Mateo 27 - Quechua Ayacucho Bible 1987

Pilatopa qayllanman Jesusta pusasqankumanta

¹ Achikyaramuptinmi *f**sacerdotekunapa llapallan jefenkuna judiokunapa kamachiqninkunawan tanteanakurqaku Jesusta wañurachinankupaq.

² Chaymi chaqnasqata pusaspanku prefecto Pilatoman entregaykurqaku.

Judaspa warkukurusqanmanta

³ Traicionaq Judasñataqmi Jesusqa wañunanpaq sentenciasqa kasqanta qawaykuspan ñakakurqa chaymi chay kimsa chunka qollqeta kutiykachipurqa *f**sacerdotekunapa jefenkunaman hinaspa kamachikuqkunaman.

⁴ Paykunatam nirqa: —Huchallikurunim mana huchayoq runata wañuchinaykichikpaq qamkunaman *f**rantikuruspay —nispa. Chaymi paykunañataq nirqaku: —¿Imataq qokuwanku ñoqaykutaqa? ¡Chayqa qampa asuntoykim! —nispa.

⁵ Chaymi Judasñataq templopi qollqeta choqaruspan pasaspan warkukaramurqa.

⁶ *f**Sacerdotekunapa jefenkunañataqmi qollqeta hoqarimuspanku nirqaku: —Kay qollqetaqa manam ofrendakunamanqa hukllawachwanchu, kayqa yawarpa chaninmi —nispa.

⁷ Hinaspam tanteanakuruspanku chay qollqewan rantirurqaku manka ruraqpa allpanta forasterokunata pampanankupaq.

⁸ Chaymi kay libro qellqasqa kasqan punchawkama chay allpata sutichanku Yawar Chakrawan.

⁹ Chaynapim cumplikurqa Diosmanta willakuq Jeremiaspa nisqan, paymi nirqa: —Israel runakunapa precio churasqan kimsa chunka qollqetam hapirqaku

¹⁰ hinaspam chaywan rantirqaku manka ruraqpa allpanta, chaynataqa rurarqaku Señorpa kamachiwasqanman hinam —nispa.

Jesusta Pilato tapupayasqanmanta

¹¹ Pilatopa qayllanpi Jesus sayaykuptinmi tapurqa: —¿Qamchu kanki judiokunapa Reynin? —nispa. Chaymi Jesusñataq nirqa: —Arí, qampa nisqaykiman hinam —nispa.

¹² *f**Sacerdotekunapa jefenkunapiwan kamachikuqkunam Jesusta acusarqaku chaymi Jesusñataq mana imatapas nirqachu.

¹³ Chaymi Pilato nirqa: —¿Manachu uyarinki tukuy ima contraykipi nisqankuta? —nispa.

¹⁴ Jesus mana imatapas niptinmi prefectoñataq llumpayta admirakurqa.

Jesusta wañunanpaq sentenciasqankumanta

¹⁵ *f**Pascua Fiestapim watan-watan Pilato kachariq llapa runakunapa munasqan huk presota.

¹⁶ Chay tiempopim lliwpa reqsisqan Barrabas carcelpi kachkarqa.

¹⁷ Llapa runakuna huñunasqa kachkaptinmi Pilato tapurqa: —¿Mayqantataq munankichik kacharinayta? ¿Barrabastachu icha Cristowan sutichasqa Jesustachu? —nispa.

¹⁸ Chaynataqa tapurqa Jesustaqa envidiallamanta entregasqankuta yachaspanmi.

¹⁹ Pilato cortepi kachkaptinmi warmin willachimurqa: —Amam imanankipaschu chay allin ruraq runataqa. Chisim mosqoyniypi llumpaysuta ñakarirqani paypa causanpi —nispa.

²⁰ *f**Sacerdotekunapa jefenkunapiwan kamachikuqkunañataqmi yacharachirqa runakunata Barrabasta mañakunankupaq chaynapi Jesusñataq wañuchisqa kananpaq.

²¹ Prefecto Pilatom yapatawan tapurqa: —¿Mayqannintataq kacharinayta munankichik? —nispa. Chaymi paykunañataq nirqaku: —Barrabasta —nispa.

