Mateo 15 - Quechua Ayacucho Bible 1987

Runataqa imam huchallichisqanmanta

¹ Jerusalenmanta hamuspankum Diospa leynin yachachiqkunawan *f**fariseokuna Jesusman asuykuspa tapurqaku:

² —¿Imanasqataq discipuloykikunaqa ñawpa abuelonchikkunapa costumbrentaqa mana kasunkuchu? Mikunankupaqmi makinkuta mana mayllakunkuchu —nispa.

³ Chaymi Jesusñataq nirqa: —Qamkunapas ¿imanasqataq mana kasunkichikchu Diospa kamachikuyninta ñawpaq costumbrekunalla ruranaykichikrayku?

⁴ Diosmi nirqa: “Tayta-mamaykita respetay, pipas tayta-mamanta ñakaqqa wañunqam” nispa.

⁵ Aswanqa qamkunam ninkichik: “Huk runaqa tayta-mamanman ninmanmi ‘Taytáy, mamáy, manam yanapaykimanchu, qamkunaman qonaytam Diosman qoykuni’ nispa.”

⁶ Pipas chayna niqqa manañam tayta-mamanta yanapanñachu, chaynata yachachispam Diospa kamachikuyninta yanqachankichik costumbrekichikkunallata ruraspaykichik.

⁷ ¡Iskay uyakuna! Allintam Diosmanta willakuq Isaias qamkunamanta kaynata qellqarqa:

⁸ “Simillanwanmi yupaychawan kay runakunaqa, ñoqamanta karupim kachkan sonqonkuqa.

⁹ Paykunaqa adorawankupas yanqapaqmi, yachachisqankupas runapa kamachisqallanmi.”

¹⁰ Runakunata qayaspanmi Jesus nirqa: —Uyariwaspaykichikyá kaykunata entiendeychik.

¹¹ Manam imapas mikusqanchu runataqa huchallichin, runataqa huchallichin mana allinta piensaspa rimasqanmi.

¹² Chaymi discipulonkuna Jesusman asuykuspa nirqaku: —¿Yachankichum nisqaykiwan *f**fariseokuna piñakurusqanta? —nispa.

¹³ Chaymi payñataq nirqa: —Hanaq pacha Taytaypa mana tarpusqan plantaqa sapinmanta pilasqam kanqa.

¹⁴ Asurikuychik paykunamanta. Paykunaqa kachkan ñawsam hinaspapas ñawsamasin pusaqkunam. Ñawsapura pusanakuspaqa iskayninkum uchkuman wichiykunqaku.

¹⁵ Chaymi Pedroñataq nirqa: —Entiendeykachiwayku chay rikchanachiy rimasqaykita —nispa.

¹⁶ Chaymi Jesus nirqa: —¿Qamkunapas manachum entiendenkichik?

¹⁷ ¿Manachu entiendenkichik runapa mikusqanqa wiksaman yaykuspa chaymanta lloqsisqanta?

¹⁸ Mana allin rimaymi ichaqa sonqonmanta lloqsispa huchallichin runata.

^19-20 Sonqonmanta lloqsiptinmi runaqa huchallikun tukuy mana allinkunata piensaspa, wañuchispa, hukwan pierdekuspa, huchapakuspa, suwakuspa, runamasinta tumpaspa hinaspa kamispa. Makita mana mayllakuspa mikuyqa manam pitapas huchallichinchu.

Tiro llaqtayoq warmipa wawanta allinyachisqanmanta

²¹ Chaymanta Jesus pasakuspanmi Tiro hinaspa Sidon lawman rirqa.

²² Hinaptinmi chaypi *f**yachaq cananea warmi hamurqa Jesusman qayaykachakustin: —¡Davidpa mirayninmanta hatun kamachikuq, kuyapayariykullaway! Wawallaytam demonio llumpayta ñakarichichkan —nispa.

²³ Jesusñataqmi mana imatapas nirqachu. Chaymi discipulonkuna Jesusman asuykuspa ruegarqaku: —Qepanchiktam wak warmi hamuchkan qayaykachakustin, mañakusqantayá ruraykuy pasakunanpaq —nispa.

²⁴ Chaymi Jesus nirqa: —Taytayqa kachamuwan Israel casta chinkasqa ovejakunallamanmi —nispa.

²⁵ Warmiñataqmi asuykuspan qonqorakuykurqa ñawpaqninpi: —¡Taytáy, yanapaykullaway! —nispa.

²⁶ Jesusñataqmi nirqa: —Manam allinchu warmakunamanta tantanta qechuruspa allqokunaman wischuykuyqa —nispa.

²⁷ Hinaptinmi chay warmiñataq nirqa: —Arí chaynam taytáy, ichaqariki allqokunapas dueñonpa mesanmanta wichiqtaqa mikunmi —nispa.

²⁸ Chaymi Jesus nirqa: —Mamáy ¡qamqa mayna iñiyniyoqmi kasqanki! Munasqaykiman hinayá rurasqa kachun —nispa. Hinaptinmi chaypunilla wawan allinyarurqa.

Achkallaña onqoqkunata Jesus sanoyachisqanmanta

²⁹ Chaymanta Jesus lloqsispanmi Galilea qocha patanta pasarqa, orqoman seqaruspanmi chaypi tiyaykurqa.

³⁰ Payman achkallaña hamuqkunam pusamurqaku wistukunata, mana valeq brazoyoqkunata, ñawsakunata, mana rimaqkunata chaynataq wakin onqoqkunatapas, Jesusman asuykachiptinkum sanoyachirqa.

³¹ Chaymi runakuna admirakurqaku mana rimaqkuna rimaptin, mana valeq brazoyoqkuna sanoyaptin, wistukuna puriptin hinaspa ñawsakuna qawarikuptin. Chayraykum Israel nacionpa Diosninta alabarqaku.

Tawa waranqapaq mikuy mirachisqanmanta

³² Discipulonkunata qayaspanmi Jesus nirqa: —Kay runakunamantam llakipayarikuni, ñam kimsa punchawña ñoqawan kachkanku, manam mikunankupaqqa imapas kanchu. Mana mikusqataqa manam wasinkumanqa kutichiymanchu, yanqam ñanpi desmayarunmanku —nispa.

³³ Chaymi discipulonkunañataq nirqa: —Kay achka runakunaman mikuchinanchikpaq haypaqtaqa ¿maypitaq tarichwan tantata wasipas mana kachkaptinqa?

³⁴ Hinaptinmi Jesus paykunata tapurqa: —¿Haykataq tantaykichik kachkan? —nispa. Chaymi paykunañataq nirqaku: —Qanchisllam as challwa kankasqapiwan —nispa.

³⁵ Chaymi Jesus kamachirqa llapa runakunata pampapi tiyaykunankupaq.

³⁶ Qanchisnintin tantatawan kankasqa challwakunata hapiykuspam Diosman graciasta qorqa, chaymantam partiruspan discipulonkunaman qorqa, paykunañataqmi runakunaman aypurqa.

³⁷ Llapallankum mikurqaku saksanankukama hinaptinmi puchuqtapas huñumurqaku qanchis canasta huntataraq.

³⁸ Mikuqkunam karqa tawa waranqa qarikuna, manam warmikunatawan wawakunataqa yuparqakuchu.

³⁹ Runakunata Jesus abyaruspanmi pasarqa Magadan lawman.