Números 12 - Quechua Ayacucho Bible 1987

Mariapiwan Aaron Moisespa contranpi rimasqankumanta

¹ Mariawan Aaronmi Moisespa contranpi rimarqaku Cus nacionniyoq warmiwan casarakurusqanrayku.

² Paykunamá nirqaku: —¿Tayta Diosqa Moisesnintakamallachu rimarqa? ¿Manachum rimarqa ñoqanchiktakamapas? —nispa. Hinaptinmi Tayta Dios paykunata uyarirurqa.

³ Moisesmi karqa chay tiempopi llapallan runakunamantapas ancha humillakuq runa.

⁴ Hinaptinmi Moisesta, Aaronta hinaspa Mariata Tayta Dios nirqa: —Kimsaykichik riychik asuykamuwanaykichik karpaman —nispa. Chaymi kimsanku chayman rirqaku.

⁵ Hinaptinmi Tayta Dios uraykamurqa karpaman sayaq puyupa ukunpi hinaspam chay karpapa punkunman qayarqa Aarontawan Mariata. Iskayninku asuykuptinkum

⁶ paykunata nirqa: —Kay nisqaytayá uyariychik: Qamkuna ukupi ñoqamanta willakuq runa kaptinqa ñoqam payman rikurimusaq mosqoypi hina hinaspam sueñoyninpi rimapayasaq.

⁷ Serviqniy Moiseswanmi ichaqa mana chaynachu. Payqariki llapan serviqniykunamantapas aswan confianza runam.

⁸ Paywanqa imam kaqtam uyapura rimani, manam rikchanachiykunawanchu, chaynaqa ñoqa Tayta Diosta rikuwachkaptinqa ¿imanasqamá manaqa manchakurqankichikchu serviqniy Moisespa contranpi rimaytaqa? —nispa.

⁹ Paykunapa contranpi Tayta Dios piñakuruspanmi pasakurqa.

¹⁰ Karpamanta puyu asuriruptinmi riti hina yuraqllaña lepra onqoy Mariapa cuerponpi kachkasqa. Aaron muyuriykuspan qawariykuptinmi Mariaqa lepra onqoywanña kachkasqa.

¹¹ Hinaptinmi Moisesta Aaron nirqa: —Ay taytalláy, amayá kay huchamantaqa castigawaykuchu. Loco hinam kaytaqa ruraruniku.

¹² Amayá Mariaqa kachun wañusqa naceruq wawa hinachu otaq aychan ismurichkaq naceq wawa hinachu —nispa.

¹³ Kaynata nispanmi qaparispan Tayta Diosta Moises mañakurqa: —Ruegakuykim, Diosnilláy, Mariata sanoyaykachinaykipaq —nispa.

¹⁴ Chaymi Tayta Diosñataq Moisesta nirqa: —Uyanpi taytan toqaykuptinqa ¿Manachu qanchis punchawpuni penqaypi kanman? Chaynaqa campamentomanta qanchis punchawpuni rakisqa kaspayá chaymantaña kutiykamuchun —nispa.

¹⁵ Chaynapimá Maria qanchis punchawpuni rakisqa karqa campamentomanta, chay sitiomantam runakuna mana lloqsirqakuchu Maria kutimunankama.

¹⁶ Maypacham Maria paykunaman kutiramuptinñam Haserot lawmanta pasaspanku Paran sutiyoq chunniqpi samarurqaku.