Mateo 17 - Quechua Ayacucho Bible 1987

Jesuspa rikchaynin tikrakurusqanmanta

¹ Soqta punchaw pasaruptinmi Jesus pusarqa Pedrota, Jacobota hinaspa Jacobopa wawqen Juanta, paykunallawanmi rirqa orqoman.

² Paykuna qawachkaptinmi Jesuspa rikchaynin tikrakururqa. Uyanmi inti hina kancharirqa, pachanñataqmi achkiy hina yuraqyarurqa.

³ Hinaptinmi discipulonkuna rikururqaku Moisestawan Eliasta Jesuswan parlachkaqta.

⁴ Chaymi Pedroñataq Jesusta nirqa: —Señor ¡allinpaqchá kaypiqa kachkaniku! Munaptikiqa rurarusaqkuyá kimsa ramadata, hukta qampaq, hukta Moisespaq, huktañataq Eliaspaq —nispa.

⁵ Pedro rimachkaptinmi kancharichkaq puyu paykunata tapaykurqa hinaptinmi puyumanta nimurqa kaynata: —Paymi kuyasqay Churiy, payraykum kusisqa kachkani. Payta uyariychik —nispa.

⁶ Discipulonkunañataqmi chayta uyariruspanku qonqorakuykurqaku llumpay mancharisqallaña.

⁷ Hinaptinmi paykunata llapchaykuspan Jesus nirqa: —Hatariychik, ama manchakuychikchu —nispa.

⁸ Muyuriqninkuta qawarispankuñataqmi manaña pitapas rikurqakuchu aswanqa Jesusllatañam.

⁹ Orqomanta uraykamuchkaptinkuñam Jesus paykunata kamachirqa: —Chay qawasqaykichiktaqa amaraqmi pimanpas willankichikraqchu Diosmanta Hamuq Runa kawsarimunaykama —nispa.

¹⁰ Hinaptinmi discipulonkunañataq Jesusta tapurqa: —Diospa leynin yachachiqkunaqa ¿imanasqataq ninku: “Cristomanta ñawpaqtaqa Eliasmi hamunqa” nispa?

¹¹ Chaymi Jesusñataq nirqa: —Arí, cheqaptam Eliasqa puntamunan karqa tukuy imata allichananpaq.

¹² Ichaqa Eliasqa ñam hamurunña, judiokunañataqmi mana reqsirqakuchu, aswanmi payta tukuy munasqankuta rurarqaku, chaynam Diosmanta Hamuq Runapas paykunapa makinpi ñakarisaq —nispa.

¹³ Chaymi discipulonkuna cuentata qokururqaku Jesusqa Bautizaq Juanmanta rimasqanta.

Wañuy mañayoq warmata Jesus sanoyachisqanmanta

¹⁴ Achka runakunapa kasqanman chayaruptinkum Jesusman asuykurqa huk runa, paymi qonqorakuykuspa nirqa:

¹⁵ —Señorlláy, kuyapayariykuy churillayta, wañuy maña hapiptinmi llumpa-llumpayta ñakarin, ninamanwan yakumanmi wischuykarin.

¹⁶ Discipuloykikunaman apamuptiymi mana sanoyachiyta atirqakuchu.

¹⁷ Chaymi Jesusñataq nirqa: —Mana allin ruraqkunapa castan yaw mana creeq runakuna ¿haykapikamataq qamkunawan kasaq? ¿Haykapikamataq aguantasqaykichik? Apamuychik chay warmata —nispa.

¹⁸ Chaynata niruspam qaqcharurqa demoniota hinaptinmi chaypunilla warmamanta lloqsiruptin sanoyarurqa.

¹⁹ Chaymantam discipulonkuna Jesusman asuykuspa sapallankupi tapurqa: —¿Imanasqataq ñoqaykuqa demoniota mana qarqoyta atirqanikuchu? —nispa.

²⁰ Chaymi Jesusñataq nirqa: —Pisi iniyniyoq kasqaykichikraykum. Cheqaptapunim nikichik, huk mostazapa muhun hinallapas iñiynikichik kaptinqa niwaqchikmi kay orqota: “Suchuy kaymanta waklawman” nispa hinaptinqa pasanmanmi. Manam imapas sasaqa kanmanchu iñiptikichikqa. [

²¹ Kayna rikchaq demoniotaqa ayunowan mañakuspallam qarqowaqchik.]

Wañunanmanta Jesus huktawan willakusqanmanta

²² Galileapi kachkaptinkum Jesus nirqa: —Diosmanta Hamuq Runataqa runakunamanmi qoykuwanqaku

²³ wañuchiwanankupaq ichaqa kimsa punchawmantam kawsarimusaq —nispa. Kay nisqanwanmi discipulonkuna sinchita llakikururqa.

Templopaq impuestomanta

²⁴ Capernaum llaqtaman chayaruptinkum Pedroman asuykamurqa templopaq impuesto cobraqkuna hinaspam tapurqaku: —¿Manachum yachachiqnikichikqa pagan templopaq impuestota? —nispa.

²⁵ Chaymi Pedroñataq nirqa: —Pay paganmi —nispa. Pedro wasiman yaykuruptinmi puntata parlapayaspa Jesus tapuykurqa: —¿Imaninkitaq Simon? Kay pachapi reykunaqa ¿pikunamantataq cobran impuestota? ¿churinkunamantachu icha sapaq runakunamantachu? —nispa.

²⁶ Hinaptinmi Pedroñataq nirqa: —Sapaq runakunamantam —nispa. Jesusñataqmi nirqa: —Chaynaqa churinkunaqa manam pagananchu.

²⁷ Chaywanpas ama pitapas piñachinanchikpaqmi qochata riruspa *f**anzuelota wischumunki. Punta challwa hapisqaykipa siminpim tarinki qollqeta, chaytam iskayninchikpaq pagaykamunki —nispa.