Lucas 9 - Quechua Ayacucho Bible 1987

Willakamunankupaq discipulonkunata Jesus kachasqanmanta

¹ Chunka iskayniyoq akllasqankunata qayaykuspanmi, runakunamanta demoniokunata qarqomunankupaq hinaspa onqoqkunata sanoyachimunankupaq atiyta qoykurqa.

² Paykunatam kacharqa Diospa munaychakusqanmanta willakamunankupaq hinaspa onqoqkunata sanoyachimunankupaq.

³ Paykunatam nirqa: —Illaspaykichikqa amam apankichikchu tawnatapas, qoqawtapas, qollqetapas nitaq mudanaykichiktapas.

⁴ Wasiman yaykuspaykichikqa chayllapim samakunkichik chay llaqtamanta lloqsinaykichikkama.

⁵ Maypipas mana chaskisuptikichikqa chay llaqtanmantayá lloqsiychik, *f**usutaykichikpi allpatapas taspiychikyá chaypi kaqkuna mana kasukuq kasqankuta yachanankupaq.

⁶ Rispankumá llapallan llaqtachakunapi Diosmanta allin noticiata willakuspanku onqoqkunatapas sanoyachirqaku.

Bautizaq Juanta Herodes wañurachisqanmanta

⁷ Herodes gobiernachkaspanmi Jesuspa tukuy ima rurasqanmanta yacharuspan hukmanyarurqa. Wakinmi nirqa: —Bautizaq Juanmi kawsariramun —nispa.

⁸ Wakinñataqmi nirqa: —Eliasmi rikuriramun otaq Diosmanta huk kaqnin willakuqmi kawsariramun —nispa.

⁹ Herodesñataqmi nirqa: —Juantaqa ñoqam kunkanta qorurachirqani, chaynaqa kaykuna ruraqqa ¿pitaq kanman? —nispa. Chaymi reqsiykuyta munarqa.

Pichqa waranqapaq mikuy mirachisqanmanta

¹⁰ Apostolkuna kutiruspankum willakurqaku tukuy imapas ruramusqankumanta. Chaymi Jesus paykunallata pusarikuspan Betsaida llaqtaman pasakurqa.

¹¹ Runakunañataqmi risqanta yacharuspanku qatirqaku. Jesusmi paykunata chaskiykuspan Diospa munaychakusqanmanta yachachirqa, sanoyachirqataqmi onqoqkunatapas.

¹² Tardeykuptinñataqmi chunka iskayniyoq discipulonkuna payman asuykuspanku nirqaku: —Manam kaypiqa wasi kanchu. Runakunaqa pasakuchunñayá llaqtachakunamanwan muyuriqninpi chakrakunaman, chaypi samakuspa mikuyta maskanankupaq —nispa.

¹³ Chaymi Jesusñataq nirqa: —Qamkunayá mikuykachiychik —nispa. Hinaptinmi paykunañataq nirqaku: —Pichqa tantawan iskay challwa kankasqallam kaypiqa kachkan. ¿Icha mikuyta rantimuqchu risaqku kay llapa runapaq? —nispa.

¹⁴ Chaypiqa yuyayniyoq qarikunallam yaqa pichqa waranqa karqaku. Jesusmi discipulonkunata kamachirqa runakunata pichqa chunkatakama tiyachinankupaq.

¹⁵ Kamachisqanman hina ruraptinkum llapallanku tiyaykurqaku.

¹⁶ Chaymi pichqan tantakunatawan iskaynin challwakunata Jesus hapiykuspan hanaq pachata qawarispan Diosman graciasta qorqa, tantakunata pakiykuspanmi discipulonkunaman qorqa runakunaman aypunanpaq.

¹⁷ Llapallankum mikurqaku saksanankukama. Chaymantam puchuqta huñurqaku chunka iskayniyoq canasta huntata.

Jesusqa Cristopuni kasqanmanta

¹⁸ Sapaqpi Diosta Jesus mañakuptinmi discipulonkunapas chaypi kachkarqa. Paykunatam Jesus tapurqa: —¿Pim kasqaytataq runakunaqa ñoqamanta rimanku? —nispa.

¹⁹ Chaymi paykunañataq nirqaku: —Wakin runakunam nin Bautizaq Juan kasqaykita, wakinñataqmi nin Elias kasqaykita, wakinñataqmi nin: “Ñawpaq tiempopi willakuqmi huk kaqnin kawsariramun” nispa.

