Lucas 5 - Quechua Ayacucho Bible 1987

Jesus kamachiptin achkallataña challwarusqankumanta

¹ Genesaret otaq Galilea Qochapa patanpi Jesus kachkaptinmi paytapas kichkichanankukama runakuna huñunakaramurqa Diospa palabranta uyarinankupaq.

² Jesusmi iskay botekunata qochapa patanpi rikururqa. Challwirukunam botenkumanta lloqsispa mallankuta mayllachkarqaku.

³ Jesusmi Simon Pedropa botenman yaykuykuspan payta ruegakurqa uku lawman tanqariykunanpaq chaymi botepi tiyaykuspan runakunata yachachirqa.

⁴ Rimayta tukuruspanñataqmi Simonta nirqa: —Uku lawman boteta yaykuchispa mallaykichikkunawan challwamuychik —nispa.

⁵ Chaymi Simonñataq nirqa: —Señor, tukuy tutam challwarqaniku, manam chullallatapas hapirqanikuchu ichaqa nisqaykiman hinayá mallata wischumusaq —nispa.

⁶ Chaynata ruraspam achkallataña hapirurqaku mallankupas tipirinankama.

⁷ Chaymi paykunata yanapananpaq huknin botepi challwaqmasinkunataña qayakurqaku hinaptinmi paykuna asuykuptinña iskaynin boteman huntachirqaku yaqaña chinkaykunankama.

⁸ Chayta Simon Pedro qawaykuspanmi Jesuspa ñawpaqninpi qonqorakuykuspa nirqa: —Señor, asurikuy, ñoqaqa huchasapa runam kallani —nispa.

⁹ Payqa chaypi llapallan kaqkunapiwanmi admirasqallaña kachkarqaku challwata hapirusqankuwan.

¹⁰ Admirakurqataqmi Zebedeopa churin Juanwan Jacobopas. Paykunapas karqa Simonpa challwaqmasinkunam. Chaymi Simonta Jesus nirqa: —Ama manchakuychu, kunanmantaqa runakunatañam challwamunki —nispa.

¹¹ Qochapa patanman botekunata chayarachispankum chaypi tukuy imankuta saqeruspa Jesuswan pasakurqaku.

Leprawan onqoqta Jesus sanoyachisqanmanta

¹² Huk llaqtapi Jesus kachkaptinmi *f**leprawan onqoq runa payta rikuruspan ñawpaqninpi qonqoranpa kumukuykurqa: —Señorlláy, munaspaykiqa allinyaykachillawayá —nispan.

¹³ Hinaptinmi Jesus llachpaykuspan nirqa: —Arí, munanim, allinyayña —nispa. Hinaptinmi chaypunilla chay lepra onqoynin chinkarurqa.

¹⁴ Chaymi Jesus nirqa: —Amam pimanpas willakunkichu, aswanqa riyá *f**sacerdoteman chaynapi paywan qawachikamunaykipaq. Sanoña kasqaykita yachanankupaqmi ofrendata qonki Moisespa kamachisqanman hina.

¹⁵ Jesusmanta aswan-aswan rimaptinkum payta uyarinankupaq hinaspa allinyachisqa kanankupaq achkallaña runakuna huñunakamurqaku.

¹⁶ Jesusñataqmi chunniqkunaman asurikuspan chaypi Diosta mañakuq.

Suchu runata Jesus sanoyachisqanmanta

¹⁷ Huk kutipi Jesus yachachichkaptinmi chaypi tiyachkarqaku *f**fariseokunawan Diospa leynin yachachiqkuna, paykunaqa hamururqaku Galilea lawpi hinaspa Judea lawpi llapallan llaqtachakunamantawan Jerusalenmantam, chaypim Señorpa atiynin Jesuswan karqa onqoqkunata sanoyachinanpaq.

¹⁸ Suchu runata chakanapi wantumuqkunam Jesuspa kasqan wasiman chayarachimuspanku paypa ñawpaqninman apaykuyta munarqaku.

¹⁹ Ichaqa runakuna ñitinakuptinmi mana apaykuyta atispanku wasipa hawanmanña seqarurqaku. Chayta toqoruspam chakanapi uraykachirqaku Jesuspa ñawpaqninman.