²² Pilatoñataqmi tapurqa: —Hinaptinqa ¿imatataq rurasaq Cristowan sutichasqa Jesustaqa? —nispa. Chaymi llapallanku nirqaku: —¡Chakatasqa kachun! —nispa.

²³ Hinaptinmi Pilato nirqa: —¿Ima mana allintañataq payqa rurarurqa? —nispa. Chaymi paykunañataq aswanraq qaparirqaku: —¡Chakatasqa kachun! —nispa.

²⁴ Hatun chaqwata qawaykuspanmi Pilato mana ima ruraytapas atirqachu. Chaymi yakuta aparachimuspan runakuna qawachkaptin makinta mayllakururqa hinaspam nirqa: —Manam huchayoqchu kasaq kay runapa wañusqanmantaqa, qamkunañayá imaynapas kakuychik —nispa.

²⁵ Hinaptinmi llapallan runakunañataq nirqaku: —¡Paypa wañusqanmantaqa ñoqaykum huchayoq kasaqku mirayniykupiwan! —nispa.

²⁶ Barrabasta Pilato kachaykachispanmi Jesustañataq azoteykachispa entregaykurqa chakatasqa kananpaq.

²⁷ Prefectopa soldadonkunam Jesusta palacioman pusaruspanku llapa tropata huñururqaku.

²⁸ Chaypi llatanaruspankum hinarachirqaku grosella pachawan.

²⁹ Umanmanñataqmi churachirqaku kichkamanta simpasqa coronata. *f**Alleq makinmanñataqmi hapichirqaku soqosta hinaspam ñawpaqninpi qonqorakuspanku burlakurqaku: —¡Kawsachun Judiokunapa Reynin! —nispa.

³⁰ Toqasparaqmi umanpi chay soqoswan waqtarqaku.

³¹ Chaynata asipayaruspankum horqorurqaku chay grosella pachata hinaspankum kikinpa pachanwan churarachispanku pusarqaku chakatanankupaq.

Jesus chakatasqa kasqanmanta

³² Chaymanta lloqsichkaspam tuparurqaku Cirene llaqtayoq Simonwan, payta hapiruspankum hombrochirqaku Jesuspa cruzninta.

³³ Chaynapim chayarurqaku Golgota Moqoman. Golgotaqa calavera ninanmi.

³⁴ Chaypim Jesusman tomachirqaku hayaqwan chaqrusqa vinota. Jesusñataqmi malliykuspan mana tomayta munarqachu.

³⁵ Chakataruspankum Jesuspa pachankunatañataq soldadokuna sortearqaku mayqanninmanpas tuparunanpaq.

³⁶ Hinaspam tiyaykuspanku Jesusta cuidarqaku.

³⁷ Cruzpa umanpiñataqmi qellqarqaku imamantam wañuchisqankumanta, chay qellqasqankum nirqa: “JUDIOKUNAPA REYNIN JESUS” nispa.

³⁸ Jesustawan kuskatam chakatarqaku iskay suwakunata, hukninta *f**alleq lawninpi, huknintañataq *f**ichoq lawninpi.

³⁹ Chaynin pasaqkunañataqmi umankutapas aywisparaq kamirqaku:

⁴⁰ —Qamqariki nirqanki: “Templota tuñirachispaymi kimsa punchawllapi hatarirachisaq” nispam, chaynaqa Diospa Churin kaspaykiqa kikillayki librakuspayá cruzmanta uraykamuy —nispa.

⁴¹ *f**Sacerdotekunapa jefenkunapas, Diospa leynin yachachiqkunapas chaynataq judiokuna kamachiqkunapas Jesustam burlakurqaku kaynata:

⁴² —Wakinkunatam librarqa ichaqa kikinqa manam librakuyta atinchu. Israelpa Reynin kaspaqa uraykamuchunyá cruzmanta, chaymi iñisunchik.

⁴³ Diospim confiakurqa, Diosyá kunan salvachun cheqapta kuyaspaqa “Diospa Churinmi kani” nichkaptinqa.

⁴⁴ Kamirqakutaqmi Jesuswan kuska chakatasqa suwakunapas.

Jesuspa wañukusqanmanta

⁴⁵ Kay pacham tutayarurqa chawpi punchawmanta las treskama.

