Lucas 24 - Quechua Ayacucho Bible 1987

Jesuspa kawsarimusqanmanta

¹ Chay warmikunam domingo tutapayta miski asnaq preparasqanku olorkunata aparikuspa sepulturaman rirqaku.

² Sepultura punkupi rumitam tarirurqaku asurichisqataña

³ chaymi yaykuspanku Señor Jesuspa cuerpontaqa manaña tarirqakuchu.

⁴ Mana ima ruraytapas atichkaptinkum kancharichkaq pachayoq iskay runakuna paykunaman rikuriykurqa.

⁵ Mancharikuymanta pampakama kumukuykuptinkum chay runakuna nirqa: —¿Imanasqataq kawsakuqtaqa wañusqakuna ukupi maskachkankichik?

⁶ Payqa manam kaypiñachu kachkan, aswanqa kawsarirunmi. Yuyariychikyá, Galilea lawpi kachkaspanraqmi nisurqankichik:

⁷ “Diosmanta Hamuq Runataqa huchasapa runakunamanmi qoykuwanqaku chakatawanankupaq, ichaqa kimsa punchawmantam kawsarimusaq” nispa.

⁸ Hinaptinmi chayraq yuyarirurqaku Jesuspa chayna nisqanta.

⁹ Sepulturamanta kutiruspankuñataqmi willarqaku chunka hukniyoq *f**apostolkunamanwan wakinkunaman tukuy chaykuna pasakusqanmanta.

¹⁰ Apostolkunaman willaqkunam karqa Magdala llaqtayoq Maria, Juana, Jacobopa maman Maria hinaspa wakin warmikuna.

¹¹ Chayta uyariqninkunam cuentopaq hapispanku mana creerqakuchu chay warmikunapa willakusqanta.

¹² Pedrom ichaqa sepulturaman kallparqa, kumuykuspan sepulturata qawaykuptinmi sabanasllaña chaypiqa kachkasqa. Chaynata qawaykuspanmi admirasqallaña kutirirqa.

Emaus llaqtaman riqkunaman Jesuspa rikuriykusqanmanta

¹³ Jerusalenmanta iskay legua masninpi tarikuq Emaus llaqtachamanmi chay domingo punchawpi richkarqaku Jesuspa iskay puriqmasinkuna.

¹⁴ Tukuy ima sucedekusqanmanta parlastinmi richkarqaku.

¹⁵ Rimaspa hinaspa tapunakuspa rimachkaptinkum paykunaman Jesus asuykuspan paykunawan rirqa.

¹⁶ Aswanqa manam pay kasqanta reqsirqakuchu telawan hina ñawinku harkachisqa kasqanrayku.

¹⁷ Jesusmi paykunata tapuykurqa: —¿Imamantataq puristin tapunakuchkankichik? —nispa. Chaymi llakisqallaña sayaykurqaku.

¹⁸ Hinaptinmi Cleofas sutiyoq runa payta nirqa: —Jerusalenpi llapallan runakunam yachanku kay punchawkunapi tukuy ima sucedekusqantaqa ¿hinaptinchum chaypi *f**yachachkaspaykipas qamlla chaytaqa mana yachanki? —nispa.

¹⁹ Chaymi Jesusñataq nirqa: —¿Imataq pasakurqa? —nispa. Hinaptinmi paykunañataq nirqaku: —Rimachkanikuqa Diosmanta willakuq Jesus Nazarenomantam. Payqariki Diospa qayllanpipas chaynataq runakunapa qayllanpipas atiywanmi milagrokunata rurarqa chaynataq yachachirqapas.

²⁰ Ichaqa *f**sacerdotekunapa jefenkunam, kamachikuqkunapiwan wañunanpaq sentenciarurqaku hinaspam chakatarurqaku.

²¹ “Payqa Israel naciontachiki libranqa” nispaykum ñoqaykuqa suyachkarqaniku. Kunanwanqa kimsa punchawñam chaykunapa sucedekusqanqa.

²² Aswanqa admirasqataqmi kachkaniku. Ñoqaykuwan kaq warmikunam sepulturanman rirqaku.

²³ Paykuna kutiramuspankum willawarqaku Jesuspa cuerpontaqa manaña tarimusqankumanta, paykunamansi angelkuna rikuriykuspa nisqa: “Jesusqa kawsachkanmi” nispa.

²⁴ Hinaptinmi ñoqaykuwan kaqkunamanta wakinkuna sepulturaman rispanku warmikunapa nisqanta hinalla tariykamurqaku, Jesuspa cuerponpas manas chaypiñachu.

²⁵ Chaymi Jesus paykunata nirqa: —Mana yuyayniyoq runakuna, qamkunaqa Diosmanta willakuqkunapa tukuy ima nisqankutapas sasallaña creeqmi kankichik.

²⁶ ¿Hanaq pachaman kutinanpaqqa manachum Cristoqa chaykunata ñakarinan karqa?

