayninmi. Coreywan kuskataqmi umacharqaku Ruben ayllumanta kaq Eliabpa churin Datan sutiyoq runapas chaynataq paypa wawqen Abiram sutiyoq runapas chaynataq Peletpa churin On sutiyoq runapas.

² Chaynaqa paykunamá Moisespa contranpi hoqarikururqaku Israelpa mirayninkunamanta iskay pachak pichqa chunkan runakunapiwan. Chay umacharachikuq runakunaqa karqaku runakunapa jefenkunam chaynataq ancha reqsisqa runakunam.

³ Chaynaqa paykunamá Moisespa hinaspa Aaronpa contranpi huñunakuruspanku kaynata nirqaku: —¡Chaynallañayá qamkunapa munaychakuynikichikqa kachun! Llapallan kay runakunapas Diospa sapaqchasqanmi kachkan chaynataqmi paykunawantaq Tayta Diospas kachkan. ¿Chaynaqa imanasqataq qamkunallaqa munaychakuchkankichik Tayta Diospa runankunapiqa? —nispa.

⁴ Moisesmi chayta uyariruspan qonqoranpa pampakama kumuykurqa.

⁵ Hinaspam chay Corey sutiyoq runata compañaqninkunatawan nirqa: —Paqarinmi Tayta Dios qawachiwasunchik pim paypa kasqanta chaynataq pim paypaq sapaqchasqa kasqantapas chaynataq pim payman asuykuq runa kasqantapas. Tayta Diosqa akllakusqan runallatam kikinmanqa asuykachinqa.

⁶ Chaynaqa Corey, paqarinmi compañaqnikikunapiwan incienso qontichinaykichikta apamunkichik

⁷ hinaspam sansatawan inciensota chay qontichinaykichikman Tayta Diospa qayllanpi churankichik. Tayta Diospa akllakusqan kaqmi kanqa paypaq sapaqchakusqan runaqa. Chaynaqa Leviy ayllu runakuna ¡chaynallañayá rimasqaykichikqa kachun! —nispa.

⁸ Moisesqa nirqataqmi Coreyta: —Uyariykuwaychik Leviypa mirayninkuna.

⁹ Diosman asuykuna karpapi servikuspa hinaspa Tayta Diospa qayllanpi kaspa Israelpa mirayninkunata servinaykichikpaqmi paykunamanta akllasurqankichik. Chaytachum qamkuna ¿yanqapaq hapinkichik?

¹⁰ Qamtam Corey, wawqekikunatawan, Leviy castakunamanta kasqaykichikrayku Tayta Dios qayllanman asuykachisurqankichik. ¿Hinaptinchum sacerdote karuytaraq munachkankichik?

¹¹ Aaronqa ¿pitaq karqa paypa contranpi rimanaykichikpaqqa? Qamqa llapallan compañaqnikikunapiwanmi Tayta Diospa contranpi huñunakurunki —nispa.

¹² Moisesqa qayachimurqataqmi Eliabpa churin Datantawan Abiramtapas. Aswanqa paykunam nirqaku: —Manam ñoqaykuqa hamusaqkuchu —nispa. Hinaspamá Moisesman kunarqaku:

¹³ —¿Yanqapaqchu rikchakapusunki tukuy imapapas kasqan Egipto nacionmanta pusaramuspa kay chunniqpi wañuchiwaynikiku? ¿Jefe hinachu ñoqaykupi munaychakuyta munanki?

¹⁴ ¿Maymá tukuy imapapas kasqan allpamanqa chayachiwankikuraqchu? ¿Maytaq chakrakunatapas nitaq uvas huertakunatapas qowankikuchu? ¿Ñawsakunata hinachu llapallaykuta ruraruwankiku? Manam qanmanqa hamusaqkuchu —nispa.

¹⁵ Anchallataña Moises rabiaruspanmi Tayta Diosta nirqa: —Ama chaskiychu ofrendankutapas. Paykunapataqa manam asnollantapas qechurqanichu. Paykunataqa manam imanarqanipaschu —nispa.