²⁰ Chaymi Jesus paykunapa iñiyninta qawaykuspa chay suchuta nirqa: —Yaw tayta, huchaykikunatam pampachayki —nispa.

²¹ Diospa leynin yachachiqkunam *f**fariseokunapiwan piensachkarqaku: “¿Pitaq payqa, kaykunata rimaspan Diosta piñachinanpaqqa? Diosllam huchayoqkunata pampachaqqa” nispa.

²² Chayna piensasqankuta Jesus yachaspanmi nirqa: —¿Imanasqataq piensankichik chaynakunata?

²³ ¿Mayqan nisqaytaq facil kanman: Suchuta “huchaykikunatam pampachayki” nisqaychu icha: “Hatarispayki puriyña” nisqaychu?

²⁴ Kunanmi yachankichik Diosmanta Hamuq Runaqa huchakunata pampachanaypaq kay pachapi atiyniyoq kasqayta. Chaynata niruspanmi suchuta nirqa: —Qamtam niki, hatariy, puñunaykita hoqarispayki wasikiman ripukuy —nispa.

²⁵ Suchu llapankupa qayllanpi chaylla hatariruspanmi puñunanta hoqarispan Diosta alabastin ripukurqa wasinman.

²⁶ Chaypi kaqkunapas admirasqallañam Diosta alabarqaku hinaspam ancha mancharisqallaña nirqaku: —Mana haykapipas rikusqanchikkunatam kunanqa rikuykunchik —nispanku.

Discipulonpaq Leviyta Jesus qayasqanmanta

²⁷ Chaymanta Jesus pasakuspanmi Leviy sutiyoq *f**impuesto cobraqta tariykurqa cobrananpi tiyachkaqta, paytam nirqa: —Qatiway —nispa.

²⁸ Chaymi Leviy tukuy imantapas saqeruspan paywan rirqa.

²⁹ Paymi Jesuspaq hatun convidota wasinpi rurarqa. Mesapim mikurqaku achkallaña *f**impuesto cobraqkuna, paykunawantaqmi mikuchkarqa wakin runakunapas.

³⁰ Diospa leynin yachachiqkunam *f**fariseokunapiwan Jesuspa discipulonkunapa contranpi rimaspanku nirqaku: —¿Imanasqataq qamkunaqa mikuchkankichik hinaspa upyachkankichik impuesto cobraqkunapiwan huchasapakunawanqa? —nispa.

³¹ Chaymi Jesusñataq nirqa: —Sano runakunaqa manam necesitankuchu medico hampinanta ichaqa onqoqkunallam.

³² Ñoqaqa hamurqani manam justo runakuna qayaqchu aswanqa wanakunankupaq huchasapakuna qayaqmi —nispa.

Ayunaymanta Jesusta tapusqankumanta

³³ Jesustam nirqaku: —Bautizaq Juanpa chaynataq *f**fariseokunapa discipulonkunaqa anchallataña ayunaspam Diosta mañakunku. ¿Imanasqataq discipuloykikunaqa mikuyllapi hinaspa upyayllapi kakuchkanku? —nispa.

³⁴ Hinaptinmi Jesusñataq nirqa: —¿Yaqachum casamientoman riq runakunata ayunachiwaqchik paykunawanraq novio kachkaptinqa?

³⁵ Hamuq punchawkunapim ichaqa novio chinkaruptin ayunanqaku —nispa.

³⁶ Paykunamanqa nirqataqmi kay rikchanachiytapas: —Manam pipas mosoq pachata llikispanqa mawka pachataqa remiendanmanchu. Chaynata ruraspanqa yanqapaqmi llikinman mosoq pachataqa, mawka pachaman serasqanpas manam tupanmanchu.

³⁷ Manataqmi pipas churanmanchu manaraq poqosqa vinotaqa mawka odrekunapiqa, chay vino poqoruspanqa mawka odrekunatam toqyarachinman hinaptinmi vinopas usunman, odrekunapas mana valeqñam kanman.

³⁸ Manaraq poqosqa vinotaqa mosoq odrekunapim churana.

³⁹ Pipas poqosqa vinota mallichkaspan, mosoq vinota malliykuqqa “Poqosqa vinom aswan allinqa” ninqam.