Mateo 14 - Quechua Ayacucho Bible 1987

Bautizaq Juanta Herodes wañurachisqanmanta

¹ Chay tiempopim Rey Herodes gobiernachkaspan Jesusmanta noticiata uyarirurqa.

² Chaymi serviqninkunata nirqa: —Payqa Bautizaq Juanmi, kawsariramuspanmi kaynaña atiyniyoqqa —nispa.

³ Herodesmi ñawpaqtaraq Juanta hapirachimuspan carcelman pusachirqa, chaypim cadenarachirqa Herodiasrayku. Herodiasqa Rey Herodespa wawqen Felipepa warminmi karqa.

⁴ Chayraykum Herodesta Juan nirqa: —Diospa leyninman hinaqa manam allinchu paywan casarakusqaykiqa —nispa.

⁵ Chaymi Herodesqa Juan wañurachiyta munarqa aswanqa manchakurqam runakunata, paykunam Juantaqa Diosmanta willakuqpaq hapirqaku.

⁶ Herodespa santon chayaramuptinmi Herodiaspa warmi wawan tusurqa llapallanpa qayllanpi chaymi llumpayta gustarurqa Herodesta.

⁷ Chaymi juramentowan prometekurqa imapas mañakusqanta qonanpaq.

⁸ Chaymi sipasñataq mamanpa umachasqan kaspa Herodesta nirqa: —Qoykuway platopi Bautizaq Juanpa umanta —nispa.

⁹ Chaymi reyqa llakikururqa ichaqa juramentasqanrayku hinaspa convidasqankunapas uyarisqanraykum kamachirqa qonankupaq.

¹⁰ Juanpa umanta carcelpi qorumunankupaq kamaykachiptinmi

¹¹ platopi apamuspanku haywaykurqaku sipasman, payñataqmi aparurqa mamanman.

¹² Hinaptinmi Juanpa discipulonkuna riruspa cuerponta aparqaku pampaq, chaymantam rirqaku Jesusman willaq.

Pichqa waranqapaq mikuy mirachisqanmanta

¹³ Jesusmi Juanpa wañukusqanta yacharuspan sapallan botepi pasakurqa mana runapa kasqanman. Runakunañataqmi risqanta yacharuspanku llaqtankumanta lloqsispa qatirqaku chakillawan.

¹⁴ Botemanta Jesus lloqsiruspanmi chay achkallaña runakunata qawaykuspa llakipayarikurqa hinaspam sanoyachirqa paykuna ukupi kaq onqoqkunata.

¹⁵ Tutaykuchkaptinñam Jesuspa *f**discipulonkuna payman asuykuspa nirqaku: —Ñam llumpay tardeña, kaypiqa manataqmi wasipas kanchu. Pasakuchunkuñayá hichpa llaqtachakunaman rispa mikuyta rantimunankupaq —nispa.

¹⁶ Chaymi Jesusñataq nirqa: —Manam rinmankuchu, qamkunayá mikuykachiychik —nispa.

¹⁷ Chaymi discipulonkunañataq nirqa: —Pichqa tantawan iskay challwa kankasqallam kaypiqa kachkan —nispa.

¹⁸ Hinaptinmi Jesusñataq nirqa: —Apamuwaychik —nispa.

¹⁹ Runakunata pastopi tiyanankupaq kamachispanmi hapiykurqa pichqan tantakunatawan iskaynin challwakunata hinaspam hanaq pachata qawarispan Diosman graciasta qorqa, tantakunata pakiykuspanmi discipulonkunaman qorqa, paykunañataqmi runakunaman aypurqa.

²⁰ Llapallankum mikurqaku saksanankukama, chaymantam puchuq tantakunata huñurqaku chunka iskayniyoq canasta huntata.

²¹ Mikuqkunam karqaku pichqa waranqa qarikuna ichaqa manam warmikunatawan wawakunataqa yuparqakuchu.

Qocha hawanta Jesuspa purisqanmanta

²² Jesusmi discipulonkunata boteman yaykuchirqa puntaspa qochata chimpachkanankupaq, chaynapi llapa runakunata pay avianankama.

²³ Aviaruspanñataqmi Jesus sapallan rirqa orqo lawman Diosta mañakunanpaq. Tutayaramuptinmi Jesus sapallan kachkarqa.

²⁴ Discipulonkunañataqmi botepi richkarqa karutaña, hatun olakunañataqmi boteta nisyullataña laqyarqa paykuna lawman llumpayta wayramuptin.

²⁵ Hinaptinmi yaqa gallo waqaytaña Jesus paykunaman asuykurqa yaku hawanta puristin.

²⁶ Discipulonkunañataqmi yaku hawanta puriqta rikuruspanku mancharisqallaña qaparirqaku: —¡Wakqa manchachikum! —nispanku.

²⁷ Hinaptinmi chaypunilla Jesus nirqa: —¡Qarinchakuychik! Ñoqam kani, ama manchakuychikchu —nispa.

²⁸ Hinaptinmi Pedroñataq nirqa: —Señorlláy, qam kaspaykiqa kamachimuwayá yakupa hawanta qanman hamunaypaq —nispa.

²⁹ Chaymi Jesus nirqa: —Hamuy —nispa. Chaymi Pedro uraykurqa botemanta hinaspam puriyta qallaykurqa yaku hawanta Jesuspa ladonman rinanpaq.

³⁰ Aswanqa sinchi wayrawan mancharikuruspanmi chinkaykuyta qallarispan qaparirqa: —¡Señorlláy, salvaykuway! —nispa.

³¹ Chaymi Pedrota makinmanta hapiruspan Jesus nirqa: —¡Pisi confianzayoq runa! ¿Imanasqataq iskayrayarqanki? —nispa.

³² Paykuna boteman seqaruptinmi wayra tanirurqa.

³³ Chaymi botepi kaqkuna paypa ñawpaqninpi qonqarakuykuspa nirqaku: —Cheqaptapunim qamqa kasqanki Diospa Churin —nispa.

Genesaretpi onqoqkunata Jesus sanoyachisqanmanta

³⁴ Qochata chimparuspankum chayarurqaku Genesaret lawman.

³⁵ Hinaptinmi chay sitiopi llapallan runakuna Jesusta reqsiruspanku willanakururqaku llapallan muyuriqnin llaqtakunapi chaymi payman apamurqaku llapallan onqoqkunata.

³⁶ Hinaspam ruegakurqaku pachanpa patallantapas hapiykunankupaq chaymi llapallan hapiykuqkunaqa allinyarurqaku.