Mateo 22 - Quechua Ayacucho Bible 1987

Casamiento fiestawan rikchanachiymanta

¹ Jesusmi huktawan rimarispan rikchanachiykunawan paykunata nirqa:

² —Diospa munaychakusqanqa rikchakun churinta casarachiq reymanmi.

³ Paymi sirvientenkunata kacharqa convidoman qayachisqankunata pusamunankupaq, qayachimusqankunam ichaqa manam hamuyta munarqakuchu.

⁴ Wakin sirvientenkunataña kachaspanmi chay convidasqankunata nichimurqa: “Mikuyqa listoñam kachkan, ñam nakarachiniña wira toroykunatapas hinaspa wira animalniykunatapas, chaynaqa hamuychikñayá casamientoman” nispa.

⁵ Convidasqankunañataqmi mana kasukuspa pasakurqaku, huknin chakranman, hukninñataq negocionman.

⁶ Wakinñataqmi sirvientekunata hapiruspanku maqaparuspa wañurachirqaku.

⁷ Chaymi reyqa llumpayta piñakuruspan soldadonkunata kacharqa chay wañuchiqkunata wañuchimunankupaq chaynataq llaqtankutapas kañamunankupaq.

⁸ Hinaspam sirvientenkunata nirqa: “Tukuy imam listoña kachkan casamientopaq, convidasqaykunam ichaqa mana kay fiestapas hinachu karqaku.

⁹ Chaynaqa hatun esquinakunaman rispayá casamientopaq qayamuychik llapallan tarimusqaykichikta” nispa.

¹⁰ Chaymi paypa sirvientenkuna rispa pusamurqaku llapallan tarisqankuta, pusamurqakumá allin runakunatapas chaynataq mana allin runakunatapas. Chaymi wasiman huntaykurqaku.

¹¹ —Convidasqankunata qawaykuq rey yaykuykuspanmi chaypi rikururqa huk runata casamientopaq hina mana pachasqata.

¹² Chaymi nirqa: “Tayta ¿imanasqataq casamientopaq hina mana pachasqachu yaykumurqanki?” nispa. Hinaptinmi chay runañataq mana imatapas nirqachu.

¹³ Chaymi reyñataq mesaman serviqkunata nirqa: “Chakinkunatawan makinkunata wataspa wischumuychik tutayaypa kasqanman. Chaypim waqanqaku, mana ima rurakuyta atispanmi kiruntapas kirichichichinqa” nispa.

¹⁴ Chaynaqa, achkam qayasqakunaqa kachkan, akllasqakunañataqmi aslla.

Impuesto paganapaq tapukuymanta

¹⁵ *f**Fariseokunam pasaspa parlaramurqaku Jesusta imapas rimasqanwan pantarachinankupaq.

¹⁶ Hinaspam *f**fariseomasinkutawan Herodespa qatiqninkunata kacharqaku Jesusta kaynata nimunankupaq: —Yachachikuq, yachanikum qamqa cheqap rimaq kasqaykita, yachanikutaqmi runapa rimasqantapas mana kasuspa Diospa munasqanman hina kawsakuyta cheqap yachachisqaykitapas, qamqariki manam runapa hawallantachu qawanki.

¹⁷ ¿Imaninkitaq, allinchu Rey Cesarman impuesto pagay icha manachu?

¹⁸ Jesusñataqmi mana allin piensasqankuta yachaspan nirqa: —¡Iskay uyakuna! ¿Imanasqataq pantachiwaypi richkankichik?

¹⁹ Qawachiwaychik impuesto paganaykichik qollqeta —nispa. Hinaptinmi haywaykurqaku qollqeta.

²⁰ Qawaykuspanmi Jesus tapurqa: —¿Pipa uyantaq hinaspa pipa sutintaq kay qollqepiqa kachkan? —nispa.

²¹ Chaymi paykunañataq nirqaku: —Rey Cesarpam —nispa. Hinaptinmi Jesusñataq nirqa: —Rey Cesarpa kaqtaqa paymanyá qoychik, Diosmanñataq paypa kaqta —nispa.

²² Kayta uyarispankum admirasqallaña pasakurqaku.