²⁰ Chaymi Jesusñataq nirqa: —Qamkunaqa ¿pim kasqaytataq ninkichik? —nispa. Hinaptinmi Pedroñataq nirqa: —Qamqa kanki Diosmanta hamuq Cristom —nispa.

Wañunanmanta Jesuspa willakusqan

²¹ Chayraykum paykunata avisaspa kamachirqa ama pimanpas willakunankupaq.

²² Paykunatam nirqa: —Diosmanta Hamuq Runataqa judiokunapa kamachiqninkunam *f**sacerdotekunapa jefenkunapiwan hinaspa Diospa leynin yachachiqkunapiwan ñakarichispa qepanchakuwanqaku, wañuchiwaptinkum kimsa punchawmanta kawsarimusaq —nispa.

²³ Chaymantam llapanta nirqa: —Pipas qatiwayta munaspaqa, amaña kikillanpaq kawsaspayá sapa punchaw ñakaristinpas qatiwachun.

²⁴ Pipas vidallan cuidakuqqa pierderunqam, pipas ñoqarayku wañuqmi ichaqa salvakunqa.

²⁵ Runaqa ¿imatataq horqokunman lliw kay pachapi kaqkunata ganaruspan vidantañataq pierderuspaqa?

²⁶ —Diosmanta Hamuq Runa kanchariyniywan hinaspa Taytaypa chaynataq chuya angelkunapa kanchariyninwan kutimuspaymi penqakusaq ñoqamanta penqakuqkunamanta, penqakusaqtaqmi rimasqaykunamanta penqakuqkunamantapas.

²⁷ Nikichikmi, wakin kaypi kaqkunamantam wakinkuna mana wañunqachu Diospa munaychakusqanta rikunankukama.

Jesuspa rikchaynin tikrakurusqanmanta

²⁸ Chay rimarisqanmanta pusaq punchaw pasaruptinmi Jesus rirqa orqoman Diosta mañakuq, Pedrota, Juanta hinaspa Jacobota pusarikuspan.

²⁹ Mañakuchkaptinmi uyanpa rikchaynin tikrakururqa, pachankunapas yuraqyaruspam llipipipirqa.

³⁰ Iskay runakuna rikuriykuspanmi paywan parlarqa. Paykunaqa karqa Moiseswan Eliasmi.

³¹ Achkirichkaq rikuriykuspam rimarqaku Jerusalenpi Jesuspa wañunanmanta.

³² Pedroñataqmi wakinkunapiwan puñuywan aysachikuchkaspankupas rikchaspa qawarqaku Jesuspa hinaspa parlaqmasinkunapa achkiriyninta.

³³ Chay iskay runakuna pasakuchkaptinñam rimasqantapas mana musqakustin Jesusta Pedro nirqa: —Yachachikuq ¡allinpaqchá kaypiqa kachkaniku! Rurarusaqkuyá kimsa ramadata, hukta qampaq, hukta Moisespaq, huktañataq Eliaspaq —nispa.

³⁴ Rimachkaptinraqmi puyu rikuriykamuspa paykunata tapaykurqa chaymi mancharikururqaku.

³⁵ Puyu ukumantañataqmi nimurqa: —Paymi akllasqay Churiy, paytayá uyariychik —nispa.

³⁶ Upallaruptillanmi Jesusllataña qawarirqaku, sonqollankupi chay rikusqankuta hatallispankum chay punchawkunapiqa mana pimanpas willakurqakuchu.

Wañuy mañayoq warmata Jesus sanoyachisqanmanta

³⁷ Orqomanta paqarinnintinta uraykamuptinkuñataqmi achka-achka runa paykunaman taripaykurqaku.

³⁸ Paykunamanta lloqsiykuspanmi huknin runa qaparirqa: —Yachachikuq, ruegakuykim kay sapallan churiyta qawaykunaykipaq.

³⁹ Payta demonio hapiruspanmi qonqaymanta qaparkachachin, taspispanmi posoqollataña aqtuchin. Eqoyarachispanñam sasa-sasata kacharinpas.

⁴⁰ Discipuloykikunata ruegakuptiypas manam qarqoyta atirqakuchu —nispa.

