Mateo 8 - Quechua Ayacucho Bible 1987

Leprawan onqoq runata Jesus sanoyachisqanmanta

¹ Orqopa waqtanmanta Jesus uraykamuptinmi achka runakuna qatimurqaku.

² Hinaptinmi Jesusman asuykurqa *f**leprawan onqoq runa hinaspam qonqorakuykuspan nirqa: —Señorlláy, munaspaykiqa allinyaykachillawayá —nispa.

³ Hinaptinmi Jesus llapchaykuspan nirqa: —Arí, munanim, allinyayña —nispa. Hinaptinmi chaypunilla chay lepra onqoynin chinkarurqa.

⁴ Chaymi Jesus nirqa: —Amam pimanpas willankichu aswanqa riyá *f**sacerdoteman chaynapi paywan qawachikamunaykipaq. Sanoña kasqaykita yachanankupaqmi ofrendata qonki Moisespa kamachisqanman hina —nispa.

Capitanpa sirviententa Jesus sanoyachisqanmanta

⁵ Capernaum llaqtaman Jesus chayaruptinmi soldadokunapa capitannin asuykuspan kaynata ruegakurqa:

⁶ —Señorlláy, sirvienteymi suchuyaruspan wasiypi llumpayta ñakarichkan —nispa.

⁷ Chaymi Jesus nirqa: —Rispayá allinyarachimusaq —nispa.

⁸ Hinaptinmi capitanñataq nirqa: —Señorlláy, pipaman hinaraqtaq wasiymanqa yaykuykuwaq, rimariykuptillaykim sirvienteyqa allinyarunqa.

⁹ Ñoqapas kamachiwaqniykunatam kasukuni, soldadoykunapas kamachiptiyqa kasuwantaqmi. Hukninta: “Riy” niptinmi rin, huknintañataq: “Hamuy” niptiymi hamun, sirvienteypas: “Kayta ruray” niptiyqa rurantaqmi.

¹⁰ Chayna nisqanwan Jesus admirakuspam qatiqninkunata nirqa: —Cheqaptapunim nikichik, *f**Israel runakunapipas manam kayna iñiyniyoq runataqa tarirqanichu.

¹¹ Nikichiktaqmi, achkaqmi hamunqaku tukuy hinastinmanta hinaspam Abrahanwan, Isaacwan hinaspa Jacobwan mikunankupaq tiyaykunqaku Diospa munaychakusqanpi.

¹² Hinaptinmi “Diospa munaychakusqanpaqñam kani” niqkunapas tutayaypa kasqanman wischusqa kaspanku chaypi waqanqaku hinaspa kirunkuta kirichichichinqaku.

¹³ Capitantañataqmi Jesus nirqa: —Kutikuyña, iñisqaykiman hinayá rurasqa kachun —nispa. Chay sirvientenmi chay horalla sanoyarurqa.

Pedropa suegranta Jesus sanoyachisqanmanta

¹⁴ Pedropa wasinta Jesus rispanmi chaypi tariykurqa Pedropa suegran camapi calenturawan kachkaqta.

¹⁵ Chaymi makinta llapchaykuptillan calentura chinkarurqa hinaptinmi hatariruspan paykunata atienderqa.

Achka onqoqkunata Jesus sanoyachisqanmanta

¹⁶ Tutayaruptinmi Jesusman pusamurqaku demoniokunapa ñakarichisqan achka runakunata hinaptinmi rimarispallan chay demoniokunata qarqorqa, sanoyachirqataqmi onqoqkunatapas.

¹⁷ Chaynapim cumplikurqa Diosmanta willakuq Isaiaspa kayna nisqan: “Paymi nanayninchikwan ñakarirqa onqoyninchikkunatapas apaspa.”

Jesusta qatiy munaqkunamanta

¹⁸ Jesusmi achkallaña runakuna muyuriqninpi kasqanta qawaykuspa, kamachirqa discipulonkunata lamar qochapa chimpanman pasanankupaq.

¹⁹ Hinaptinmi Jesusman asuykuspa Diospa leynin yachachiq nirqa: —Yachachikuq, maytaña riptikipas qatisqaykim —nispa.

²⁰ Jesusñataqmi nirqa: —Kanmi atoqkunapa uchkun, kantaqmi alton pawaq urpikunapapas *f**qesan, *f**Diosmanta Hamuq Runapaqmi ichaqa mana kapuwanchu maypim puñuykunaypas —nispa.

²¹ Huknin puriqmasinñataqmi nirqa: —Señorlláy, qanwanmi risaq ichaqa dejaykuwayraq taytay wañukuptin pamparamunaykama —nispa.

²² Chaymi Jesusñataq nirqa: —Qatiwaypuni, Diospaq wañusqakunayá wañuqkunataqa pampachunku —nispa.

Wayratawan lamar qochata Jesus hawkayachisqanmanta

²³ Jesus boteman yaykuruptinmi discipulonkunapas qatirqaku.

²⁴ Richkaptinkum qochapi nisyu-nisyu wayrawan *f**olakuna hatariramuspan botetapas yaqaña taparurqa, Jesusñataqmi puñuchkarqa.

²⁵ Hinaptinmi discipulonkuna asuykuspa rikchachirqaku: —¡Señorlláy, salvawayku, chinkaykuchkanchikñam! —nispa.

²⁶ Chaymi payñataq nirqa: —¿Imanasqataq manchakunkichik, pisi iñiyniyoq runakuna? —nispa. Hatariykuspataqmi qaqcharqa wayratawan lamar qochata hinaptinmi lliw hawkayarurqa.

²⁷ Runakunañataqmi admirakurqaku: —¿Ima runataq kayqa? Paytaqa wayrapas, lamar qochapas kasuqmi kasqa —nispa.

Demoniokunapa ñakarichisqan runakunamanta

²⁸ Lamar qochapa waklawnin Gadara llaqtaman Jesus chayaruptinmi panteonmanta iskay runakuna payman hamurqa, iskayninkum karqa demoniopa ñakarichisqan manchakuypaq runakuna chaymi mana pipas chay ñannintaqa pasayta atiqkuchu.

²⁹ Paykunam qaparirqaku: —¿Imatataq ñoqaykuwan munanki Diospa Churin Jesus? ¿Manaraq tiempopichu hamurqanki ñakarichiqniyku? —nispa.

³⁰ Waklawneqpim mikuchkarqa achkallaña kuchikuna.

³¹ Chaymi demoniokuna ruegakurqa Jesusta: —Qarqowaspaykikuqa dejaykuwaykuyá wak kuchikunaman yaykunaykupaq —nispa.

³² Hinaptinmi Jesus nirqa: —Pasaychikyá —nispan. Chaymi demoniokunaqa runakunamanta lloqsiruspa kuchikunaman ustururqa. Chay llapallan kuchikunam waqtanta kallpaspa qochaman wichiykuspa wañururqaku.

³³ Kuchi michiqkunañataqmi llaqtaman ayqekuspanku willakurqaku demoniopa ñakarichisqan runakunawan imam pasakusqanta.

³⁴ Chaymi chay llaqtapi *f**yachaq llapallan runakuna hamurqaku Jesusman hinaspankum ruegakurqaku llaqtankumanta huklawman pasakunanpaq.