Mateo 23 - Quechua Ayacucho Bible 1987

Fariseokunata Jesus qaqchasqanmanta

¹ Jesusmi nirqa runakunatawan discipulonkunata:

² —Diospa leynin yachachiqkunapiwan *f**fariseokunam derechoyoq kanku Moisespa leynin yachachinankupaq.

³ Chaynaqa kasukuspayá ruraychik paykunapa tukuy nisqanta. Ichaqa amam rurankichikchu paykunapa imam rurasqantaqa, paykunaqa manam yachachisqankuman hinachu ruranku.

⁴ Paykunaqa sasa kaqkunatam runakunaman kamachin llasaq qepita qepichichkaq hina ichaqa manam dedo puntallankuwanpas yanapaykunkuchu.

⁵ Llapa imatam ruranku runakuna qawanallanpaq. *f**Filacterio sutiyoq cajachakunatam hatunllataña churakunku. Santo tukuspam capankupa cantonkunapipas hatun watukunatapas warkukurunku.

⁶ Convidokunapipas hinaspa huñunakunanku wasipipas ñawpaqllapi tiyaytam munanku.

⁷ Munankutaqmi plazakunapi hatun respetowan runakuna rimaykunantapas chaynataq “yachachikuq” nispa ninankutapas.

⁸ —Qamkunayá ichaqa yachachikuqwanqa ama sutichachikuychikchu. Hukllam yachachiqnikichikqa kani, qamkunaqa wawqentillanmi kankichik.

⁹ Amataqyá pitapas kay pachapiqa taytawanqa sutichaychikchu, hukllam Taytaykichikqa, payqariki hanaq pachapim kachkan.

¹⁰ Amataqyá maestrowanpas sutichachikuychikchu. Ñoqa Cristollam maestroykichikqa kani.

¹¹ Qamkuna ukupi aswan reqsisqaqa kanqa wakinkuna serviqmi.

¹² Pipas hatunchakuqqa humillasqam kanqa, pipas humillakuqñataqmi hatunchasqa kanqa.

¹³ —¡Imaynaraq kankichik iskay uya *f**fariseokuna hinaspa Diospa leynin yachachiqkuna! Qamkunaqa Diospa munaychakusqanman yaykuqkunatam harkaypaq-harkachkankichik. Qamkunapas manam yaykunkichikchu nitaqmi munaqkunatapas yaykuchinkichikchu. [

¹⁴ —¡Imaynaraq kankichik iskay uya fariseokuna hinaspa Diospa leynin yachachiqkuna! Qamkunaqa viudakunapa imallankunatapas qechuruspam allin runa tukusparaq una-unayta Diosta mañakunkichik. Chayraykum qamkunaqa llumpay castigasqaraq kankichik.]

¹⁵ —¡Imaynaraq kankichik iskay uya *f**fariseokuna hinaspa Diospa leynin yachachiqkuna! Qamkunaqa tukuy hinastinpim purinkichik runakunata religionnikichikman iñichinaykichikpaq. Iñirachispaykichikñataqmi tikrarunkichik qamkunamantapas aswan wiña-wiñay castigasqa kananpaqraq.

¹⁶ —¡Imaynaraq kankichik runakunata pusaq ñawsakuna! Qamkunam ninkichik: “Templorayku juramentayqa manam imananchu. Chay templopi qorirayku juraspam ichaqa cumplinanchik” nispa.

¹⁷ ¡Mana yuyayniyoq ñawsakuna! ¿Mayqantaq aswan valorniyoq, qorichu icha Diospaq qorita sapaqchaq templochu?

¹⁸ Ninkichiktaqmi: “*f**Altarrayku jurayqa manam imananchu, altarpa hawanpi ofrendarayku juraspam ichaqa cumplinanchik” nispa.

¹⁹ ¡Mana yachayniyoq ñawsakuna! ¿Mayqantaq aswan valorniyoq, ofrendachu icha Diospaq ofrendata sapaqchaq altarchu?

²⁰ Pipas *f**altarrayku juramentaqqa manam altarllamantachu juramentachkan aswanqa altarpa hawanpi kaqkunamantawanmi.

²¹ Pipas templorayku juraqqa manam chayllamantachu jurachkan aswanqa chaypi kaq Diosmantawanmi.