¹⁶ Chaymantam Coreyta Moises nirqa: —Paqarinmi llapallan compañaqnikikunapiwan Tayta Diosman asuykunkichik. Chaypim kanqa Aaronpas.

¹⁷ Sapakama qontichinaykichikta apaspaykichikmi chayman inciensota churankichik. Qampas chaynataq Aaronpas qontichinantin rispam chay iskay pachak pichqa chunkan qontichinakunatawan Tayta Diospa qayllanpi churankichik —nispa.

¹⁸ Chaymi sapakama qontichinankupi sansaman inciensota hinaykuspanku Diosman asuykuna karpapa punkunpi sayarqaku. Paykunawantaqmi karqaku Moiseswan Aaronpas.

¹⁹ Paykunapa contranpi Diosman asuykuna karpapa punkunman runakunata Corey huñurachimuptinmi Diospa kanchiriynin rikuriykurqa llapallan chaypi huñunasqa runakunaman.

²⁰ Tayta Diosmi Moisestawan Aaronta nirqa:

²¹ —¡Asurikuychik kay runakunamanta, kunallanmi paykunata wañurachisaq! —nispa.

²² Chaymi Moiseswan Aaronñataq qonqoranpa pampaman kumuykuspa nirqaku: —Diosllayku, runakuna kawsachiq Dios. ¿Chulla runapa huchallanmantachu llapa runakunapaq piñakunki? —nispa.

²³ Hinaptinmi Tayta Dios nirqa Moisesta:

²⁴ Niy Israelpa mirayninkunata Coreypa, Datanpa hinaspa Abirampa kasqanku karpamanta asurikunankupaq —nispa.

²⁵ Chaymi Moises hatarispan wakin ancianokunapa compañasqan pasarqa Datanpa chaynataq Abirampa kasqanman.

²⁶ Hinaspam chaypi runakunata Moises nirqa: —Kay mana allin ruraq runakunapa karpanmanta asurikuychik, amataq imankutapas hapiychikchu yanqañataq paykunapa huchanmanta qamkunapas wañuruwaqchik —nispa.

²⁷ Chaymi Coreypa, Datanpa hinaspa Abirampa kasqanku karpapa muyuriqninmanta runakuna asurikururqaku. Datanwan Abiramñataqmi karpankupa punkunman lloqsiramuspa warminkupiwan hinaspa hatunpas-taksapas wawa-churinkunapiwan chaypi sayarqaku.

²⁸ Hinaptinmi Moises nirqa: —Kunanmi yachankichik mana kikillaymantachu kaykuna rurasqayta, aswanqa yachankichikmi Tayta Dios kachamuwaptin kaykuna rurasqaytaqa.

²⁹ Sichu kay runakuna wañukunqa wakin runakunapa wañukunanta hinalla hinaptinqa, yachankichikmi Tayta Diosqa mana kachamuwasqanta.

³⁰ Aswanqa mancharikuypaq kaqta Tayta Dios ruraspa paykunata allpapa sonqonman kawsachkaqta wichiykachiptinqa, qamkunam yachankichik kay runakunaqa Tayta Dios qepanchaq kasqankuta —nispa.

³¹ Moises tukuy chaykunata rimayta tukuruptillanmi chay runakunapa sayasqanku allpa kicharikuykurqa.

³² Chaymi Coreyta hinaspa compañaqnin llapallan runakunata lliw familiantinta hinaspa tukuy kapuqninta allpa millpururqa.

³³ Chaynapim paykunaqa uku pachaman kawsachkaqlla wichiykurqaku. Hinaptinmi allpaqa kaqllamanta wichqakururqa. Chaynapimá paykunaqa Israelpa mirayninkunamanta chinkarurqaku.

³⁴ Allpa ukuman wichiqkunapa qaparisqankuta uyarispankum chaypa muyuriqninpi tarikuq Israel llapallan castakunapas ayqekustin nirqaku: —Yanqañataq ñoqanchiktapas allpa millpuruwachwanchik —nispa.

