Números 11 - Quechua Ayacucho Bible 1987

Aychata qonanpaq Tayta Diospa prometekusqanmanta

¹ Huk punchawmi Israelpa mirayninkuna sasachakuykunapi kaspanku Tayta Diospa contranpi rimarqaku. Chaymi pay uyariruspan anchallataña piñakurqa hinaspam campamentopa muyuriqninta kañarurqa ninata rikuriykachimuspan.

² Hinaptinmi runakunaqa qaparispanku Moisesta ruegakurqaku, chayñam Tayta Diosta Moises mañakuptin chay nina tanirurqa.

³ Chayraykum Tayta Diospa ninan paykuna ukupi ratarirusqanrayku chay sitiota suticharqaku “Tabera” nispa.

⁴ Israelpa mirayninkunawanmi karqaku tukuy rikchaq runakuna. Paykunam imapas munasqanku mikuykuyta anchallataña munarqaku. Hinaptinmi Israelpa mirayninkunapas paykunawan kuska waqarqaku kaynata nispa: —Amalaya aycha karunman mikuykunanchikpaq.

⁵ ¡Maypiraq Egipto nacionpi debaldella mikusqanchik challwa! ¡Maypiraq pepinokuna, sandillakuna, porokuna, cebollakuna chaynataq ajoskunapas!

⁶ Manañam mikunayawanchikpaschu, kay “Maná” sutiyoq mikuyllatañam kaypiqa tarinchik —nispa.

⁷ “Maná” sutiyoq mikuyqa rikchakurqa culantropa muhumanmi, colorninñataqmi rikchakurqa belio sutiyoq sachapa weqenman.

⁸ Runakunam cheqerispanku huñukuqku hinaspam maraypi otaq muchkapi kutaspanku yanuqku mankapi otaqmi rurarqaku tortata. Gustonqa karqa aceitewan rurasqa tanta hinam.

⁹ Campamentoman tuta sullamuptinmi “Maná” sutiyoq mikuypas wichimuq.

¹⁰ Moisesmi uyarirurqa Israelpa mirayninkunaqa llapallan familiantin karpankupa punkupi waqasqankuta. Tayta Diosmi piñakurqa anchallataña. Moisestapas manam gustarqachu chay rurasqankuqa.

¹¹ Chaymi Moises nirqa Tayta Diosta: —¿Imanasqataq ñakarichiwanki kay serviqnikitaqa? ¿Imanasqataq manaqa favorecewankichu? ¿Imanasqataq kay runaykikunataqa churkuykuwanki?

¹² ¿Ñoqaqa paykunapa tayta mamanchu karqani ñuñuq wawata hina abuelonkuman prometesqayki allpaman marqayniypi apanaypaqqa?

¹³ ¿Maymantataq horqomusaq aychata kay runakunaman qonaypaqqa? Waqapayawachkankum: “Aychata qowayku mikunaykupaq” nispanku.

¹⁴ Sapallayqa manam atiymanchu kay runaykikuna pusaytaqa, ancha sasallañam.

¹⁵ Sichum chaynata ñoqawan ruraspaykiqa, ama hina kaspaykiyá wañurachiwayña. Hinaptinqa manañachá tarikusaqchu chayna sasachakuykunapiqa —nispa.

¹⁶ Chaymi Moisesta Tayta Dios nirqa: —Huñumuway Israelpa mirayninkunamanta reqsisqayki qanchis chunka ancianokunata otaq paykunapi kamachikuqkunata hinaspayá asuykamuwanaykichik karpapa ñawpaqninpi sayaykamuychik.

¹⁷ Uraykamuspaymi qanwan rimasaq hinaspam qanwan kaq espirituykimanta paykunaman qosaq chaynapi qanwan kuska runakunamanta cuentallikunankupaq. Chaynapim runakunamantaqa mana qamllañachu cuentallikunki.

¹⁸ Runakunatayá kamachiy ñoqapaq paqarin sapaqchakunankupaq chaynapi aychata mikunankupaq. Paykunatam uyarirqani: “Amalaya aycha kanman mikunanchikpaq” nispa waqasqankuta. Uyarirqanitaqmi “Egipto nacionpim allinqa kakurqanchik” nisqankutapas. Chaynaqa ñoqam paykunaman aychata qosaq mikunankupaq.

