Números 1 - Quechua Ayacucho Bible 1987

Israelpa mirayninkuna Sinai chunniqpi yupasqa kasqankumanta

¹ Israelpa mirayninkuna Egipto nacionmanta lloqsiruspa iskay watamanña yaykuchkaptinkum chay watapa iskay kaq killapa qallariynin punchawpi Moiseswan Tayta Dios rimarqa. Sinai sutiyoq chunniqpim asuykuna karpapi kaynata nirqa:

² —Israelpa llapallan mirayninkunatam yupankichik familiankunaman hina hinaspa abuelonkupa castanman hina. Haykam qarikuna kasqanman hinam llapallanta yupankichik.

³ Qanwan Aaronmi yupankichik iskay chunka watayoqmanta hanayman guerrapi peleanankupaq hina kaqkunata.

⁴ Sapa ayllumantam huk familiapa jefen yupaysisunkichik.

⁵ Chay yupaysisuqnikichik jefekunaqa kanqa kaykunamá: Ruben ayllumantam kanqa Sedeurpa churin Elisur.

⁶ Simeon ayllumantam kanqa Zurisadaipa churin Selumiel.

⁷ Juda ayllumantam kanqa Aminadabpa churin Naason.

⁸ Isacar ayllumantam kanqa Zuarpa churin Natanael.

⁹ Zabulon ayllumantam kanqa Helonpa churin Eliab.

¹⁰ Joseypa mirayninmantañataqmi kanqa Efrain casta Amiudpa churin Elisama. Manases castamantañataqmi kanqa Pedasurpa churin Gamaliel.

¹¹ Benjamin ayllumantam kanqa Gedeonipa churin Abidan.

¹² Dan ayllumantam kanqa Amisadaipa churin Ahiezer.

¹³ Aser ayllumantam kanqa Ocranpa churin Pagiel.

¹⁴ Gad ayllumantam kanqa Deuelpa churin Eliasaf.

¹⁵ Neftaliy ayllumantam kanqa Enanpa churin Ahira.

¹⁶ Kaykunamá karqaku Israel ayllukunamanta huñunasqa runakunapa akllasqan jefekuna. Paykunaqa karqaku Israelpa mirayninmanta waranqantin runapa kamachiqninkunam.

¹⁷ Diospa nombrasqan chay qarikunatamá, Moiseswan Aaron huñurqaku yupaysinankupaq.

¹⁸ Chaymi huñurqaku Israelpa llapallan mirayninkunata iskay kaq killapa qallariynin punchawpi. Chaynaqa llapa runakunamá listachikurqaku familiankuman hina hinaspa abuelonkupa castanman hina. Qarikunam iskay chunka watayoqmanta hanayman sutin-sutin listachikurqaku haykam kasqankuman hina.

¹⁹ Tayta Diospa kamachisqanman hinamá Moises yuparqa paykunata Sinai sutiyoq chunniqpi.

^20-21 Paykunaqa yupasqa karqa familiankuman, castankuman hinaspa ayllunkuman hinam. Sapakamapa sutinkuta listaruspam qarikunata iskay chunka watayoqmanta hanayman yuparqaku, paykunaqa guerraman lloqsinankupaqpas listom karqaku: Ruben ayllumanta yupasqakunam karqa tawa chunka soqtayoq waranqa pichqa pachaknin runakuna.

^22-23 Simeon ayllumanta yupasqakunam karqa pichqa chunka isqonniyoq waranqa kimsa pachaknin runakuna.

^24-25 Gad ayllumanta yupasqakunam karqa tawa chunka pichqayoq waranqa soqta pachak pichqa chunkan runakuna.

^26-27 Juda ayllumanta yupasqakunam karqa qanchis chunka tawayoq waranqa soqta pachaknin runakuna.

^28-29 Isacar ayllumanta yupasqakunam karqa pichqa chunka tawayoq waranqa soqta pachaknin runakuna.

^30-31 Zabulon ayllumanta yupasqakunam karqa pichqa chunka qanchisniyoq waranqa tawa pachaknin runakuna.

^32-33 Joseypa churinkunam karqa Efrainwan Manases. Efrain castamanta yupasqakunam karqa tawa chunka waranqa pichqa pachaknin runakuna.

^34-35 Manases castamanta yupasqakunam karqa kimsa chunka iskayniyoq waranqa iskay pachaknin runakuna.

^36-37 Benjamin ayllumanta yupasqakunam karqa kimsa chunka pichqayoq waranqa tawa pachaknin runakuna.

^38-39 Dan ayllumanta yupasqakunam karqa soqta chunka iskayniyoq waranqa qanchis pachaknin runakuna.

^40-41 Aser ayllumanta yupasqakunam karqa tawa chunka kimsayoq waranqa tawa pachaknin runakuna.

^42-43 Neftaliy ayllumanta yupasqakunam karqa pichqa chunka kimsayoq waranqa tawa pachaknin runakuna.

⁴⁴ Chay llapallan runakunamá yupasqa karqaku. Chay yupaqkunaqariki karqa Moiseswan Aaronmi chaynataq Israel ayllukunapa chunka iskaynintin jefekunam.

⁴⁵ Castankuman hina Israelpa mirayninkunata guerrapi peleanankupaq hina iskay chunka watayoqmanta hanayman yuparuptinkum

⁴⁶ llapallan karqaku soqta pachak kimsayoq waranqa pichqa pachak pichqa chunkan runakuna.

Leviy ayllu akllasqa kasqanmanta

⁴⁷ Israel wakin ayllukunawan kuskaqa manam yupasqachu karqa Leviy aylluqa.

⁴⁸ Tayta Diosmi Moisesta nirqa:

⁴⁹ —Israel ayllukunata yupaspaykiqa amam Leviy ayllutaqa yupankichu.

⁵⁰ Paykunataqa churanki Chunkantin Kamachikuyniykuna waqaychana carpamanta cuentallikunanpaqmi chaynataq servicionkunamantapas hinaspa tukuy imankunamantapas cuentallikunanpaqmi. Paykunam apanqaku *f**yachanay karpataqa llapallan servicionkunatawan hinaspam nanachikunqaku. Karpapa muyuriqninpitaqmi paykunaqa samanqaku.

⁵¹ Lloqsinaykichikña kaptinqa Leviy casta runakunam chay karpata paskanqaku, samaruptikichikñataqmi hina paykunataq chay karpata huktawan sayachinqaku. Pipas Leviy ayllumanta mana kachkaspan karpaman asuykuq runaqa wañuchisqam kanqa.

⁵² Israelpa wakin mirayninqa sapakamam samanqaku maymi campamentonkupi. Paykunaqa tropakuna hinam maymi banderankupa kasqanpi samanqaku.

⁵³ Leviy aylluqa samanqa Chunkantin Kamachikuyniy waqaychana karpapa muyuriqninpim, chaynapim ñoqa Tayta Diosqa mana piñakusaqchu Israel casta runakunapa contranpiqa. Chaynaqa Leviy ayllu runakunamá nanachikunqaku Chunkantin Kamachikuyniy waqaychana karpamantaqa.

⁵⁴ Moisesman Tayta Diospa tukuy kamachisqanta hinam Israelpa mirayninkuna rurarqaku.