²⁷ Moisespa qellqasqan librokunamanta qallarispam Diosmanta willakuqkunapa libronkunapi tukunankama kikinmanta rimaqta entiendechirqa.

²⁸ Emaus llaqtachaman chayaruptinkum karutaraq richkaq hina ñanman churakuykuptin

²⁹ paykunañataq harkarqaku: —Tardeñam, ñoqaykuwan kuskayá kaypi samakuy, tutaykamuchkanñam —nispa. Jesusmi paykunawan samananpaq yaykuykurqa.

³⁰ Mesaman tiyaykuptinkuñataqmi tantata hapiykuspan graciasta qorqa. Pakiykuspanñataqmi paykunaman qoykarirqa.

³¹ Hinaptinmi chay ratollapi ñawinku mosoqmanta kicharikuruptin payqa Jesus kasqanta reqsirurqaku. Payñataqmi chinkarurqa qawachkaptinku.

³² Paykunañataqmi admirasqallaña ninakurqa: —¿Manachum sonqonchik ruparirqa ñanpi parlapayawaptinchik hinaspa Bibliamantapas entiendechiwaptinchik? —nispa.

³³ Chay ratollapim Jerusalen llaqtaman kutirirqaku, chaypim tariykurqaku huñunasqata chunka hukniyoq discipulokunata compañaqninkunatawan.

³⁴ Paykunam ninakuchkasqa: —Cheqaptapunim Señorqa kawsarirusqa. Pedromanpas rikuriykuñam —nispa.

³⁵ Hinaptinmi Emaus llaqtamanta kutiqkunapas willakurqaku imam ñanpi pasakuqmanta hinaspa mesapi tantata pakiptin reqsirusqankumanta.

Discipulonkunaman Jesuspa rikuriykusqanmanta

³⁶ Chaykunamanta rimachkaptinkuraqmi chawpinkupi Jesus rikuriykuspan nirqa: —Hawkalla kaychik —nispa.

³⁷ Hinaptinmi paykunañataq qonqaymanta mancharikururqaku alma kasqanta piensaspanku.

³⁸ Chaymi Jesusñataq nirqa: —¿Imanasqataq mancharisqallaña kachkankichik? ¿Imanasqataq ñoqa kasqaymanta iskayrayachkankichik?

³⁹ Qawaychik makiykunatawan chakiykunata. Munaspaykichikqa llachpaykuwaychik ñoqapuni kasqayta yachanaykichikpaq. Almaqa mana cuerpoyoqmi, mana tulluyoqmi, ñoqam ichaqa cuerpoyoq kachkani.

⁴⁰ Chaynata nispanmi clavospa yaykusqan makinkunatawan chakinkunata paykunaman qawaykachirqa.

⁴¹ Kusikuymantawan admirakuymanta manaraq creeptinkum Jesus tapuykurqa: —¿Imallaykichikpas kachkanchu kaypi mikuykunaypaq? —nispa.

⁴² Hinaptinmi kankasqa challwapa partenta qoykuptinku

⁴³ paykunapa qayllanpi mikuykurqa.

⁴⁴ Paykunatam nirqa: —Kaykunaqa sucedekun Moisespa qellqasqankuna, Diosmanta willakuqkunapa qellqasqankuna hinaspa Salmos libropi qellqasqa kaqkuna cumplikunanpaqmi. Chaytaqa qamkunawan kachkaspayraqmi willarqaykichik.

⁴⁵ Yuyayninkuta kichaykuptinmi chayraq entiendeykurqaku Bibliapa nisqanta.

⁴⁶ Chaymi paykunata Jesus nirqa: —Qellqasqaman hinamá ñoqa Cristoqa ñakarispa hinaspa wañuspa kimsa punchawninman kawsarimunay karqa

⁴⁷ chaynapi Jerusalenpipas hinaspa tukuy nacionkunapipas willakuptinku runakuna wanakuspa huchankumanta pampachasqa kanankupaq.

⁴⁸ Chaynaqa, kaykunamantaqa qamkunam testigo kankichik.

⁴⁹ Qamkunamanmi kachamusaq Taytapa prometesqan Chuya Espirituta. Kay Jerusalen llaqtapim suyaykunkichik hanaq pachamanta hamuqpa atiynin chaskinaykichikkama.

Hanaq pachaman Jesuspa ripukusqanmanta

⁵⁰ Chaynata rimaruspanmi Betaniaman paykunata pusarqa. Chaypim makinkunata hoqariykuspan paykunata bendecirqa.

⁵¹ Hinaspam altoman hoqarikuspa paykunamanta chinkarurqa hanaq pachaman apasqa kaspan.

⁵² Paykunañataqmi adoraspanku sinchi kusisqallaña Jerusalenman kutirirqaku.

⁵³ Tukuy tiempom templopi kaspanku Diosta alabaqku.