Números 15 - Quechua Ayacucho Bible 1987

Tayta Diosman ofrenda qonankumanta

^1-2 Israelpa mirayninkunaman ninanpaqmi Moisesta Tayta Dios kaynata nirqa: —*f**Yachanaykichikpaq qonay allpaman yaykuspaykichikqa

³ ofrecewankichikmi torotapas otaq ovejatapas. Chay ofrendakunaqa kanmanmi lliw kañapuwanaykichik ofrendapas otaq prometewasqaykichik ofrendakunapas otaq voluntad ofrendakunapas otaq fiestakunapi ofrecewanaykichik ofrendakunapas. Tukuy chaykunaqa ñoqa Tayta Diospaq miski asnaq ofrendam kanqa.

⁴ Chayna ofrendakunata Ñoqa Tayta Diosman presentamuwaspaykichikqa yapankichiktaqmi iskay kilo fino harinatapas, chay harinaqa kanqa huk litro aceitewan chapusqam kawsaykunamanta ofrenda kananpaq.

⁵ Chay ofrendakunamanpas yapankichiktaqmi tallinapaq huk litro vinota, chaytaqa yapankichik sapa malta carnero ofrendamanmi.

⁶ Sapa poqosqa carnero ofrendamanñataqmi yapankichik tawa kilo fino harinata, chay harinaqa kanqa huk litro masnin aceitewan chapusqam kawsaykunamanta ofrenda kananpaq.

⁷ Chay ofrendakunamanpas yapankichiktaqmi tallinapaq huk litro masnin vinota, chaykunaqa kanqa ñoqa Tayta Diospaq miski asnaq ofrendam.

⁸ Sichum lliw kañana ofrendapaq malta torota Ñoqa Tayta Diosman ofrecewaspaykichikqa otaq prometewasqaykichik ofrendapaq ofrecewaspaykichikqa otaq ñoqawan allin kasqaykichikmanta ofrendapaq ofrecewaspaykichikqa

⁹ chay ofrendakunamanmi yapankichik soqta kilo fino harinata, chay harinaqa kanqa iskay litro aceitewan chapusqam.

¹⁰ Chay ofrendakunamanpas yapankichiktaqmi tallinapaq iskay litro vinota. Chaykunaqa kanqa Ñoqa Tayta Diospaq miski asnaq ofrendam.

¹¹ Chaynatam rurankichik sapa ofrecewasqaykichik bueyeswan, carnerowan, malta carnerowan chaynataq chivatochawanpas.

¹² Sapa animalta wañuchispaqa wakin ofrendakunatawanmi qowankichik hayka animalkunam kasqanman hina.

¹³ Miski asnaq kañasqa ofrendata ñoqa Tayta Diosman Israelpa mirayninkuna sapakama presentamuwaspanqa kamachisqaykunaman hinam ruranqa.

¹⁴ —Sichu samapakuqlla forastero runa otaq qamkunawan unayña *f**yachaq forasteropas miski asnaq kañasqa ofrendata ñoqa Tayta Diosman ofrecemuwaspanqa qamkunapa ruranaykichikta hinam ruranqaku.

¹⁵ Hina chayna decretollam kanqa qamkunapaqpas chaynataq forasterokunapaqpas. Llapa miraynikichikpaqmi kanqa wiñaypaq decretoy. Qamkuna hinam paykunapas kanqaku ñoqa Tayta Diospa qayllaypiqa.

¹⁶ Hina chayna yachachikuywan hina chayna reglamentollam kanqa qamkunapaqpas chaynataq qamkunawan kaq forastero runakunapaqpas.

^17-18 Israelpa mirayninkunaman ninanpaqmi Moisesta Tayta Dios kaynata nirqa: —Pusasqay allpaman yaykuspaykichikqa

¹⁹ chay allpapi kawsaykunamantam mikunkichik hinaspam ñoqa Tayta Diosman wakinta ofrecewankichik.

²⁰ Puntallaraq kuta rurasqaykichikmantaqa tanta ofrendatam ofrecewankichik. Chay ofrendaqa kanqa eramanta horqosqaykichik ofrendam.

²¹ Chaynatamá ñoqa Tayta Diosman wiñaypaq ofrecewankichik.

