Mateo 19 - Quechua Ayacucho Bible 1987

Casado kachkaspa rakinakuymanta

¹ Jesusmi kaykunata niruspan Galileamanta pasakurqa Judea lawman, rirqataqmi Jordan Mayupa waklawninmanpas.

² Achkallaña runakuna qatiptinmi chaypi sanoyachirqa onqoqkunata.

³ Chaymi *f**fariseokuna Jesusman asuykuspa pantarachinankupaq tapurqaku: —¿Diospa leyninpi permitinchu casado runa imamantapas tumpaykuspa warminmanta rakikuyta? —nispa.

⁴ Chaymi payñataq nirqa: —¿Manachu Bibliapi leerqankichik kay pachapa qallariyninpi qaritawan warmita unanchaqpa nisqanta?

⁵ Paymi nirqa: “Qarim tayta-mamanta saqespa hukllawakunqa warminmanña chaymi iskayninku huk runa hinallaña kanqaku” nispa.

⁶ Chaynaqa manam iskayñachu kanqaku aswanqa hukllañam. Chayraykum runaqa mana rakinmanchu Diospa kuskanchasqantaqa.

⁷ Chaymi tapurqaku: —Hinaptinqa ¿imanasqataq Moisesqa permitirqa papelta ruraykuspa qariqa warminmanta rakikunanpaq? —nispa.

⁸ Chaymi Jesusñataq nirqa: —Rumi sonqo kasqaykichikraykum Moisesqa permitirqa papelta qoykuspa warmikichikmanta rakikuytaqa, qallariyninpiqa manam chaynachu karqa.

⁹ Ñoqam ichaqa nikichik, huk qariwan mana pierdekuchkaptin yanqamanta warminta wischuspan hukwan casarakuqqa hukwan pierdekuy huchapim kachkan —nispa.

¹⁰ Hinaptinmi discipulonkuna nirqaku: —Casado runa warminwan chayna kaptinqa manam valenchu casarakuy —nispanku.

¹¹ Chaymi Jesusñataq nirqa: —Manam llapallan runachu sapallanqa kanman aswanqa chaypaq kaqkunallam.

¹² Arí, kanmi nacesqanmantapuni chaypaq kaqkuna, wakinqa kachkan runapa capasqanmi, wakinñataqmi mana casarakunkuchu Diosta servinankurayku. Pipas chaynata kawsay atiqqa nisqayman hinayá rurachun —nispa.

Wawakunata Jesus bendecisqanmanta

¹³ Jesusmanmi pusamurqaku iskay-kimsa wawakunata chaynapi paykunata hapiykuspa Diosta mañapunanpaq. Discipulonkunañataqmi pusamuqkunata qaqcharqa.

¹⁴ Hinaptinmi Jesus nirqa: —Ama harkaychikchu wawakuna ñoqaman hamunanta, kay wawakuna hina kaqkunapaqmi Diospa munaychakusqanqa —nispa.

¹⁵ Chaynata niruspanmi wawakunapa hawanman makinta churaykuspan pasakurqa.

Jesuswan apu runapa parlasqanmanta

¹⁶ Huk runam Jesusman asuykuspan tapurqa: —Yachachikuq ¿ima allintataq rurasaq wiñay kawsanaypaq? —nispa.

¹⁷ Chaymi payñataq nirqa: —¿Imanasqataq allin kaqmanta tapuwanki? Diosllam allinqa. Wiñay kawsayta munaspaykiqa kasukuy Diospa kamachikuyninkunata —nispa.

¹⁸ Hinaptinmi chay runañataq nirqa: —¿Mayqan kamachikuykunata? —nispa. Hinaptinmi Jesusñataq nirqa: —Amam pitapas wañuchinkichu, amam hukwanqa pierdekunkichu, amam suwakunkichu, amam pimantapas llullakunata rimankichu,

¹⁹ tayta-mamaykita respetay, kuyankitaqmi runamasikitapas kikikita hina —nispa.

²⁰ Hinaptinmi chay runañataq nirqa: —Lliwtam kasukurqani. ¿Imaraqtaq faltawan? —nispa.

²¹ Chaymi Jesus nirqa: —Cabal runa kayta munaspaykiqa tukuy imaykita *f**rantikamuspa chay qollqeta wakchakunaman qomuy, chaynapim kapuqnikikunaqa hanaq pachapi kanqa, chaymanta kutimuspañam ñoqawan rinki —nispa.

²² Chayta uyariykuspanmi llakisqa kutikurqa achka kapuqniyoq kasqanrayku.

²³ Hinaptinmi Jesus nirqa discipulonkunata: —Cheqaptapunim nikichik, apuqa llumpay sasatam Diospa munaychakusqanman yaykunqa.

²⁴ Apu runa Diospa munaychakusqanman yaykunanmantaqa *f**camelloch yaqapas agujapa rinrinta usturunman —nispa.

²⁵ Kayta uyariykuspankum discipulonkuna aswanraq admiraykuspa tapukurqaku: —¿Hinaptinqa pitaq salvakuytaqa atinman? —nispa.

²⁶ Jesusñataqmi paykunata qawarispan nirqa: —Runakunaqa manam atinmanchu, Diospaqmi ichaqa tukuy imapas atinallan.

²⁷ Hinaptinmi Pedroñataq nirqa: —Taytáy, ñoqaykuqa tukuy imata saqeruspam qanwan purichkaniku ¿imataq ñoqaykupaqqa kanqa? —nispa.

²⁸ Chaymi Jesusñataq nirqa: —Cheqaptapunim nikichik, tukuy imapas mosoqyanan tiempopi Diosmanta hamuq Runa achkirichkaq tiyanaypi tiyaykuptiymi qatiqniykunapas tiyaykunkichik chunka iskayniyoq hatun tiyanakunapi hinaspam juzgankichik chunka iskayniyoq Israel ayllukunata.

²⁹ Pipas wasinkunata, wawqe-paninkunata otaq turi-ñañankunata, tayta-mamankunata, churi-wawankunata, chakrankunata ñoqarayku saqeqqa pachak kuti mastam chaskinqa, chaskinqataqmi wiñaypaq kawsaytapas.

³⁰ Ichaqa ancha reqsisqa kaqkunamantam achkaq kanqaku pisi reqsisqaña, pisi reqsisqa kaqkunamantañataqmi achkaq ancha reqsisqaña kanqaku.