⁴⁶ Yaqa las trestam Jesus qaparirqa: —¡Elí, Elí! ¿Lama Sabactani? —nispa. Kayqa: “Diosnilláy, Diosnilláy ¿imanasqataq sapallaytaqa saqerullawanki?” ninanmi.

⁴⁷ Chaypi wakin kaqkunañataqmi uyariruspanku nirqaku: —Kay runaqa Diosmanta willakuq Eliastam qayakuchkan —nispanku.

⁴⁸ Chaymi hukninñataq kallpaykurqa esponjawan hinaspam vinagreman challpuykuspan soqoswan Jesusman haypaspa soqochirqa.

⁴⁹ Wakinñataqmi nirqa: —Suyaychik, qawasunchik Elias hamunqachus libraqnin —nispa.

⁵⁰ Huktawan Jesus qaparispam espiritunta Taytanman qospan wañukurqa.

⁵¹ Chay ratollapim templopi *f**santuario rakiq rakta tela altomanta urayman iskayman llikikururqa. Allpapas kuyurirurqam, qaqakunapas raqrarurqam.

⁵² Achka sepulturakuna kicharikuruptinmi Diospi iñiqkunapa cuerponkuna kawsariramurqa.

⁵³ Kaykunam sepulturankumanta lloqsiramurqaku Jesuspa kawsarimusqanpa qepanta hinaspam yaykurqaku Jerusalen llaqtaman, chaytaqa achka runakunam rikurqaku.

⁵⁴ Jesusta cuidaq capitanñataqmi wakin soldadokunapiwan temblorta hinaspa tukuy imakuna pasasqanta qawaykuspa mancharikururqaku hinaspam nirqaku: —Cheqaptapunim payqa Diospa Churin kasqa —nispa.

⁵⁵ Chaypim kachkarqaku achka warmikuna karullamanta qawaspanku. Paykunam Jesusta yanapastin qatimurqaku Galilea lawmanta.

⁵⁶ Paykunawanmi kachkarqa Magdala llaqtayoq Mariapas chaynataq Jacobopapiwan Joseypa maman Mariapas chaynataq Zebedeopa warminpas.

Jesusta pampaykusqankumanta

⁵⁷ Tutaykuchkaptinñam Arimatea llaqtayoq Josey sutiyoq apu runa hamurqa. Paypas karqa Jesuspa discipulonmi.

⁵⁸ Paymi rirqa Pilatomanta Jesuspa cuerponta mañaq. Hinaptinmi Pilato kamachirqa Jesuspa cuerponta qonankupaq.

⁵⁹ Chaymi Joseyqa Jesuspa cuerponta mosoq sabanaswan wankuykurqa.

⁶⁰ Hinaspam qaqapi kikinpaq toqochisqan mosoq sepulturaman churarqa, punkuntañataqmi taparqa hatun rumita tanqamuspan hinaspam ripukurqa.

⁶¹ Chaypitaqmi kachkarqa Magdala llaqtayoq Mariawan huknin Mariapas sepulturapa chimpanpi tiyaspanku.

Jesuspa cuerponta sepulturapi cuidasqankumanta

⁶² Paqarinnintin samana punchaw tutaykuqtam *f**sacerdotekunapa jefenkunapiwan *f**fariseokuna Pilatoman rispanku

⁶³ nirqaku: —Señor Prefecto, yuyachkanikum, chay llulla runaqa kawsachkasparaqmi nirqa: “Wañuspayqa kimsa punchawmantam kawsariramusaq” nispa.

⁶⁴ Chaynaqa kamachiyá kimsa punchawkama sepultura seguranankupaq, yanqañataq discipulonkuna cuerponta tuta suwaruspanku runakunaman ninmanku: “Wañusqanmantam kawsarirun” nispanku, hinaptinmi chay llullaqa ñawpaq llullakusqanmantapas aswanraq karunman.

⁶⁵ Chaymi pilatoñataq nirqa: —Chayqayá soldadokunaqa. Rispaykichikyá yachasqaykichikman hina seguramuychik —nispa.

⁶⁶ Chaymi pasaspanku sepulturata allinta seguramurqaku, punkupa tapaqnin rumita sellaykuspankum cuidaq soldadokunata chaypi saqeykurqaku.