Mateo 4 - Quechua Ayacucho Bible 1987

Jesusta diablo tentasqanmanta

¹ Hinaptinmi Jesusta Espiritu pusarurqa purunman diablo payta tentananpaq.

² Chaypim karqa tawa chunka punchaw tawa chunka tuta mana mikusqa, chaymantañam yarqarurqa.

³ Hinaptinmi Jesusta tentananpaq diablo asuykuspan nirqa: —Diospa Churin kaspaykiqa kay rumikunatayá kamachiy tantayarunanpaq —nispa.

⁴ Hinaptinmi Jesus nirqa: —Bibliam nin: “Runaqa kawsanqa manam mikuyllawanchu aswanqa Diospa llapa rimasqankunawanmi” nispa.

⁵ Hinaptinmi diablo pusarurqa Jerusalen chuya llaqtaman hinaspam templopa hawanpi sayaykachispan

⁶ nirqa: —Diospa Churin kaspaykiqa kaymanta pawaykuy. Bibliam nin: “Qamraykum Dios kamachinqa angleninkunata. Paykunam hapisunki rumiman chakikita mana takarunaykipaq.”

⁷ Jesusñataqmi nirqa: —Bibliapiqa nichkantaqmi: “Amam pruebamanqa churankichu Señor Diosnikitaqa” nispa.

⁸ Yapatawanmi diablo pusarurqa alto-alto orqopa puntanman hinaspam qawachirqa kay pachapi llapallan nacionkunata, qawachirqataqmi chay nacionkunapa sumaq kaynintapas.

⁹ Hinaspam nirqa: —Tukuy kaykunatam qosqayki qonqorakuykuspa adorawaptikiqa —nispa.

¹⁰ Hinaptinmi Jesus nirqa: —Pasaway kaymanta *f**Satanas, Bibliam nin: “Señor Diosllaykitam adoranki, payllatataqmi servinkipas” —nispa.

¹¹ Chaymi Jesusta diablo saqerurqa, angelkuna hamuruspanmi payta yanaparqa.

Galilea lawpi Jesus willaykuy qallarisqanmanta

¹² Juan carcelpi kasqanta Jesus yacharuspanmi pasakurqa Galilea lawman.

¹³ Nazaret llaqtamanta lloqsiruspanñataqmi qochapa patan Capernaum llaqtapi *f**yacharqa, chay llaqtaqa kachkan Zabulon hinaspa Neftaliy lawpim.

¹⁴ Pasakurqaqa Diosmanta willakuq Isaiaspa qellqasqan cumplikunanpaqmi,

¹⁵ paymi nirqa: Jordan Mayupa waklawninpi, lamar qochapa hichpan ñanpi, Zabulonpapiwan Neftaliypa allpanpim, Dios mana reqsiq runakunapa Galilea allpanpim kayna sucedekunqa:

¹⁶ Tutayaypi kawsaqkunam hatun achkiyta rikururqa, llumpay tutayaypi *f**yachaqkunamanmi achikyaykamurqa.

¹⁷ Chaymantam Jesus qallarirqa willakuyta: —Wanakuychik huchaykichikmanta, Diospa munaychakunanmi hichparamunña —nispa.

Challwirukunata Jesus qayasqanmanta

¹⁸ Galilea qochapa patanta richkaspam Jesus rikururqa Pedrowan sutichasqa Simonta wawqen Andrestawan, paykunam challwiru kasqankurayku challwachkarqaku atarrayawan.

¹⁹ Paykunatam Jesus nirqa: —Qatiwaychik, challwachkaq hina runakunataña huñunaykichikpaqmi atiyta qosqaykichik —nispa.

²⁰ Chaynata niykuptillanmi atarrayankuta saqeruspa Jesuswan pasarqaku.

²¹ Waklawniqpiñataqmi Jesus rikururqa Zebedeopa churin Jacobota hinaspa Juanta. Chay iskay wawqekunam taytan Zebedeopiwan botepi mallankuta allichachkarqaku chaymi Jesus paykunata qayarqa.

²² Hinaptinmi chaylla botetawan taytankuta saqeruspa Jesustaña qatikurqaku.

Achkallaña runakunata Jesus yachachisqanmanta

²³ Jesusmi purirqa lliw Galilea law llaqtakunapi, *f**huñunakunanku wasikunapi Diospa munaychakusqanmanta allin noticiata willakustin hinaspa tukuy rikchaq onqoyniyoqkunata sanoyachistin.

²⁴ Jesusmanta Siria lawpi llapallan kaqkuna yacharuspankum apamurqaku tukuy rikchaq onqoywan, nanaywan kaqkunata, demoniopa ñakarichisqankunata, wañuy mañayoqkunata hinaspa suchukunata, paykunatam Jesus sanoyachirqa.

²⁵ Achkallaña runakunam qatirqa Galilea lawmanta, Decapolis lawmanta, Jerusalen llaqtamanta, Judea lawmanta chaynataq Jordan Mayupa waklawninmantapas.