³⁵ Tayta Diospa qayllanmanta nina rikuriramuspanñataqmi chay incienso qontichiq iskay pachak pichqa chunkan runakunata ruparurqa.

^36-37 Aaronpa churin sacerdote Eleazarman ninanpaqmi Moisesta Tayta Dios kaynata nirqa: —Kañasqa wañuruq runakunapa ukunmanta horqoy chay qontichinakunata hinaspa karuman chay sansakunata taqtaramuy. Chaynataqa ruranki chay qontichinakunaqa ñoqapaq sapaqchasqa kasqanraykum.

³⁸ Huchallikusqankurayku chay wañuq runakunapa qontichimuwanankuqa ñoqallapañam kachkan, chayna sapaqchasqaqa kachkan inciensota ñoqa Tayta Diosman presentamuwanankupaq chaypi servichikusqankuraykum. Chaynaqa chay qontichinakunata llaspayachispayá chaywan altarpa hawanman laqachiy. Chaynapim chayqa Israelpa mirayninkunapaq señal kanqa —nispa.

³⁹ Hinaptinmi sacerdote Eleazar, chay kañarachikuq runakunapa apasqanku broncemanta qontichinankuta huñuramuspan llaspayachirqa altarman laqanankupaq.

⁴⁰ Chay llaspayachisqa kaqkunaqa karqa Israelpa mirayninkuna yuyarinankupaqmi chaynapi pipas Aaronpa mirayninmanta mana kachkaspanqa Tayta Diosman inciensota mana ofrecenanpaq hinaspa Coreytawan compañaqninkunata hina imapas mana pasananpaq. Hinaptinmi Eleazarman Moisesnintakama Tayta Diospa kamachisqanpi hina rurarqaku.

⁴¹ Paqarinnintin punchawñataqmi Israelpa mirayninkuna Moisespa hinaspa Aaronpa contranpi rimaspanku nirqaku: —Qamkunam Tayta Diospa runankunata wañurachinkichik —nispa.

⁴² Moisespa chaynataq Aaronpa contranpi kaq runakuna paykunapa muyuriqninman huñunakuruptinkum Moiseswan Aaron pasarqaku Diosman asuykuna karpaman. Chay ratopi karpata puyu tapaykuptinñataqmi Tayta Diospa kanchiriynin rikuriykurqa.

⁴³ Moiseswan Aaron karpapa ñawpaqninman chayaruptinkum

⁴⁴ Moisesta Tayta Dios nirqa:

⁴⁵ —Asurikuychik kay runakunapa chawpinmanta, kunallanmi paykunata wañurachisaq —nispa. Chaymi paykuna qonqoranpa pampaman kumuykurqaku.

⁴⁶ Moisesmi Aaronta nirqa: —Altarmanta sansata qontichinaman churaspayá chayman inciensota hinay hinaspa chaylla kallpay runakunapa kasqanman hinaspa Tayta Diosta mañakamuy paykunapa huchanta pampachananpaq. Tayta Dios anchallataña piñakuruptinmi runakunapas peste onqoywan wañuytaña qallaykunku —nispa.

⁴⁷ Moisespa kamachisqanman hinam Aaron qontichinata hapispan kallparqa runakunapa kasqanman hinaptinmi runakunaqa Tayta Diospa castigon peste onqoywan wañuytaña qallarichkasqaku. Chaymi Aaronqa inciensota kañaspan Tayta Diosta mañakurqa runakunapa huchanta pampachananpaq.

⁴⁸ Wañuqkunapapas chaynataq kawsaqkunapapas chawpinpi Aaron sayaruptinmi chay peste onqoyqa chayraq tanirurqa.

⁴⁹ Chaywanpas chay peste onqoywanmi wañururqakuña chunka tawayoq waranqa qanchis pachaknin runakuna. Coreywan wañuqkunaqa manam chay wañuqkunawanqa yupasqachu karqaku.

⁵⁰ Chay peste onqoy taniruptinmi Aaron kutirirqa Diosman asuykuna karpapa punkunpi Moisespa kasqanman.