⁴¹ Chaymi Jesusñataq nirqa: —Mana allin ruraqkunapa castan mana creeq runakuna ¿haykapikamataq qamkunawan kasaq kaykuna aguantanaypaq? Asuykachimuway chay churikita —nispa.

⁴² Warma asuykuchkaptinmi demonio wikaparuspan puramenteta chutaykachachirqa. Demoniota Jesus qaqcharuptinmi warma sanoyarurqa, chayñam taytanman qoykurqa.

⁴³ Chaymi Diospa hatun atiyninmanta llapallan runakuna admirakurqaku. Tukuy rurasqankunamanta llapallan runakuna admirasqallaña kachkaptinkum discipulonkunata Jesus nirqa:

Wañunanmanta Jesus huktawan willakusqanmanta

⁴⁴ —Allintayá uyariychik: Diosmanta Hamuq Runataqa runakunamanmi qoykuwanqaku —nispa.

⁴⁵ Discipulonkunam ichaqa mana entienderqakuchu pakasqa hina kasqanrayku, manchakurqakutaqmi tapukuytapas.

Pim punta kaq kasqanmanta

⁴⁶ Jesuspa discipulokunam atipanakurqaku mayqanninmi aswan reqsisqa kanankumanta.

⁴⁷ Paykunapa atipanakusqanta Jesus yacharuspanñataqmi warmachata ñawpaqninpi sayaykachispan nirqa:

⁴⁸ —Kay warmachata ñoqapa sutiypi pipas chaskiqqa ñoqatam chaskiwan, pipas ñoqata chaskiwaqniyñataqmi kachamuwaqniy Taytayta chaskin. Qamkunamanta mayqannikichikpas aswan humillakuqmi aswan reqsisqaqa kanqa.

Jesuspa favorninpi kaqkunamanta

⁴⁹ Juanñataqmi nirqa: —Señor, huk runatam rikuramurqaniku qampa sutikipi demoniokunata qarqochkaqta hinaptinmi michakamurqaniku puriqmasinchik mana kasqanrayku.

⁵⁰ Jesusñataqmi nirqa: —Ama michakuychikchu, pipas mana contraykichikpi kaspaqa favornikichikpim kachkan —nispa.

Juantawan Jacobota Jesus qaqchasqanmanta

⁵¹ Hanaq pachaman kutinan tiempoña kaptinmi valorchakuykuspa Jerusalenman Jesus pasarqa.

⁵² Ichaqa ñawpachirqam willakuqkunata. Paykunam Samaria lawpi huk llaqtachaman chayaruspanku Jesusta samachinankupaq wasita maskarqaku.

⁵³ Chay llaqtachapi runakunam ichaqa mana samaykachirqakuchu Jerusalenman risqanta qawarispanku.

⁵⁴ Discipulon Jacobopiwan Juanñataqmi uyariruspa nirqaku: —Señorllayku, munaptikiqa cielomantayá ninata uraykarachimusun kay runakunata ruparunanpaq —nispa.

⁵⁵ Jesusñataqmi paykunata qaqchaspan

⁵⁶ paykunawan huklaw llaqtachaman pasakurqa.

Jesus qatiy munaqkunamanta

⁵⁷ Ñanta richkaptinkum huk runa niykurqa: —Maytaña riptikipas qatikusqaykim —nispa.

⁵⁸ Jesusñataqmi nirqa: —Kanmi atoqkunapa uchkun, kantaqmi alton pawaq urpikunapapas *f**qesan, Diosmanta Hamuq Runapaqmi ichaqa mana kapuwanchu maypim puñuykunaypas —nispa.

⁵⁹ Huk runatapas nirqam: —Qatiway —nispa. Chaymi payñataq nirqa: —Señorlláy, qanwanmi risaq ichaqa dejaykuwayraq taytay wañukuptin pamparamunaykama —nispa.

⁶⁰ Chaymi Jesusñataq nirqa: —Diospaq wañusqakunayá wañuqkunataqa pampachunku. Qamyá ichaqa Diospa munaychakusqanmanta willakamuy —nispa.

⁶¹ Huk runapas nirqataqmi: —Señor, ñoqapas qatisqaykim ichaqa wasiypi kaqkunamantaraqyá despedikaykamusaq —nispa.

⁶² Hinaptinmi Jesusñataq nirqa: —Takllawan yapuchkaspan qepan qawariq runaqa manam Diospa munaychakusqanpaq hinachu.