Nahúm 3 - Quechua Ayacucho Bible 1987

¹ Yaw runa wañuchiq llaqta ¿imallapiraq qamqa rikukunki? Llullakunapa huntaykusqanmi kachkanki. Qechusqaykikunapa huntaykusqanmi kachkanki. Wañuchisqaykikunapa huntaykusqanmi kachkanki.

² Uyarikamuchkanñam latigokunapa toqyasqanpas chaynataq ruedakunapa qerichichisqanpas. Uyarikamuchkanñam caballokunapa kallpamusqanpas chaynataq carretakunapa pawatyamusqanpas.

³ Sillada tropakunapas pawaypaqmi-pawamuchkanku. Espadankupas chipityaypaqmi-chipityamuchkanku. Lanzankupas llipyaypaqmi llipyamuchkan. Nana-nanaq runakunam wañuypaqña-wañullachkan. Monto-montonmi wañuqkunaqa chutarayachkan. Manaña tukuymi wañuqkunaqa kachkanku. Kawsaqkunapas wañuqkunapim haytakuchkanku.

⁴ Chaykunaqa pasakunqa chuchumika warmi hina llumpa-llumpay huchallikusqanmantam. Payqariki sumaqllaña chuchumika warmi hinam, imaymana brujeriakunapas ruraq warmi hinam. Payqariki hukwan hukwan kakuspam nacionkunatapas aysaypaq-aysarqa. Payqariki brujeriakunata ruraspam runakunatapas aysaypaq-aysarqa.

⁵ Llapallan Kamachiq Tayta Diosmi nin: Qampa contraykipim kachkani ñoqaqariki. Warmipa walintapas uyankama qempiruchkaq hinam qamtaqa penqayman churarusqayki. Nacionkunapas qalallataña qawasunaykipaqmi chaynataqa rurarusqayki. Gobiernokunapas penqaypaqña qawasunaykipaqmi chaynataqa rurarusqayki.

⁶ Qanmanqa qacha kaqkunatam wischuykusqayki. Qamtaqa penqaypaq warmita hinañam rurarusqayki. Qamtaqa runapa qawakunantañam rurarusqayki.

⁷ Lliw rikusuqnikikunapas ayqekuspam ninqa: “Ñam purmachisqaña kachkan Ninive llaqtaqa. ¿Pillapas llakirikunmanchum paymantaqa? ¿Maypitaq tarimuyman consuelaqnintaqa?”

⁸ Qamqa Tebas llaqtamantapas ¿aswan allinraqchum kanki? Nilo Mayupa patanpim karqa chay llaqtaqariki. Yakukunapa muyuykusqanmi karqa chay llaqtaqariki. Nilo sutiyoq mayum karqa chay llaqtapa murallanqa.

⁹ Cus nacionniyoq runakunam mana tukuyta kallpancharqa. Egipto nacionniyoq runakunam mana tukuyta kallpancharqa. Yanaparqataqmi Fut runakunapas. Yanaparqataqmi Libia runakunapas.

¹⁰ Chaywanpas Tebas llaqtapi *f**yachaqkunaqa presochasqam karqaku Chaywanpas Tebas llaqtapi *f**yachaqkunaqa preso pusasqam karqaku. Wawa-churinkupas callekunapa esquinanpi sapo hina choqasqam karqaku. Ancha reqsisqa runankunapaqpas suertetam choqarqaku. Llapallan kamachikuq runakunapas cadenakunawan watasqam karqaku.

¹¹ Yaw Ninive llaqta, qampas sinka hina castigasqam kanki. Pakakuchkaq hinam pakaypaq-pakakunki. Enemigoykikunaraykum pakakunaykita maskanki.

¹² Llapallan amparakuna wasikichikpas rikchakun higos sachakunamanmi. Puntallaraq ruruyoq higos sachamanmi rikchakun lliw amparakuna wasikichikqa. Chay sachataqa pipas taspiykuptinmi simillanmanña wichiykamun chay rurunkunaqa. Chaynapunim vencesqa kaspa facillata wichiykunqa amparakuna wasikichikqa.

¹³ Warmikuna hina manchakuqllañam kachkan tropaykichikkunaqa. Nacionnikipi kaq punkukunapas kichakuykunqam enemigoykikunamanqa. Nacionnikipi kaq punkukunapa cerrojonkunatapas ninam kañarunqa.

¹⁴ Qamqa yakutayá alistakuy muyuykusuptiki tomanaykipaq. Amparakuna wasitayá allichay enemigomanta amparasunaykipaq. Mituman yaykuspayá allinneqta saruychik. Ladrillo ruranaykichiktayá hapiychik.

¹⁵ Chaypim qamtaqa nina ruparusunki. Chaypim qamtaqa espada tukurusunki. Manaraq raprayoq aqarway uru hinam tukurusunkichik. Manaraq raprayoq aqarway uru hinayá miraychik. Puyu hinaña aqarway uru hinayá miraychik.

¹⁶ Cielokunapi lucerokunatapas hinaraqmi mirarachinkichik negociantekichikkunatapas. Aqarway urukuna hina tukurususpaykichikmi pawakunqaku nacionnikichikmantapas.

¹⁷ Llaqtapi kamachikuqkunapas kachkan aqarway urukuna hinañam. Tropaykikuna huñuq jefekunapas kachkan puyu hina aqarway urukuna hinañam. Chay aqarway urukunaqa chiriykamuptinmi perqakunapiña tiyaykunku. Ichaqa inti qespiramuptinmi mana musyayllata lluptikunku.

¹⁸ Yaw Asiria nacionpa reynin, yanapaqniki kamachiqkunam puñukuchkankuña. Ancha reqsisqa runaykikunam samakuchkankuña. Tropaykikunaqa orqokunapim cheqerun. Paykunaqa mana huñuy atinañam cheqerun.

¹⁹ Manam imapas kanchu nanayniki samaykachiqqa. Mana hampiy atinañam kachkan heridaykiqa. Imam pasarususqaykimanta uyariqkunam kusikuymanta taqllakunqa. ¿Pimantaq mana chayarqachu chay pasaypaq mana allinkuna rurasqaykiqa?