Wañuqkunapa kawsarimunanmanta

²³ Chay punchawñataqmi Jesusman hamurqaku wakin *f**saduceokuna. Kay runakunam creenku: Wañuqkunaqa manam kawsarinchu, nispa. Paykunam Jesusta nirqaku:

²⁴ —Yachachikuq, Moisesmi nirqa: “Casado runa mana churiyoq wañuruptinqa wawqenmi casaranqa viudata chaynapi wañukuqpa miraynin kananpaq” nispa.

²⁵ Kaypim qanchis wawqentin qarikuna karqa. Mayor kaq casarakuspanmi wañuruspan warminta mana wawayoqta saqerurqa,

²⁶ chaynallam pasakurqa sullka kaqwanpas kimsa kaqwanpas qatinasninpi qanchis kutikama.

²⁷ Hinaptinmi qepankuta warmipas wañururqa.

²⁸ Chaynaqa wañuqkuna kawsarimuptinqa ¿mayqanpa warmintaq kanqa qanchisnintin paywan casarakuchkaptinqa? —nispa.

²⁹ Chaymi Jesusñataq nirqa: —Qamkunaqa pantaypim kachkankichik, Bibliapa nisqantapas chaynataq Diospa atiynintapas mana reqsisqaykichikrayku.

³⁰ Llapa runakuna kawsarimuspankuqa manam casarakunqakuchu, manataqmi casarachinakunqakuchu, paykunaqa kanqa hanaq pachapi *f**angelkuna hinañam.

³¹ Wañuqkunapa kawsarimunanmantaqa ¿manachu leerqankichik Diospa nisusqaykichikta?

³² Paymi nirqa: “Ñoqaqa kani Abrahampa, Isaacpa hinaspa Jacobpa Diosninmi” nispa. Chaynaqa Diosqa manam wañusqakunapa Diosninchu ichaqa kawsaqkunapa Diosninmi —nispa.

³³ Runakuna chayta uyariruspam admirakurqaku yachachisqanwan.

Hatunnin kamachikuymanta

³⁴ *f**Saduceokunata Jesus upallarachiptinmi chayta qawaykuspa *f**fariseokuna hukllaman huñunakururqaku.

³⁵ Hinaptinmi paykunawan kuska kaq leykuna yachaq runa pruebananpaq Jesusta tapurqa:

³⁶ —Yachachikuq, Diospa kamachikuyninkunamantaqa ¿mayqantaq hatunnin kamachikuy? —nispa.

³⁷ Chaymi Jesusñataq nirqa: —“Señor Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan” nispa.

³⁸ Kaymi punta kaq hatun kamachikuy.

³⁹ Qatiqninñataqmi nin: “Kuyankim runamasikita kikikita hina” nispa.

⁴⁰ Kay iskaynin kamachikuykunapim Moisespa leyninpas chaynataq Diosmanta willakuqkunapa qellqasqanpas hukllawakun.

Cristoqa Rey Davidmantapas aswan hatun kasqanmanta

⁴¹ *f**Fariseokuna huñunasqa kachkaptinraqmi paykunata Jesus tapurqa:

⁴² —¿Imaninkichiktaq Cristomanta? ¿Pipa miraynintaq? —nispa. Chaymi paykunañataq nirqaku: —Davidpa mirayninmi —nispa.

⁴³ Hinaptinmi Jesusñataq nirqa: —¿Imaynanpitaq Davidqa Chuya Espiritupa yachachisqan, Cristota Señorwan suticharqa? Davidmi nirqa:

⁴⁴ “Señor Diosmi Señorniyta nirqa: ‘Enemigoykikunata vencenaykamayá *f**alleqniypi tiyaykuy, Enemigoykikunata saruchinaykamayá alleqniypi tiyaykuy’ nispa.”

⁴⁵ ¿Imaynataq Cristoqa Davidpa mirayninqa kanman Davidpuni “Señorniy” nispa Cristomanta rimachkaptinqa?

⁴⁶ Hinaptinmi pipas mana ima contestaytapas atirqachu. Chay punchawmantapunim penqakuruspa manaña tapurqakuchu.