Mateo 21 - Quechua Ayacucho Bible 1987

Jerusalen llaqtaman Jesus yaykusqanmanta

¹ Jerusalen llaqtaman hichparamuspankum chayarurqaku Olivos Moqopa hichpanpi kaq Betfage llaqtachaman. Jesusmi iskay discipulonkunata kachaspan

² nirqa: —Riychik wak chimpa llaqtachata, wakpim tarimunkichik wawayoq watasqa asnota. Paskaramuspa aysaramuychik.

³ Pipas imatapas nisuptikichikqa: “Señormi necesitachkan, chayllam kutichipamusunki” ninkichikmi.

⁴ Chayqa pasakurqa Diosmanta willakuqpa qellqasqan cumplikunanpaqmi.

⁵ Paymi qellqarqa kaynata: Niychik Sion llaqtapi *f**yachaqkunata: “Reynikichikqa qamkunamanmi hamuchkan, asnopi silladam humildella hamuchkan. Carga asnopa wawanpim hamuchkan” nispa.

⁶ Hinaptinmi discipulonkuna rispanku Jesuspa kamachisqanman hina rurarqaku.

⁷ Aysamurqakum asnota wawantinta chaymi pachankuwan caronaruptinku Jesus sillakuykurqa.

⁸ Hinaptinmi achkallaña runakuna ñanman pachankuta mastarqaku. Wakinñataqmi sachapa kallmankunata kuchuspa churarqaku chayninta Jesus pasananpaq.

⁹ Ñawpaqnin riqwan qepan riq runakunañataqmi qaparirqaku: —¡Rey Davidpa mirayninqa yupaychasqayá kachun! ¡Señorpa sutinpi hamuqqa hatunchasqayá kachun! ¡Hanaq pachapi kaqkunayá Diosta yupaychachunku! —nispa.

¹⁰ Jesus Jerusalenman chayaruptinñataqmi llapallan chaypi kaqkuna alborotaspanku: —¿Pitaq kayqa kanman? —nispa tapunakurqaku.

¹¹ Runakunam nirqa: —Payqariki Galilea law Nazaret llaqtamanta kaq Diosmanta willakuq Jesusmi —nispa.

Templopi rantikuqkunata Jesus qarqosqanmanta

¹² Chaymantam Jesus yaykurqa temploman hinaspam qarqorqa chaypi *f**rantikuqkunatawan rantiqkunata. Wikaparurqam qollqe cambiananku mesakunatapas chaynataq paloma *f**rantikuqkunapa sillankunatapas.

¹³ Hinaspam nirqa: —Bibliapim Dios nichkan: “Temployqa Mañakuwananku Wasiwan sutichasqam kanqa.” Qamkunam ichaqa suwakunapa machayninta hinaña rurarusqankichik —nispa.

¹⁴ Templopiraq kachkaptinmi Jesusman asuykamurqa ñawsakunapiwan wistukuna hinaptinmi pay sanoyachirqa.

¹⁵ *f**Sacerdotekunapa jefenkunapiwan Diospa leynin yachachiqkunam Jesuspa rurasqan *f**milagrokunata rikurqaku hinaspam uyarirqakutaq: “Rey Davidpa mirayninqa yupaychasqayá kachun” nispa warmakunapa qayaykachakusqantapas chaymi piñakuruspa

¹⁶ Jesusta nirqaku: —¿Uyarichkankichu kaykunapa nisqanta? —nispa. Hinaptinmi Jesusñataq nirqa: —Arí, uyarichkanim. ¿Manachu Bibliapi leerqankichik: “Llapa wawakunapiwan ñuñuqraq wawakunawanmi alabaykachikunki” niqta?

¹⁷ Chaymi paykunata saqeruspan Jerusalenmanta Betaniaman pasakurqa hinaspam chaypi puñupakurqa.

Mana ruruq higos sachata Jesus ñakasqanmanta

¹⁸ Tutapayta Jerusalenman Jesus kutimuchkaspam yarqarachikurqa.

¹⁹ Ñanpa patanpi higos sachata rikuruspanñataqmi asuykurqa pallananpaq. Ichaqa manam tarirqachu rurunta, chayqa kasqa llaqeyoqllam. Chayraykum chay higos sachata nirqa: —¡Kunanmantaqa manañam haykapipas rurunkiñachu! —nispa. Hinaptinmi sacha chakirurqa.

²⁰ Kayta qawaykuspankum discipulonkuna admirakururqaku. Hinaspankum Jesusta tapurqaku: —¿Imanasqataq kay sachaqa chaypunilla chakirun? —nispa.

²¹ Chaymi Jesusñataq nirqa: —Cheqaptapunim nikichik, mana iskayrayaspa iñiynikichik kaptinqa manam kay higos sachawan rurasqayta hinallachu rurawaqchik aswanqa kay orqotapas niwaqchikmi: “Chaymanta suchuspa lamar qochaman wischukuy” nispa, hinaptinqa chaynam kanman.

²² Confianzawan Diosta mañakuspaykichikqa tukuy mañakusqaykichiktam chaskinkichik.

Jesusqa kamachikunanpaq munayniyoq kasqanmanta

²³ Temploman yaykuruspa Jesus yachachichkaptinmi payman asuykurqa *f**sacerdotekunapa jefenkunapiwan judiokunapa kamachiqninkuna hinaspam tapurqaku: —¿Ima derechoykiwantaq chaykunataqa rurachkanki? ¿Pitaq autorizasurqanki? —nispa.

