Mateo 16 - Quechua Ayacucho Bible 1987

Milagrokuna Jesus rurananpaq mañakusqankumanta

¹ *f**Fariseokunapiwan *f**saduceokunam Jesusman rirqaku pruebaman churayta munaspanku, paykunam Jesusta mañakurqaku hanaq pachamanta kaq *f**milagrota qawachinanpaq.

² Chaymi payñataq nirqa: —Tarden antaqamuptinmi qamkunaqa ninkichik: “Allin tiempom kanqa” nispa.

³ Tempranon antaqaspa puyullaña kaptinñataqmi “Paranqam” ninkichik. ¡Iskay uyakuna! Qamkunaqa cielopi kaqkunata qawaspam imaynam tiempo kananta yachankichik, kunan tiempokunapi sucedekuqkunamantañataqmi mana cuentata qokunkichikchu.

⁴ Yaw mana kasukuq mana allin casta runakuna, qamkunaqa milagrotaraqmi mañawachkankichik. Manam qawachisqaykichikchu milagrotaqa, qawaspaqa-qawachisqaykichik Diosmanta willakuq Jonasta imam pasasqallantam. Jesus chaynata niruspanmi paykunata saqeruspa pasakurqa.

Qonchumanta

⁵ Jesuspa discipulonkunam lamar-qochapa waklaw chimpanman chayaruspanku yuyarirurqaku tanta mana apasqankuta.

⁶ Chaymi Jesus nirqa: —*f**Fariseokunapa hinaspa *f**saduceokunapa qonchunmanta cuidakuychik —nispa.

⁷ Chaymi discipulonkunañataq ninakurqaku: —Tantata mana apamuptinchikmi chaynataqa nichkan —nispa.

⁸ Jesusñataqmi musyaruspan nirqa: —Yaw pisi iñiyniyoqkuna ¿imanasqataq rimachkankichik: “Manam tantanchik kanchu” nispaqa?

⁹ ¿Manaraqchu yachankichik ni yuyankichik pichqa tantata pichqa waranqa qarikunapaq haypachisqayta? ¿Hayka canastatataq puchuqninkunata huñurqankichik?

¹⁰ ¿Manataqchu yuyankichik qanchis tantata tawa waranqa runapaq mirachisqaytapas? ¿Hayka canasta huntatataq puchunta hoqarirqankichik?

¹¹ “*f**Fariseokunapa hinaspa *f**saduceokunapa qonchunmanta cuidakuychik” nispaqa manam tantamantachu rimarqani. ¿Imanasqamá manaqa entienderqankichikchu? —nispa.

¹² Chayñam entienderqaku Jesusqa mana tantamanta nisqanta aswanqa *f**fariseokunapa hinaspa *f**saduceokunapa yachachikuyninmanta cuidakunankupaq nisqanta.

Jesusqa Cristopuni kasqanmanta

¹³ Jesusmi Felipepa gobiernasqan Cesarea lawman chayaruspan tapurqa discipulonkunata: —¿Diosmanta hamuq Runamantaqa pim kasqaytataq runakuna rimanku? —nispa.

¹⁴ Chaymi paykunañataq nirqaku: —Wakin runakunam nin Bautizaq Juan kasqaykita, wakinñataqmi nin Elias kasqaykita, wakinñataqmi nin Jeremias otaq Diosmanta willakuq huk kaqnin kasqaykita —nispa.

¹⁵ Chaymi Jesusñataq ñirqa: —Qamkunaqa ¿pim kasqaytataq ninkichik? —nispa.

¹⁶ Hinaptinmi Simon Pedroñataq nirqa: —Qamqa kanki kawsaq Diospa Churin Cristom —nispa.

¹⁷ Chaymi Jesusñataq nirqa: —Jonaspa churin Simon, qamqa mayna kusisqam kanki, kaytaqa yachachisurqanki manam runachu aswanqa hanaq pachapi kaq Taytaymi.

¹⁸ Chaymi ñoqapas niki, qamqa kanki Pedrom, kay hatun rumipa hawanpim iñiqniykunata hatarichisaq, paykunataqa manam wañuypa atiyninpas venceyta atinqachu.

¹⁹ Ñoqam qosqayki Diospa munaychakusqanman yaykunapaq llavekunata, kay pachapi watasqaykim hanaq pachapipas watasqa kanqa, kay pachapi kacharisqaykiñataqmi hanaq pachapipas kacharisqa kanqa —nispa.

²⁰ Chaynata niruspanmi discipulonkunata kamachirqa: —Amam pimanpas Cristo kasqaytaqa willankichikchu —nispa.

Wañunanmanta Jesuspa willakusqanmanta

²¹ Chay horamantapunim discipulonkunaman Jesus willakurqa Jerusalenman riptin judiokunapa kamachiqninkuna, *f**sacerdotekunapa jefenkuna hinaspa Diospa leynin yachachiqkuna ñakarichinanmanta. Willakurqataqmi wañurachiptinku kimsa punchawninman kawsarimunanmantapas.

²² Chaymi Pedro huklawchaman pusaruspan Jesusta anyarqa: —Diospas amayá munachunchu chaykuna pasasunaykitaqa —nispa.

²³ Hinaptinmi Jesusñataq muyuriykuspan Pedrota nirqa: —¡Satanas, asuy ñawpaqniymanta! Qamqa pantachiwaypim richkanki, piensasqaykiqa manam Diospa piensasqan hinachu aswanqa runakunallapam —nispa.

²⁴ Chaymantam discipulonkunata nirqa: —Pipas qatiwayta munaspaqa amaña kikillanpaq kawsaspayá ñakaristinpas qatiwachun.

²⁵ Pipas kay pachapi vidallan cuidakuqqa wiñaypaqmi pierderunqa, pipas ñoqarayku wañuqmi ichaqa kawsanqa.

²⁶ Runaqa ¿imatataq horqokunman lliw kay pachapi kaqkunata ganaruspan vidantañataq pierderuspaqa? Runaqa ¿haykatataq paganman vidanta salvananpaq?

²⁷ Diosmanta hamuq Runam Taytaypa hatunchasqan angelniykunapiwan kutimuspay sapakamaman rurasqankuman hina qopusaq.

²⁸ Cheqaptapunim nikichik, kaypi kaqmantam wakinkuna mana wañunqakuchu chay punchawpi Diosmanta Hamuq Runata munaychakunaypaq hamuchkaqta rikuwanankukama.