Mateo 7 - Quechua Ayacucho Bible 1987

Pitapas ama kaminamanta

¹ —Amayá runamasikichiktaqa kamiychikchu chaynapi Dios mana juzgasunaykichikpaq.

² Mana allin rimasqaykichikman hinam Diospas juzgasunkichik. Imaynam rurasqaykichikman hinataqmi Diospas qankunawan ruranqa.

³ Wawqekipa ñawinpi qopata rikuruchkaspaqa ¿imanasqamá manaqa rikunkichu ñawikipi kaspitaqa?

⁴ Ñawikipi kaspi kachkaptinqa ¿imaynataq niwaq wawqekitaqa: “Ñawikipi qopata horqorusqayki” nispaqa?

⁵ ¡Allin tukuq runa! Puntataqa ñawikipi kaspitaraqyá horqokuruy chaynapi allinta qawaspa runamasikipa ñawinmanta qopata horqonaykipaq.

⁶ —Diospa kaqninkunataqa amam qonkichikchu allqokunaman, yanqam kutiriykuspa llikiparusunkichikman. *f**Perlaskunatapas amataqmi qonkichikchu kuchikunamanqa, yanqam sarutyarunman.

Mañakusqanchikqa uyarisqa kasqanmanta

⁷ —Mañakuptikichikqa Diosmi qosunkichik. Maskaychik, tarinkichikmi, qayaychik, kichasunkichikmi.

⁸ Mañakuqqa chaskinmi, maskaqqa tarinmi, qayakuqqa kichaykachikunmi.

⁹ —Churikichikmanqa ¿yaqachum rumita qoykuwaqchik tantata mañakusuptikichik

¹⁰ otaq culebrata challwata mañakusuptikichik?

¹¹ Qamkunaqa mana allin runakuna kachkaspam churikichikmanqa allin kaqkunata qonkichik ¿chaychu mañakuqkunamanqa hanaq pachapi kaq Taytaykichik mana qosunkichikman allin kaqkunata?

¹² —Chaynaqa runamasikichik qamkunapaq allin kaqkuna rurananta munaspaqa qamkunapas paykunapaqyá allin kaqkunata ruraychik. Chaynatam Biblia kamachiwanchik.

Kichki punkumanta

¹³ —Kichki punkuntayá yaykuychikqa, hatun punkunta hinaspa hatun ñannintaqa richkanku infiernomanmi, chaynintaqa achkallañam richkanku.

¹⁴ Kichki punkunta hinaspa kichki ñannintaqa richkanku wiñay kawsaymanmi, aschallam chaynintaqa richkanku.

Sachataqa rurunpi reqsinamanta

¹⁵ —Cuidakuychik “Diosmantam willakuchkani” niq llulla runakunamanta. Paykunaqa oveja hina rikchayniyoq hamuspapas sonqonkupiqa kachkan suwa atoqkuna hinam.

¹⁶ Qamkunaqa sachata hinam rurunpi reqsinkichik. Manam uvastaqa pallachwanchu itanamantaqa nitaqmi higostapas pallachwanchu cardo-santomantaqa.

¹⁷ Allin sachaqa allintam rurun, mana allin sacham ichaqa rurun mana allinllata.

¹⁸ Allin sachaqa manam mana allintaqa rurunmanchu nitaqmi mana valeq sachapas rurunmanchu allin rurutaqa.

¹⁹ Chusu ruruyoq mana valeq sachakunataqa yantaspam kañana.

²⁰ Chaynaqa rurunpimá pitapas reqsinkichik.

Pikunam Diospa munaychakusqanman yaykunanmanta

²¹ —Manam: “¡Señorlláy, Señorlláy!” nispa llapallan niwaqniykunachu Diospa munaychakusqanmanqa yaykunqa aswanqa hanaq pachapi kaq Taytaypa munasqan ruraqllam.

²² Juicio punchaw chayaramuptinqa achkallañam niwanqaku: “Señorlláy, Señorlláy, ñoqaykuqa qamraykum willakurqaniku, qamraykum demoniokunata qarqorqaniku, qamraykutaqmi achka *f**milagrokunatapas rurarqaniku” nispa.

²³ Hinaptinmi nisaq: “Manam reqsikichikchu. ¡Qayllaymanta asuychik mana allin ruraqkuna!” nispa.

Iskay rikchaq cimientomanta

²⁴ —Nisqaykunata uyarispan ruraqqa taqra rumipa hawanpi wasichakuq allin yachayniyoq runamanmi rikchakun.

²⁵ Para chayaramuptinmi lloqlla huntaramurqa, nisyu wayram pukumurqa wasiman ichaqa manam tuñirqachu taqra rumipi cimientasqa kasqanrayku.

²⁶ Nisqayta uyarichkaspan mana kasukuqmi ichaqa rikchakun aqopa hawanpi wasichakuq mana umayoq runaman.

²⁷ Para chayaramuptinmi lloqlla huntaramurqa, nisyu wayram pukumurqa wasiman chaymi tuñirurqa pasaypaqta.

²⁸ Rimayta Jesus tukuruptinmi runakuna admirasqallaña karqaku yachachikuyninkunawan.

²⁹ Atiywanmi yachachirqa, manam Diospa leynin yachachiqkuna hinallachu.