²² Chaynataqmi hanaq pacharayku juraqpas jurachkan Diospa tiyananmantawan chaypi tiyaq Diosmanta.

²³ —¡Imaynaraq kankichik iskay uya *f**fariseokuna hinaspa Diospa leynin yachachiqkuna! Qamkunam diezmota qonkichik yerba buenamanta, anismanta hinaspa cominomanta aswanqa qonqarunkichikmi allin rurayta, kuyapayakuyta hinaspa iñiyniyoq kayta. Kay hatun kamachikuykunataqa kasukunaykichikmi diezmo qoytapas ama qonqaruspa.

²⁴ ¡Runakunata pusaq ñawsakuna! ¡Qamkunaqa tomanaykichikman wichiykuq chuspichatapas suysunkichikmi, *f**camello animaltam ichaqa enterollanta millpurunkichik!

²⁵ —¡Imaynaraq kankichik iskay uya *f**fariseokuna hinaspa Diospa leynin yachachiqkuna! Qamkunaqa vasotawan platotam hawallanta mayllankichik, sonqoykichikmi ichaqa huntasqa kachkan suwakuy munaywan hinaspa mana allin ruray munaywan.

²⁶ ¡Ñawsa *f**fariseo! Vasotaqa ukuntaraqyá mayllay puntata chaynapi hawanpas mayllasqa kananpaq.

²⁷ —¡Imaynaraq kankichik iskay uya *f**fariseokuna hinaspa Diospa leynin yachachiqkuna! Sepultura blanqueasqa hinam hawaykichikqa sumaqllaña kachkan, ukuykichikmi ichaqa wañusqakunapa tullunwan hinaspa qachakunawan huntasqa kachkan.

²⁸ Hawallaykichikpim runakunapaq allin ruraqman rikchakunkichik, sonqoykichikpim ichaqa iskay uya mana allin ruraq kankichik.

²⁹ —¡Imaynaraq kankichik iskay uya *f**fariseokuna hinaspa Diospa leynin yachachiqkuna! Qamkunaqa Diosmanta willakuqkunapaqmi hatun sepulturakunata perqapunkichik, adornankichiktaqmi allin ruraq runakunapa sepulturankunatapas

³⁰ hinaspam ninkichik: “Abueloykupa tiemponpi kawsaspaqa manach paykunawan kuskaqa wañuchiymankuchu karqa Diosmanta willakuqkunataqa” nispa.

³¹ Chaynata nispaykichikmi reqsichikunkichik Diosmanta willakuqkunata wañuchiq runakunapa miraynin kasqaykichikta.

³² ¡Tukupaychikyá abueloykichikkunapa qallarisqanta!

³³ —¡Culebrakuna! ¡Maqta urupa castankuna! ¿Imaynataq lluptiwaqchik infiernopi wiñaypaq castigomantaqa?

³⁴ Chayraykum kachamusqaykichik Diosmanta willakuqkunata, yuyayniyoqkunata hinaspa Diospa leynin yachachiqkunata, wakintam chakataspa wañuchinkichik, wakintañataqmi huñunakunaykichik wasikunapi azotenkichik hinaspam llaqtan-llaqtan qatikachankichik.

³⁵ Chaynapim qamkunaman chayasunkichik llapallan justo runakunapa yawarnin, culpasqaqa kankichik allin ruraq Abelpa wañusqanmanta Berequiaspa churin Zacarias wañusqankamam. Zacariasqa wañuchisqa karqa *f**altarmanta *f**santuarioman riqpa chawpinpim.

³⁶ Cheqaptapunim nikichik, chay llapallan castigoqa kunan tiempopi kawsaq miraymanmi chayamusunkichik.

Jerusalenpi yachaqkunamanta Jesuspa waqasqanmanta

³⁷ —¡Jerusalen, Jerusalen! ¡Qamqa Diosmanta willakuqkunatam wañuchinki! ¡Qanman kachamusqa runakunatam rumiwan chamqapanki! ¡Rapran ukupi chiwchinkunata wallpa huñuykuq hinam achka kutita munarqani runaykikuna huñuykuyta ichaqa manam munarqankichu!

³⁸ Chayraykum wasikichikpas chunninqaña.

³⁹ Manañam rikuwankichikñachu: “Señorpa sutinpi hamuqqa hatunchasqayá kachun” niwanaykichikkama.