Mateo 12 - Quechua Ayacucho Bible 1987

Samana punchawpi imam rurasqankumanta

¹ Jesusmi *f**samana punchawpi richkarqa tarpusqa chakrapa ukunta. Discipulonkunañataqmi yarqarachikuspa trigopa espigan rachuyta qallaykuspa mikurqaku.

² *f**Fariseokunañataqmi chayta qawaykuspanku Jesusta nirqaku: —Discipuloykikunaqa rurachkanku samana punchawpi leypa harkakusqan ruraykunatam —nispa.

³ Chaymi payñataq nirqa: —¿Manachum leerqankichik puriqmasinkunapiwan yarqaymanta kaspa Davidpa imam rurasqanta?

⁴ Davidmi Diospa wasinman yaykuruspa *f**sacerdotekunallapa mikunan *f**Diospa tantankunata mikururqa, mikuykachirqataqmi puriqmasinkunamanpas.

⁵ Moisespa qellqasqanpiqa ¿manachum leerqankichik? Sacerdotekunam templopi samana punchawpi llamkaspa mana samarqakuchu ichaqa chaywanqa manam huchallikurqakuchu.

⁶ Ñoqam nikichik, kaypiqa kachkan templomantapas aswan respetanaraqmi.

⁷ Bibliam nin: “Animalkuna wañuchipuwanaykichikmantapas aswanqa munani kuyapayakuq kanaykichiktam” nispa. Kayta entiendespaykichikqa manam culpawaqchikchu mana huchayoqkunata.

⁸ Diosmanta Hamuq Runaqa munaychakunim samana punchawpipas.

Chakisqa makiyoq runata Jesus allinyarachisqanmanta

⁹ Jesus chaymanta pasaspanñataqmi yaykururqa *f**huñunakunanku wasiman.

¹⁰ Chaypim kachkarqa chakisqa makiyoq runa hinaptinmi Jesusta imallamantapas acusanankupaq tapurqaku: —¿Diospa leyninqa permitinchu *f**samana punchawpi onqoq sanoyachiyta? —nispa.

¹¹ Chaymi Jesusñataq nirqa: —¿Mayqannikichiktaq ovejaykichik uchkuman samana punchawpi wichiykuptinqa mana horqowaqchikchu?

¹² ¡Runakunaqa ancha valorniyoqmi ovejakunamantapas! Chaynaqa leyqa permitinmi samana punchawpi allin ruraytaqa.

¹³ Chaymantam chay runata nirqa: —Haywariy makikita —nispa. Haywariykuptillanmi makin sanoyarurqa huknin makin hina.

¹⁴ Chaymi *f**fariseokuna lloqsiruspanku tanteanakurqaku Jesusta wañurachinankupaq.

Jesusqa Diospa serviqnin kasqanmanta

¹⁵ Jesusñataqmi chayta yachakuruspan pasakurqa chaymanta, achkallaña runakuna qatiptinmi sanoyachirqa lliw onqoqkunata.

¹⁶ Paykunatam nirqa: —Amam pimanpas willakunkichikchu pim kasqaytaqa —nispa.

¹⁷ Chaynataqa nirqa Diosmanta willakuq Isaiaspa nisqan cumplikunanpaqmi. Paywanmi Dios kaynata nichirqa:

¹⁸ Paymi serviqniy, paytam ñoqaqa akllakurqani, paytam kuyani, payraykum kusisqa kachkani. Espirituywanmi paytaqa huntaykusaq, nacionkunamanmi allin arreglomanta willachisaq.

¹⁹ Manam peleanqachu. Manam qaparinqachu. Manam pipas callekunapi qayakusqantapas uyarinqachu.

²⁰ Allin arreglota ruraspa munaychakunankamam, mana pakinqachu qewisqa soqosllatapas. Manam wañuchinqachu tumpalla rupaq mecherotapas.

²¹ Paypi confiankuspam suyanqaku nacionkunapas.

Jesuspa contranpi rimasqankumanta

²² Chaymantam Jesusman aparamurqaku demonioyoq mana rimaq ñawsa runata. Jesus sanoyarachiptinmi chay runaqa qawarikuruspan rimarqa.

²³ Llapa runakunañataqmi admirakuspa nirqaku: —¿Kaychu kanman Davidpa mirayninmanta hatun kamachikuq? —nispa.

²⁴ *f**Fariseokunañataqmi chayta uyariruspanku nirqaku: —Kay runaqa demoniokunataqa qarqon demoniokuna kamachiq Beelzebupa atiyninwanmi —nispa.

²⁵ Piensasqankuta yacharuspanmi Jesus nirqa: —Mayqan nacionpas chaqwallapi rakinasqa kaspaqa purmanqam, llaqtapas otaq familiapas rakinasqa kaspaqa manataqmi takyanchu.

²⁶ *f**Satanas kikillanta qarqokuptinqa ¿imaynataq munaychakusqanqa takyanman?

²⁷ Nisqaykichikpi hina Beelzebupa atiyninwan demoniokunata qarqoptiyqa ¿pipa atiyninwantaq qatiqnikichikqa demoniokunata qarqon? Chaynaqa paykunam juzgasunkichik.

