Miqueas 2 - Quechua Ayacucho Bible 1987

Wakchakuna ñakarichiqkunamanta

¹ ¡Imallapiraq rikukunqaku mana allinkuna tanteaqkunaqa! ¡Imallapiraq rikukunqaku camankupipas mana allinkuna piensaqkunaqa! Paykunaqa chay tuta achikyaruptinmi chay piensasqankuman hina ruranku. Kallpayoq kasqankuraykum chaynata ruranku.

² Paykunaqa pipa chakrantapas munaruspam qechuypaq-qechurunku. Paykunaqa pipa wasintapas munaruspam hapiypaq-hapikuykunku. Paykunaqa pitapas ñakarichinmi wasillantapas apakunankupaq. Paykunaqa pitapas ñakarichinmi chakrallantapas hapikuykunankupaq.

³ Chayraykum Tayta Dios nin kaynata: Ñoqapas qamkunapa contraykichikpim piensachkani mana allinta. Chay castigo rurasqaymantaqa manam librakuyta atinkichikchu. Purinkichikpas manam hatunchakuspañachu.

⁴ Chay tiempoqa kanqa manam allin tiempoñachu. Chay tiempopiqa watuchimanta hinam qamkunamanta rimakusunkichik. Chay tiempopiqa kaynata nispam qamkunamanta llakipayasunkichik: “Pasaypaq purmachisqañam kachkanchik ñoqanchikqa. Llaqtamasinchikpa tocanciantaqa cambiarunñam Diosqa. ¿Imaynataq payqa yanapawachwan partiparusqan chakranchikta kutichipuwananchikpaqqa?”

⁵ Chayraykum Tayta Diospa runankuna ukupiqa manaña pipas kanqachu partesuqnikichikqa.

Diosmanta willakuq tukuqkunamanta

⁶ Diosmanta willakuq tukuqkunam ninku: Amayá yanqaqa willakuychikchu. Amayá kaykunamantaqa willakuychikchu. Manam ima mana allinpas pasawasunchu —nispa.

⁷ Jacobpa castankunaqa yaqachum kaynata ninmanku: ¿Tayta Diospa espiritunqa piñasqachum kachkan? ¿Yaqachum payqa chaynakunata rurachkan? —nispa. Tayta Diosñataqmi paykunata nin: Palabraykunaqa ¿manachum allinta ruran allin kawsakuqkunataqa?

⁸ Qayna punchaw runaykuna kaqmi enemigo hinaña rikurirunkichik. Guerramanta kutimuqkuna hawkalla pasachkaptinmi sumaq capallanta qechurunkichik.

⁹ Runaykunapa warmillankunatapas kuyasqanku wasillankumantam qarqorunkichik. Wawallankunapa sumaq kaynintam qamkunaqa wiñaypaqña qechurunkichik.

¹⁰ Hatarispayá pasakuychikña kaymantaqa. Manam pipas samanmanchu kay sitiopiqa. Kay sitioqariki millakuypaq rurasqañam kachkan. Kay sitioqa manchakuypaq purmachisqañam kachkan.

¹¹ Sichum huk runa hamuspan llullakuspan kaynata ninman: “Vinopas, poqosqa aqapas mana pisinanmantam ñoqaqa willasqaykichik.” Chayna willakuqtam qamkunaqa merecenkichik.

Runankunata Dios librananmanta

¹² Jacobpa castankuna, cheqaptapunim lliwchaykichikta huñumusqaykichik. Israelpa castankuna, cheqaptapunim puchuqkunata huñumusqaykichik. Ovejakunata kanchaman huñuchkaq hinam ñoqaqa hoqarimusqaykichik. Michimuna sitiopi kaq ovejakunata hinam qamkunataqa huñumusqaykichik. Nana-nanaq runakunata hinam, qamkunataqa huñumusqaykichik.

¹³ Ñanninku kichaqmi lloqsinqa ñawpaqnintaraq. Punkutapas pakipastinmi lloqsinqaku chaynintaraq. Ñawpaqninkutam paykunapa reyninku rinqa. Paykunapa ñawpaqnintañataqmi Tayta Dios rinqa.