Marcos 3 - Quechua Ayacucho Bible 1987

Chakisqa makiyoq runata Jesus sanoyachisqanmanta

¹ Jesusmi yapamanta yaykurqa *f**huñunakunanku wasiman, chaypim kachkarqa chakisqa makiyoq runa.

² *f**Fariseokunañataqmi wateqachkarqaku Jesusta *f**samana punchawpi sanoyachiptinqa chaymanta acusanankupaq.

³ Jesusmi chakisqa makiyoq runata nirqa: —Hatarispayki kay chawpipi sayay —nispa.

⁴ Hinaspam runakunata tapurqa: —¿Imatataq ley permitiwanchik *f**samana punchawpi rurananchikpaq? ¿Runapa allinninpaq ruraytachu icha mana allinninpaq ruraytachu? ¿Runa kawsachiytachu icha wañurachiytachu? —nispa. Paykunañataqmi upallalla karqaku.

⁵ Hinaptinmi Jesus muyuriqninpi kaqkunata qawarirqa piñakuywan. Rumi sonqo kasqankumanta llakikuspanmi, chay runata nirqa: —Haywariy makikita —nispa. Haywariykuptillanmi makin sanoyarurqa.

⁶ Chaymi fariseokuna lloqsimuspanku Herodespa partidonkunawan tanteanakurqaku: —¿Imaynatataq Jesusta wañurachichwanchik? —nispanku.

Achka runakuna Jesusta uyariq risqankumanta

⁷ Jesusñataqmi discipulonkunapiwan qochapa patanman pasakurqa hinaptinmi achka runakuna Jesusta qatirqaku Galilea lawmanta.

⁸ Jesuspa tukuy imakuna rurasqanta yacharuspankum rirqaku qawaq Judea lawmanta, Jerusalen llaqtamanta, Idumea lawmanta, Jordan Mayupa waklawninmanta. Rirqakutaqmi Tiro hinaspa Sidon llaqtakunapa muyuriqninmantapas.

⁹ Achkallaña runakuna chaypi kasqanraykum mana ñitirachikunanpaq discipulonkunata Jesus kamachirqa huk boteta alistanankupaq.

¹⁰ Jesus achka runata sanoyarachisqanraykum llapa onqosqa runakuna payta llapchaykunankupaq ñitinakustin asuykurqaku.

¹¹ Demonioyoqkunañataqmi Jesusta rikuruspanku ñawpaqninpi qonqorakuykurqaku hinaspam qaparirqaku: —Qamqa kanki Diospa Churinmi —nispanku.

¹² Jesusñataqmi paykunata sinchita kamachirqa: —Amam pimanpas willankichikchu pim kasqaytaqa —nispa.

Chunka iskayniyoq discipulonkunata Jesuspa akllasqanmanta

¹³ Jesus orqo lawman rispanmi qayarqa akllasqankunallata chaymi paykuna Jesusman asuykurqaku.

¹⁴ Akllarqam chunka iskayniyoq qarikunata paywan kuska purinankupaq hinaspa Diospa munaychakusqanmanta willakamunankupaq.

¹⁵ Kay akllasqankunamanmi atiyta qorqa demoniokunata qarqonankupaq.

¹⁶ Chay chunka iskayniyoq discipulonkunam karqa: Simon, paytam suticharqa Pedrowan,

¹⁷ Zebedeopa churin Jacobowan Juan, paykunatam suticharqa Boanergeswan piñakuqllaña kasqankurayku.

¹⁸ Wakinñataqmi karqa Andres, Felipe, Bartolome, Mateo, Tomas, Alfeopa churin Jacobo, Tadeo, *f**cananista partidomanta kaq Simon

¹⁹ hinaspa Judas Iscariote, paymi qepata Jesusta traicionarurqa.

Jesusta kamisqankumanta

²⁰ Jesusmi discipulonkunawan kutimurqa wasiman hinaptinmi huktawan achkallaña runakuna huñunakaramurqa chaymi paykunaqa manaña mikuytapas atirqakuchu.

²¹ Jesuspa ayllunkunam chaypi kasqanta yacharuspanku hamurqaku pusanankupaq: “Locoyarunmi” nispa runakuna rimaptinku.

²² Diospa leynin yachachiqkunapas Jerusalen llaqtamanta hamuspankum nirqaku: —Kay runaqa demoniokuna kamachiq Beelzebupa huntasqanmi kachkan chaymi qarqon demoniokunata —nispanku.

²³ Chaymi Jesus paykunata qayaspan nirqa: —Kikintaqa *f**Satanasqa manam qarqokunmanchu —nispa. Entiendenankupaqmi rikchanachirqa:

²⁴ —Sichu huk nacionpi runakuna chaqwallapi kawsaptinkuqa chayllam chay nacion tukurunman.

²⁵ Manataqmi rakinakusqa familiapas takyanmanchu.

²⁶ Chaynataqmi *f**Satanaspas kikinpa contranpi hatarispaqa manaña takyanmanchu, chayllam tukurunman.

²⁷ —Kallpasapa runapa wasinmantaqa manam pipas suwakuyta atinmanchu manaraq payta chaqnaruspaqa. Chaqnaruspam ichaqa imankunatapas chay suwaqa apakunman.

²⁸ —Cheqaptam nikichik: Diosqa pampachanqam runakunapa tukuy huchantapas chaynataq kikinta kamisqankutapas.

²⁹ Chuya Espiritu kamiqkunatam ichaqa mana haykapipas pampachanqachu, paykunaqa wiñaypaq huchayoqmi kanqaku.

³⁰ Chaytam Jesus nirqa runakunaman “Jesusqa demonioyoqmi” nispa rimasqankurayku.

Wawqenkunam mamanpiwan Jesusta maskanku.

³¹ Jesuspa kasqanmanmi chayarurqaku mamanwan wawqenkuna, hawallapi sayaykuspam payta qayachirqaku.

³² Jesuspa muyuriqninpi tiyaqkunam nirqaku: —Mamaykim wawqekikunapiwan qanmanta tapukuspanku hawapi kachkanku —nispa.

³³ Jesusmi nirqa: —¿Pitaq mamay, pitaq wawqeykuna? —nispa.

³⁴ Muyuriqninpi tiyaqkunata qawarispanmi nirqa: —Kay runakunam mamaywan wawqe-paniykunaqa.

³⁵ Pipas Diospa munasqan ruraqmi wawqeyqa, paniyqa hinaspa mamayqa.