Números 10 - Quechua Ayacucho Bible 1987

Qollqe cornetillakunamanta

¹ Tayta Diosmi Moisesta nirqa:

² —Rurachiy qollqemanta iskay cornetillata, chaykunataqa martillasqatam rurachinki. Chaykunata tocachiptikim runakuna huñunakunqaku, tocachinkitaqmi campamentomanta lloqsinankupaqpas.

³ Iskayninta tocachiptikim qampa ñawpaqnikiman runakuna huñunakamunqaku asuykuwanaykichik karpapa punkunman.

⁴ Hukllanta tocachiptikiñataqmi qayllaykiman huñunakamunqaku llapa ayllukunapa jefenkuna otaq Israel casta waranqantin runakunapa jefenkuna.

⁵ Guerrapaq hina iskaynin cornetillakunata tocarachiptikiñataqmi intipa qespimunan lawpi samaqkuna campamentomanta lloqsinqaku.

⁶ Iskay kutikama guerrapaq hina tocarachiptikiñataqmi surlawpi samaqkuna campamentomanta lloqsinqaku. Chaynaqa lloqsinankupaqmá guerrapaq hina tocanqaku.

⁷ Runakunalla huñunakunanpaq tocaptinkuqa manam guerrapaq hinachu kanqa.

⁸ Chay cornetillakunataqa tocanqaku Aaronpa churin sacerdotekunam. Kayqa wiñaypaq decreton qamkunapaq chaynataq miraynikichikkunapaqpas.

⁹ —Nacionnikichikpi kachkaptikichik ñakarichisuqnikichik enemigo contraykichikpi hamuptinqa peleaq lloqsispaykichikmi cornetillakunata guerrapaq hina tocankichik chaynapim yupaychasqaykichik ñoqa Tayta Diosqa mana qonqarusqaykichikchu hinaspam enemigoykichikmantapas salvasqaykichik.

¹⁰ Chaymantapas cornetillakunataqa tocankichiktaqmi kusikunaykichik punchawkunapi, fiestakunapi hinaspa mosoq killakunapi. Tocankichiktaqmi lliw kañana ofrendata presentawaspaykichikpas chaynataq ñoqawan allinlla kasqaykichikmanta ofrendata ofrecewaspaykichikpas chaynapim qamkunataqa ñoqa Diosnikichik mana qonqasqaykichikchu. Ñoqaqa kani yupaychasqaykichik Tayta Diosmi.

Sinai sutiyoq chunniqmanta lloqsisqankumanta

¹¹ Iskay kaq watamanña yaykuchkaptinkum chay watapa iskay kaq killanpi hinaspa chay killapa iskay chunka kaq punchawninpi puyu hoqorarikururqa Chunkantin Kamachikuy waqaychana karpamanta.

¹² Sinai sutiyoq chunniqmanta Israelpa mirayninkuna lloqsiruptinkum chay puyu sayarurqa Paran sutiyoq chunniqpi.

¹³ Chaymi chayraq lloqsirqaku imaynam Moisesman Tayta Diospa kamachisqanpi hina.

¹⁴ Puntatam lloqsirqaku Juda sutiyoq campamentopa banderan qatiq tropakuna. Chay tropakunapa kamachiqninqa karqa Aminadabpa churin Naasonmi.

¹⁵ Isacar ayllu tropakunapa kamachiqninñataqmi karqa Zuarpa churin Natanael.

¹⁶ Zabulon ayllu tropakunapa kamachiqninñataqmi karqa Helonpa churin Eliab.

¹⁷ Diospa *f**yachanan karpata paskaruptinkum Gersonpa hinaspa Meraripa mirayninkuna lloqsirqaku chay karpapa kaqninkunata apaspanku.

¹⁸ Chaymantañataqmi lloqsirqaku Ruben sutiyoq campamentopa banderan qatiq tropakuna. Paykunapa kamachiqninqa karqa Sedeurpa churin Elisurmi.

¹⁹ Simeon ayllu tropakunapa kamachiqninñataqmi karqa Zurisadaipa churin Selumiel.

²⁰ Gad ayllu tropakunapa kamachiqninñataqmi karqa Deuelpa churin Eliasaf.

²¹ Chaymantañataqmi Coat casta runakuna lloqsirqaku Diospaq sapaqchasqa kaqkunata apastin, samasqanku sitioman chayaspaqa karpatam sayachisqataña tariqku.

²² Chaymantañataqmi lloqsirqaku Efrain sutiyoq campamentopa banderan qatiq tropakuna. Paykunapa kamachiqninqa karqa Amiudpa churin Elisamam.

²³ Manases ayllu tropakunapa kamachiqninñataqmi karqa Pedasurpa churin Gamaliel.

²⁴ Benjamin ayllu tropakunapa kamachiqninñataqmi karqa Gedeonipa churin Abidan.

²⁵ Chaymantañataqmi lloqsirqaku Dan sutiyoq campamentopa banderan qatiq tropakuna. Paykunaqa rirqa llapallan campamentokunapa qepantam. Paykunapa kamachiqninqa karqa Amisadaipa churin Ahiezermi.

²⁶ Aser ayllu tropakunapa kamachiqninñataqmi karqa Ocranpa churin Pagiel.

²⁷ Neftaliy ayllu tropakunapa kamachiqninñataqmi karqa Enanpa churin Ahira.

²⁸ Chayna formapimá Israelpa miraynin tropakunaqa sapa kuti lloqsirqaku.

Moisesmi cuñadonta rimapayan paykunawan rinanpaq

²⁹ Huk punchawmi suegron Reuelpa churin Madian casta Hobab sutiyoq runata Moises nirqa: —Tayta Diospa prometewasqanku allpamanmi richkaniku. Chaynaqa ñoqaykuwan riyta munaptikiqa favorecesqaykikum. Tayta Diosmi prometewarqaku Israel casta runakunataqa favorecewanankupaq —nispa.

³⁰ Hinaptinmi cuñadon Hobab nirqa: —Manam riymanchu, ñoqaqa aylluykunapa kasqanmanmi kutikusaq —nispa.

³¹ Hinaptinmi Moises nirqa: —Amayá saqeruwaykuchu, qamqariki reqsinkim chunniqpi maymi samanayku sitiokunatapas, qamqa ñawiyku hina reqsichiwaqniykuch kawaq.

³² Ñoqaykuwan riptikiqa favorecesqaykikum tukuy allin kaqkunata Tayta Dios qowaptinku —nispa.

³³ Chaynapim Tayta Diospa orqonmanta rirqaku kimsa punchaw puriyta, Tayta Diospa contrato baulnin apaqkunam paykunapa puntanta rirqaku samanankupaq sitiota maskastin.

³⁴ Campamentomanta lloqsiruptillankum Tayta Diospa puyun paykunapa hawanta rirqa.

³⁵ Diospa contraton baul apaqkuna lloqsiruptinmi Moises niq kaynata: Dios Taytalláy, hatariptikiyá enemigoykikunaqa cheqeruchunku. Cheqnisuqnikikunaqa qayllaykimantayá lluptichunku.

³⁶ Diospa contraton baul apaqkuna samaruptinñataqmi Moises niq kaynata: Dios Taytalláy, ñoqaykumanyá kutirikamuy. Mana yupay atina Israelpa mirayninkunamanyá kutirikamuy.