²⁴ Chaymi Jesusñataq nirqa: —Ñoqapas tapusqaykichikyá, kay tapusqayta contestawaptikichikqa ñoqapas nisqaykichikmi ima derechoywanmi kaykuna rurasqaytapas.

²⁵ ¿Pitaq bautizananpaq Juanta kachamurqa, Dioschu icha runakunachu? —nispa. Chaynata Jesus tapuptinmi kikinkupura tanteanakurqaku: —Sichum “Diosmi kachamurqa” niptinchikqa “¿Imanasqataq manaqa creerqankichikchu?” niwasunchiki.

²⁶ Manataqmi nichwanchu: “Runakunallam kachamurqa” nispaqa, chaynata niptinchikqa llapa runakunachiki imanaruwasunpas, Bautizaq Juantaqa hapinku Diosmanta willakuqpaqmi —nispa.

²⁷ Chaymi Jesusta nirqaku: —Manam yachanikuchu —nispa. Hinaptinmi Jesusñataq nirqa: —Manam ñoqapas nisqaykichikchu ima derechoywanmi kaykuna rurasqaytapas.

Iskay churikunawan rikchanachiymanta

²⁸ —¿Imaninkichiktaq? Huk runapam karqa iskay churinkuna. Paymi huknin churinta nirqa: “Churilláy, riyá uvas chakranchikpi llamkamuq” nispa.

²⁹ Hinaptinmi churinñataq nirqa: “Manam riymanchu” nispa. Ichaqa mana kasukusqanmanta wanakuspanmi ratonman llamkaq pasarqa.

³⁰ Huknin churinmanpas chay tayta asuykuspanmi hina chaynallata nirqa hinaptinmi chay churinñataq nirqa: “Arí taytáy, risaqmi” nispa. Ichaqa manam rirqachu.

³¹ ¿Mayqantaq taytanpa munasqanta rurarqa? Hinaptinmi chay runakunañataq nirqaku: —Punta kaqmi —nispa. Chaymi Jesusñataq nirqa: —Cheqaptaqa *f**impuesto cobraqkunawan chuchumikakunaraqmi qamkunamanta puntataqa Diospa munaychakusqanman yaykuchkanku.

³² Bautizaq Juanmi hamurqa allin kawsakuymanta yachachisunaykichikpaq hinaptinmi mana creerqankichikchu, *f**impuesto cobraqkunapiwan chuchumikakunam ichaqa creerqaku. Qamkunam ichaqa qawachkaspapas creenaykichikpaq mana wanakurqankichikchu.

Mana allin llamkaqkunawan rikchanachisqanmanta

³³ —Uyariychikyá huk tupanachisqaytawan: Huk runam chakranpi uvasta plantaruspan muyuriqninta perqarachirqa, huk pozotataqmi rurachirqa uvaspa rurunta sarunankupaq hinaspam markayoq chukllata rurarachirqa chaymanta cuidanankupaq. Chaykunata rurarachispam chakranta llamkaqkunaman arriendakuruspa illarurqa.

³⁴ Cosecha tiempo chayaramuptinmi runankunata chay chakrayoq kacharqa arriendaqninkunamanta tupaqninta mañamunankupaq.

³⁵ Ichaqa chay arriendaqkunam hapirurqaku chay runankunata hinaspam hukninta maqaparurqaku, huknintañataqmi wañurachirqaku, huknintañataqmi rumiwan chamqaparurqaku.

³⁶ Hinaptinmi chay chakrayoqqa huktawan runankunata kacharqa, ñawpaq kachamusqanmantapas achkataraq. Ichaqa chay llamkaqkunam wakinkunata hina rurarqaku.

³⁷ —Qepatañataqmi churintaña kacharqa: “Churiytaqa respetanqakuch” nispa.

³⁸ Ichaqa chay llamkaqkunam payta rikuruspanku ninakurqaku: “Paymi herenciataqa chaskinqa, chaynaqa wañurachisunyá ñoqanchikña dueño kananchikpaq” nispa.

³⁹ Chaymi chakramanta horqoruspanku wañurachirqaku.

⁴⁰ —Chaynaqa chakrayoq kutiramuspaqa ¿imatataq ruranqa llamkaqkunataqa?

⁴¹ Chaymi uyariqninkunañataq Jesusta nirqaku: —Chay mana allin runakunataqa mana llakipayaspam wañurachinqa hinaspam huk llamkaqkunamanña chakranta arriendakunqa chaynapi tiempollanpi payman tupaqnin cosechata qonankupaq —nispa.

⁴² Hinaptinmi Jesus nirqa: ¿Manachum Bibliapi leerqankichik: “Wasi perqaqkunapa wischupakusqanku rumiqa cimientopi esquinan hapiq rumiñam rikurirurqa. Kaytaqa rurarun Señor Diosmi, kay qawasqanchikqa admirakuypaqmi” nispa nisqanta?

⁴³ Chaymi nikichik, Diospa munaychakusqanmanqa manam yaykunkichikñachu, chaymanqa yaykunqaku paypa munasqanman hina kawsaqkunañam.

⁴⁴ Chay rumiman wichiqmi pakipasqa kanqa. Rumipa hapisqankunañataqmi ñutusqa kanqa.

⁴⁵ *f**Sacerdotekunapa jefenkunapiwan *f**fariseokunañataqmi Jesuspa rikchanachisqanta uyariruspanku musyakururqaku paykunamanta rimasqanta.

⁴⁶ Hinaptinmi hapiruyta munarqaku ichaqa runakunata manchakuspankum mana chaynatachu rurarqaku, runakunaqa Jesustam hapirqaku Diosmanta willakuqpaq.