Números 13 - Quechua Ayacucho Bible 1987

Canaan allpa wateqamuqkunamanta

¹ Tayta Diosmi Moisesman nirqa kaynata:

² —Israelpa mirayninkunaman qonay allpata wateqamunankupaq kachay runakunata. Kachaspaqa-kachanki sapa ayllupa jefentam —nispa.

³ Hinaptinmi Moises Paran sutiyoq chunniqmanta kacharqa Tayta Diospa nisqanman hina. Chay kachasqankunaqa llapallankum karqaku Israelpa mirayninkunapi jefekuna.

⁴ Kaynam karqa: Ruben ayllumantam karqa Zacurpa churin Samua.

⁵ Simeon ayllumantam karqa Horipa churin Safat.

⁶ Juda ayllumantam karqa Jefonepa churin Caleb.

⁷ Isacar ayllumantam karqa Joseypa churin Igal.

⁸ Efrain ayllumantam karqa Nunpa churin Oseas.

⁹ Benjamin ayllumantam karqa Rafupa churin Palti.

¹⁰ Zabulon ayllumantam karqa Sodipa churin Gadiel.

¹¹ Joseypa churin Manases castamantañataqmi karqa Susipa churin Gadi.

¹² Dan ayllumantam karqa Gemalipa churin Amiel.

¹³ Aser ayllumantam karqa Micaelpa churin Setur.

¹⁴ Neftaliy ayllumantam karqa Vapsipa churin Nahbi.

¹⁵ Gad ayllumantam karqa Maquipa churin Geuel.

¹⁶ Paykunatam Moises kacharqa allpata wateqamunankupaq. Nunpa churin Oseastam Moises suticharqa Josueywan.

¹⁷ Canaan allpata wateqamunankupaq Moises kachaspanmi paykunata nirqa: —Kaymantam rinkichik Neguev lawman hinaspañam pasankichik orqo lawman.

¹⁸ Qawamuychikyá imaynam allpa kasqanta, chaypi *f**yachaq runakunaqa ¿kallpasapachu icha manachu? paykunaqa ¿asllachu icha achkachu?

¹⁹ ¿Imaynataq *f**yachasqanku allpakunaqa, allinchu icha manachu? Yachasqanku llaqtakunaqa campamentokunallachu icha murallasqa llaqtakunachu.

²⁰ Chay allpaqa ¿kawsaykunapa qespinanchu icha manachu? ¿sachayoqkunachu icha manachu? Kallpanchakuspayá apamuychik chay allpapa rurunta —nispa. Chay wateqamusqanku punchawkunaqa karqa uvaspa punta rurunkuna rikurimuq tiempom.

²¹ Pasaspankumá allpata wateqamurqaku Zin sutiyoq chunniqmanta qallarispa Hamat llaqtaman yaykuna Rehob llaqtakama.

²² Neguev lawman chayaruspankum rirqaku Hebron llaqtakama. Chaypim kachkasqa Anacpa mirayninmanta kaq Ahiman, Sesai hinaspa Talmai sutiyoq runakuna. Chay Hebron llaqtaqa hatarichisqa karqa Egipto nacionpi Zoan llaqtapa qanchis wata ñawpaqnintaraqmi.

²³ Escol wayqokama chayaruspankum chay sitiomanta pallamurqaku kallmantin uvasta chaymi iskay runakuna hombromurqaku kaspipi. Apamurqakutaqmi granadakunatawan higoskunatapas.

²⁴ Chay sitiotam suticharqaku Escol wayqowan, chaynataqa suticharqaku Israelpa mirayninkuna chaymanta kallmantin uvasta pallamusqankuraykum.

²⁵ Tawa chunka punchaw allpata wateqaramuspankum kutimurqaku

²⁶ Paran sutiyoq chunniqpi kaq Cades llaqta lawkama. Chaypim Moisesman, Aaronman hinaspa Israelpa llapa mirayninkunaman willaspanku allpapa ruruntapas qawachirqaku.

²⁷ Willakuspankumá nirqaku: —Chayarqanikum kachawasqaykiku allpaman. Cheqaptapunipas chay allpaqa kasqa tukuy imapapas kasqan allpam. ¡Kayqayá chay allpapa rurunkunaqa!

²⁸ Chaywanpas chay allpapi *f**yachaqkunaqa kallpasapa runakunam kasqaku, llaqtankupas kasqa hatun murallasqa llaqtakunam. Chaypitaqmi rikuramuniku hatunkaray Anac runapa mirayninkunatapas.

²⁹ Amalec casta runakunam Neguev lawpiqa yachasqaku, orqo lawpiñataqmi yachasqaku Het casta runakuna, Jebus casta runakuna hinaspa Amor casta runakuna. Lamar qochapa hichpanpiñataqmi yachasqaku Canaan casta runakuna, hina paykunataqmi yachasqa Jordan Mayu lawpipas —nispa.

³⁰ Hinaptinmi Moisespa qayllanpi runakunata upallachispan Caleb nirqa: —Rispanchikyá chay allpata dueñochakamusunchik. Chaypi *yachaq runakunataqa venceramusunchikmi —nispa.

³¹ Aswanqa riqmasinkunañataqmi nirqaku: —Manam richwanchu. Chay runakunapa contranpi peleaytaqa manam atichwanchu. Ñoqanchikmanta aswan kallpasapam paykunaqa kasqaku —nispa.

³² Paykunamá allpa wateqamusqankupa contranpi rimaspanku Israelpa mirayninkunata nirqaku: —Qawamusqayku allpaqa runakuna mikuq hinam kasqa. Chay llaqtakunapi qawamusqayku runakunaqa kasqa hatunkaray runakunam.

³³ Rikuramunikutaqmi Anacpa miraynin hatunkaray casta runakunatapas. Paykunapa qayllanpiqa karqaniku langosta hinallam, chayna sayayllapaqtaqmi paykunapas qawawarqaku —nispa.