²⁸ Ñoqaqa demoniokunataqa qarqoni Diospa Espiritunwanmi, chaynaqa Diospa munaychakusqanqa chayaramusunkichikñam.

²⁹ —Kallpasapa runapa wasinmantaqa manam pipas suwakuyta atinmanchu manaraq puntata payta chaqnaruspaqa. Chayraqmi ichaqa imankunatapas wasinmanta apakunman.

³⁰ —Pipas mana favorniypi kaqqa contraypim kachkan, cosechapi ñoqawan mana huñuqñataqmi usuchichkan.

³¹ —Chayraykum ñoqa nikichik: Diosqa pampachanqam llapallan huchallikuqninkunata chaynataq kamiqninkunatapas, Chuya Espirituta kamiqkunatam ichaqa mana haykapipas pampachanqachu.

³² Pipas Diosmanta Hamuq Runapa contraypi rimaqqa pampachasqam kanqa, Chuya Espirituqa contranpi rimaqmi ichaqa mana pampachasqachu kanqa kay tiempopipas nitaq hamuq tiempopipas.

Sachaqa rurunwan reqsichikusqanmanta

³³ —Allin sachaqa allintam rurun, mana allin sachañataqmi mana allinllata rurun, sachaqa rurunpim reqsichikun.

³⁴ ¡Culebrapa castankuna! ¿Imaynamá allintaqa imatapas niwaqchik mana allin runa kachkaspaykichikqa? Runaqa riman sonqonpi huntallaña kaqkunamantam.

³⁵ Allin runaqa sonqonpi kaq allin kapuqninkunamanta horqospanmi allinllata riman, mana allin runañataqmi mana allinllata riman mana allinkuna sonqonpi kasqanrayku.

³⁶ Nikichikmi, juicio punchawpim llapallaykichik cuentata qonkichik tukuy mana allinkuna parlasqaykichikmanta.

³⁷ Rimasqaykiman hinam Dios juzgasunki inocente kanaykipaqpas otaq culpasqa kanaykipaqpas.

Milagrota qawachinanpaq runakunapa mañakusqanmanta

³⁸ Chaymantam wakin *f**fariseokunapiwan Diospa leynin yachachiqkuna Jesusta nirqaku: —Yachachikuq, *f**milagrotayá qawachiwayku chaynapi Diosmanta kasqaykita yachanaykupaq —nispa.

³⁹ Chaymi Jesusñataq nirqa: —Yaw mana kasukuq mana allin casta runakuna, qamkunaqa milagrotaraqmi mañawachkankichik. Manam qawachisqaykichikchu milagrotaqa, qawaspaqa-qawachisqaykichik Diosmanta willakuq Jonasta imam pasasqallantam.

⁴⁰ Imaynam Jonas hatun challwapa wiksanpi karqa kimsa punchaw kimsa tutan, chaynam *f**Diosmanta Hamuq Runapas kasaq allpapa ukunpi kimsa punchaw kimsa tutan.

⁴¹ Ninive llaqtapi runakunam kawsarimunqaku kay runakunapiwan kuska juicio punchawpi hinaspam kay runakunata acusanqa. Paykunaqa huchankumantam wanakurqaku Jonaspa willakusqanwan, Jonasmantapas aswan allin willakuqmi kaypiqa kachkani.

⁴² Saba nacionniyoq reinapas juicio punchawpi kaypi kaq runakunapiwan kawsarimuspanmi paykunata acusanqa. Payqa hamurqa karu-karu llaqtamantaraqmi Rey Salomonpa yachaynin uyariq. Salomonmantapas aswan yachayniyoqmi kaypiqa kachkani.

Runaman demonio kutiykusqanmanta

⁴³ —Runamanta demonio lloqsiruspaqa qochqakunapim samananpaq maskastin purin, mana tarispanñataqmi

⁴⁴ nin: “Lloqsimusqay runamanyá kutikusaq” nispa. Kutirispanñataqmi chay runapa sonqonta tariykun chunnichkaqta, sumaq allichasqata hinaspa sumaq pichasqata.

⁴⁵ Kutirispanmi pusaramun kikinmantapas peornin qanchis demoniokunataraq chaynapi chay runaman yaykuspa *f**yachanankupaq. Chaymi chay runaqa rikurirun ñawpaq kasqanmantapas astawan peorña. Chaynam pasarunqa kay mana allin runakunatapas.

Mamanpiwan wawqenkuna Jesusta maskasqankumanta

⁴⁶ Runakunata Jesus rimapayachkaptinraqmi mamanpiwan wawqenkuna chayaramurqaku hinaspam hawallapi sayaykurqaku Jesuswan parlayta munaspanku.

⁴⁷ Chaymi huk kaqnin willarqa Jesusman: —Mamaykipiwan wawqekikunam sayachkanku hawapi qanwan parlaykuyta munaspa —nispa.

⁴⁸ Hinaptinmi Jesusñataq chay willaqninman nirqa: —¿Pitaq mamayqa, pitaq wawqeykunaqa? —nispa.

⁴⁹ Chaymantañataqmi discipulonkunaman makinta haywarispa nirqa: —Paykunam mamaywan wawqe-paniykunaqa.

⁵⁰ Pipas hanaq pachapi Taytaypa munasqan ruraqmi wawqeyqa, paniyqa hinaspa mamayqa —nispa.