Números 14 - Quechua Ayacucho Bible 1987

Tayta Diospa contranpi hatarisqankumanta

¹ Israelpa mirayninkunam qapariyta qallarispanku tukuy tuta waqarqaku.

² Llapallankum Moisespa hinaspa Aaronpa contranpi rimaspa kaynata nirqaku: —Amalaya Egipto nacionpi wañukamuchwan karqa otaq kay chunniqpipas wañukuchwan.

³ ¿Imapaqtaq Tayta Diosqa kay allpaman pusamuwarqanchik guerrawan wañunanchikpaq hinaspa warminchikkunatapas chaynataq churinchikkunatapas qechuwananchikpaq? ¡Aswan allincha kanman Egipto nacionman kutikuyninchik! —nispa.

⁴ Paykunam ninakurqaku: —¡Jefenchikpaq huk kaqninta churaruspanchik Egiptoman kutikusunchik! —nispa.

⁵ Hinaptinmi Israelpa llapallan mirayninkunapa qayllanpi Moiseswan Aaron qonqoranpa pampaman kumuykurqaku.

⁶ Josueywan Calebpas llakimantam pachankuta llikipakurqaku. Paykunaqa iskayninmi chay allpa wateqamuqkunamanta karqa.

⁷ Hinaspam Israelpa mirayninkunaman nirqaku: —Wateqamusqayku allpaqa alli-allin allpam kasqa.

⁸ Tayta Dios favorecewaspanchikqa chayman pusawaspanchikmá qoykuwasunchik tukuy imapapas kasqan allpata.

⁹ Chaynaqa amayá Tayta Diospa contranpiqa hatariychikchu nitaq chay allpapi runakunatapas manchakuychikchu. Paykunataqa tantata mikuchkaq hinam facillata vencerusunchik. Paykunataqa manam pipas yanapanchu. Ñoqanchikwanmi ichaqa Tayta Diospuni kachkan —nispa.

¹⁰ Chaywanpas llapallan runakunaqa paykunatamá rumiwan choqaparuyta munarqaku. Aswanqa Israelpa llapallan mirayninkunamanmi Tayta Diospa kanchiriynin rikuriykurqa Diosman asuykuna karpapi.

¹¹ Tayta Diosmi Moisesta nirqa: —¿Haykapikamataq kay runakuna piñachiwanqa? ¿Haykapikamataq mana creewanqakuchu paykunapa qayllanpi tukuy señalkunata rurachkaptiypas?.

¹² Paykunataqa peste onqoyta kachaykamuspaymi chinkarachisaq allpata mana dueñochakunankupaq. Qampa miraynikimantañam rurasaq paykunamantapas aswan achkata hinaspa aswan atiyniyoq nacionta —nispa.

¹³ Aswanqa Moisesmi Tayta Diosta nirqa: —Qamqariki kay runakunataqa Egipto nacionmantam atiynikiwan horqomurqanki, paykunata wañuchiy munasqaykita Egipto nacionniyoq runakuna yacharuspankuqa

¹⁴ kay allpapi *f**yachaqkunamanchiki willanqaku. Paykunapas yachankum runaykikunawan kasqaykitaqa chaynataq uyapura paykunaman rimasqaykitapas. Yachankutaqmi puyuyki paykunapa hawanpi sayasqantapas chaynataq punchawpi sayaq puyupi hinaspa tutanñataq sayaq ninapi ñawpaqninku risqaykitapas.

¹⁵ Kay runakunata qonqayllamanta wañurachiptikiqa qanmanta uyariq nacionkunachiki contraykipi kaynata ninqaku:

¹⁶ “Tayta Diosqa prometesqan allpaman mana chayachiyta atispanmi chunniqpi wañurachin” nispa.

¹⁷ Chaynaqa Taytalláy, prometesqaykiman hinayá atiyniyoq kasqaykita reqsichikuy. Qamqariki kaynatam nirqanki:

¹⁸ “Ñoqa Tayta Diosqa anaq piñakuq hinaspa ancha hatun kuyapayakuqmi kani. Ñoqaqa mana allin ruraqtapas, mana kasukuqtapas pampachaqmi kani. Culpayoq runatam ichaqa castigasaq, tayta-mamakunamanta qallaykuspam castigasaq churinkunata, willkankunata hinaspa willkanpa willkankunatapas” nispa.

¹⁹ Chaynaqa Taytalláy, hatun kuyapayakuynikiman hinayá kay runakunataqa pampachaykuy mana allin rurasqankumanta, chaynataqa pampachaykuy imaynam Egipto nacionmantaraq kunankama pampachasqaykiman hinayá —nispa.

Israelpa mirayninkunata Tayta Dios castigasqanmanta

²⁰ Tayta Diosmi Moisesta nirqa: —Ñoqam paykunata pampachani niwasqaykiman hina.

²¹ Chaywanpas kikiyrayku chaynataq tukuy kay pachapi ancha reqsisqa kasqayrayku juraspaymi nini:

²² Egipto nacionpi chaynataq chunniqpi atiyniyta rikuchkaspanku chaynataq señal rurasqaykunata qawachkaspanku achka kutipi pruebaman churawaqniykunaqa chaynataq kamachikuyniykunatapas mana kasukuqkunaqa,

²³ manam mayqanninkupas rikunqakuchu abuelonkuman juramentowan prometesqay allpataqa. Despreciawaqniy runakunaqa manamá mayqanpas chay allpataqa rikunqakuchu.