¹⁹ Ichaqa paykunamanqa qosaq manam huk punchawllachu nitaq iskay punchawllachu nitaq pichqa punchawllachu nitaq chunka punchawllachu nitaq iskay chunka punchawllachu.

²⁰ Paykunaqa killantinmi mikunqaku amirunankukama hinaspa amiruspa millakunankukama. Ñoqa Tayta Dios paykunawan kachkaptiymi despreciawaspanku qayllaypi waqaspa nirqaku: “¿Imapaqraq Egipto nacionmanta lloqsimurqanchik?” nispa.

²¹ Hinaptinmi Tayta Diosta Moises nirqa: —Ñoqawanqa kachkanku soqta pachak waranqa soldadokunam. Qamñataqmi ninki: “Qosqaykichikmi aychata killantin mikunaykichikpaq” nispa.

²² ¿Maypitaq kachkan nana-nanaq ovejakunapas, vacakunapas chaynapi nakaspa llapallanman mikuchinapaqqa? Lamar qochapi challwakunapas manach paykunamanqa haypanmanchu —nispa.

²³ Hinaptinmi Tayta Diosñataq Moisesta nirqa: —¿Piensankichu pisilla atiyniyoq kasqayta? Kunanmi yachanki nisqaykunaqa cumplikunqachus icha manachus —nispa.

Diospa sutinpi rimaq qanchis chunka ancianokunamanta

²⁴ Moises lloqsiruspanmi nirqa runakunaman Tayta Diospa nisqankunata hinaspam huñurqa qanchis chunka ancianokunata hinaspam karpapa muyuriqninpi paykunata sayachirqa.

²⁵ Tayta Diosmi puyupi uraykamuspan Moiseswan rimarqa hinaspam paywan kaq espiritunmanta qorqa qanchis chunka ancianokunaman chaymi paykunaqa Diosmanta willakuqkuna hina rimarqaku, ichaqa manañam yapatawanqa sucedekurqachu.

²⁶ Campamentopi quedamuq Eldad sutiyoq runapas Medad sutiyoq runapiwanmi karpaman mana rirqakuchu ancianokunawan listasqa kachkaspankupas, chaywanpas espiritu paykunaman huntaykuptinmi campamentopi Diosmanta willakuqkuna hina rimarqaku.

²⁷ Chaymi huk warma kallpaspan Moisesman nimurqa: —Eldadwan Medadmi Diosmanta willakuqkuna hina rimachkanku campamentopi —nispa.

²⁸ Hinaptinmi Nunpa churin Josueñataq mozo kayninmanta servisqan Moisesta nirqa: —Taytáy Moises, upallachimuy chay runakunata —nispa.

²⁹ Hinaptinmi Moisesñataq nirqa: —¿Ñoqamantachu nanachikunki? Amalaya Tayta Diosqa Espiritunta llapallan runankunaman qoykunman chaynapi llapallankuña Diosmanta willakuqkuna hina rimanankupaq —nispa.

³⁰ Hinaptinmi Moisesqa Israelpa miraynin ancianokunapiwan kutirqaku campamentoman.

Tayta Diosmi rikurichimurqa yutuman rikchakuq animalkunata

³¹ Tayta Diosmi wayrarachimurqa lamar qochamanta yutu kaqlla animalkunata, chay animalkunam tiyarurqaku campamentomanwan campamentopa muyuriqninkunaman, chaynaqa mastarikurqa campamentomanta yaqa huk punchaw purinakamam yaqa huk metro raktayoq.

³² Hinaptinmi chay tukuylla punchaw hinaspa chay tukuylla tutan huñurqaku chay animalkunata, huñukurqakutaqmi paqarinnintin punchawpas. Asllataña huñuspankupas sapakamam huñukurqaku chunka costalta hinaspam chakichirqaku campamentopa muyuriqninpi.

³³ Israelpa mirayninkuna aychata chayraq malliykuchkaptinkum Tayta Dios paykunapa contranpi piñakuruspa wañurachirqa achka-achka runata.

³⁴ Chayraykum chay sitiota suticharqaku “Kibrot-hataava” nispanku. Chaynataqa suticharqaku mikuylla munaq runakunata chaypi pampasqankuraykum.

³⁵ Chay Kibrot-hataava sutiyoq sitiomantam runakuna rirqaku Hazerot lawkama hinaspam chaypi samarurqaku.