²² —Moisesman nisqaypi hina ñoqa Tayta Diospa kamachisqaykunata pantaruspa mana ruraspaykichikqa

²³ otaq Moisesnintakama qallariyninmantapuni hamuq punchawkunakama tukuy kamachisqaykunata pantaruspaykichikqa kaynatam rurankichik:

²⁴ —Llapa runakunapa mana yachasqanta pipas huchallikuruptinqa chay llapallan runakunam ofrecemuwanqa lliw kañana ofrenda kananpaq huk malta torota, chay ofrendaqa kanqa ñoqa Tayta Diospaq miski asnaq ofrendam, chaywan kuskatataqmi ofrecemuwankichiktaq kawsaykunamanta ofrendatapas chaynataq tallinapaq vinotapas imaynam reglamentoyman hina. Ofrecemuwankichiktaqmi huchaykichikrayku huk chivato ofrendatapas.

²⁵ Hinaptinmi sacerdote wañuchinqa Israelpa mirayninkunapa rantinpi chaymi paykunapa huchankunata pampachasaq. Paykunaqariki pantaruspankum huchallikururqaku. Chaynatam rurasaq pantarusqankumanta huchankurayku kañasqa ofrendakunata ñoqa Tayta Diosman apamuwaptinku.

²⁶ Israelpa mirayninkunatapas chaynataq qamkunawan *f**yachaq forasterokunatapas pampachasaqmi pantaruspa huchallikuruptinkuqa.

²⁷ —Pipas pantaypi huchallikuruspanqa watayoq cabratam ofrecemuwanqa huchanta pampachanaypaq.

²⁸ Sacerdotem chay pantaruq runapa rantinpi mana yachaywan huchallikusqanmanta animalta wañuchinqa ñoqa Tayta Diospa qayllaypi. Chaynata sacerdote ruraruptinñam chay runapa huchantaqa pampachasaq.

²⁹ Pantaruspa huchallikuptikichikqa hina chay yachachikuyllam kanqa qamkunapaq chaynataq qamkunawan *f**yachaq forasterokunapaqpas.

³⁰ —Israelpa miraynin kaspapas otaq forastero kaspapas contraypi huchallikuqqa ñoqa Tayta Diostam insultawachkan, chayna runaqa runamasinkunamanta chinkachisqam kanqa.

³¹ Chayna runaqa ñoqa Tayta Diospa palabrayta despreciaspa kamachikuyniytapas mana kasukusqanraykum kikinpa culpanrayku chinkachisqa kanqa.

Samana punchaw mana respetaq runata wañuchisqankumanta

³² Israelpa mirayninkuna chunniqpi kachkaspankum tarirurqaku samana punchawpi yantata pallachkaq runata.

³³ Hinaspam payta pusarurqaku Moisesmanwan Aaronman chaynataq llapa runakunapa qayllanman.

³⁴ Chayna runawanqa mana ima rurayta yachaspankum carcelman churarurqaku.

³⁵ Chaymi Moisesta Tayta Dios nirqa: —Chay runaqa wañunqapunim. Campamentomanta hawapim llapa runakuna rumiwan choqaparunqaku —nispa.

³⁶ Hinaptinmi chay runataqa campamentomanta hawaman pusaruspanku rumiwan choqaparurqaku wañunankama, chaynataqa rurarqaku Tayta Diospa Moisesman kamachisqanpi hinam.

Pachankupa patankunaman kipuyoq qaytukuna siranankumanta

^37-38 Israelpa mirayninkunaman ninanpaqmi Moisesta Tayta Dios nirqa kaynata: —Pachaykichikpa patanpim sirankichik kipuyoq qaytukunata. Chaynatam llapallan miraynikichikkunapas ruranqaku. Pachaykichikpa patanpi sapa kipumanmi churankichik morado watuchakunata.

³⁹ Sapa chay kipuyoq qaytukunata qawarispaykichikmi ñoqapa kamachikuyniykunata yuyarinkichik kasukunaykichikpaq chaynapim pierdekuq warmi hina sonqoykichikpa mana allin munasqankunapiqa manaña purinkichikchu.

⁴⁰ Chay kipuyoq qaytukunata qawaspaykichikmá yuyarinkichik kamachikuyniykunata kasukunaykichikpaq chaynapim ñoqa Diosnillaykichikpaqña sapaqchasqa kankichik.

⁴¹ Ñoqa yupaychasqaykichik Tayta Diosmi Egipto nacionmanta horqomurqaykichik Diosnikichik kanaypaq. Ñoqaqa yupaychasqaykichik Tayta Diosmi kani.