²⁴ Serviqniy Calebtam ichaqa yaykuchisaq chay qawamusqan allpaman, mirayninkunapas chay allpatam dueñochakunqaku. Calebllam karqa kasukuq sonqoyoq runaqa, payllam tukuy nisqaykunataqa cumplirqa.

²⁵ Amalec casta runakunam Canaan casta runakunapiwan qechwapiqa *f**yachachkanku, qamkunayá ichaqa paqarinpuni muyumuspaykichik chunniqninta riychik Puka Lamar Qocha lawman —nispa.

²⁶ Tayta Diosqa Moisesmanwan Aaronmanmi nirqataq:

²⁷ —¿Haykapikamataq uyarisaq Israelpa mirayninkunapa rimayninta? Contraypi mana allinkuna rimasqankutam uyarichkani.

²⁸ Chaynaqa Ñoqa Tayta Diospa juraspay nisqaytayá kaynata nimuy: “Imam sucedesunaykichikpaq rimasqaykichikta hinam ñoqa qamkunawan rurasaq.

²⁹ Iskay chunka watayoqmanta hanaymanmi contraypi rimaq llapallan yupasqakuna wañunqaku hinaptinmi cuerponkupas chunniqpi quedanqa.

³⁰ Qamkunaqa manam mayqannikichikpas yaykunkichikchu chay allpamanqa. Juraspayraq chaypi *f**yachanaykichikpaq qosqay allpamanqa manam yaykunkichikchu. Jefonepa churin Calebwan Nunpa churin Josueyllam yaykunqakuqa.

³¹ Qamkunam nirqankichik: ‘Churinchikkunataqa enemigonchikkunach qechuruwasunchik’ nispa. Chay churikichikkunatañam chay despreciasqaykichik allpamanqa yaykuchisaq hinaptinmi paykunaña reqsinqaku.

³² Qamkunapa wañusqa cuerpoykichikmi ichaqa kay chunniqpi quedanqa.

³³ Kay chunniqpitaqmi churikichikkunapas tawa chunka wata purinqaku michistin. Qamkunapa traicionawasqaykichikmantam paykunaña ñakarinqaku kay chunniqpi llapallaykichik wañunaykichikkama.

³⁴ Tawa chunka punchawmi allpata wateqamurqankichik, chayna tawa chunka watataqmi castigasqaykichik. Sapa punchawmantam huk wata castigo kanqa. Chaynapim yachankichik contraypi hatarisqaykichikqa yanqapaq kasqanta.

³⁵ Ñoqa Tayta Diosmá nini: Chaynatapunim rurasaq contraypi huñunakuq kay mana allin runakunataqa. Kay chunniqpim wañunqaku, kaypitaqmi tukunqaku.

Chunka wateqaqkunata Tayta Dios wañurachisqanmanta

^36-37 Allpata wateqamunankupaq Moisespa kachasqan runakuna kutiramuspankum mana allin noticiakunawan chay allpapa contranpi runakunata rimachirqaku. Chaymi Tayta Diospa qayllanpi peste onqoywan wañururqaku.

³⁸ Chay allpa wateqamuq runakunamantaqa Josueywan Calebllam mana wañururqakuchu.

Horma lawpi Israelpa mirayninkuna vencesqa kasqankumanta

³⁹ Tayta Diospa nisqanta Israelpa mirayninkunaman Moises willaykuptinmi anchallataña llakikurqaku.

⁴⁰ Paqarinnintinmi tutapayta hatarispanku rirqaku orqoman kaynata nispa: —Kaypiñam kachkanchik chaynaqa Tayta Diospa prometewasqanchik allpamanyá hakuchik. Cheqaptapunipas huchallikurunchikmi —nispa.

⁴¹ Hinaptinmi Moisesñataq nirqa: —¿Imanasqataq mana kasukurqankichikchu Tayta Diospa nisqanta? Chaynaqa rurasqaykichikpas manam allinchu kanqa.

⁴² Amañayá orqomanqa riychikchu, Tayta Diosqa manam qamkunawanñachu kachkan, yanqañataqmi enemigoykichik venceramusunkichikman.

⁴³ Amalec casta runakunam Canaan casta runakunapiwan ñawpaqnikichikpiqa kachkanku chaynapi peleaspa wañuchisunaykichikpaq. Tayta Diosta manaña qatisqaykichikraykum payqa manaña yanapasunkichikchu —nispa.

⁴⁴ Chaywanpas chay runakunaqa mana kasukuspankum orqo lawman rirqaku. Aswanqa Tayta Diospa baulninmi campamentopi quedarurqa chaynataq Moisespas.

⁴⁵ Hinaptinmi chay orqopi *f**yachaq Amalec casta runakuna Canaan casta runakunapiwan lloqsiramuspanku chay riqkunata pasaypaqta vencerurqaku hinaspam qatimurqaku Horma lawman chayamunankukama.