Lucas 23 - Quechua Ayacucho Bible 1987

Pilatopa qayllanman Jesusta pusasqankumanta

¹ Llapallankum Jesusta Pilatoman pasachirqaku.

² Paykunam Jesusta acusaspa nirqaku: —Kay runaqa nacionniykupi runakunatam umachachkan *f**impuestota Rey Cesarman amaña paganaykupaq. Payqa hapikuchkan Cristo otaq Rey kasqanpaqmi —nispa.

³ Chaymi Pilato tapurqa: —¿Qamchu kanki judiokunapa reynin? —nispa. Chaymi Jesusñataq nirqa: —Arí, qampa nisqaykiman hinam —nispa.

⁴ Hinaptinmi *f**sacerdotekunapa jefenkunatawan runakunata Pilato nirqa: —Paypiqa manam imatapas tarinichu sentencianaypaq hinaqa —nispa.

⁵ Paykunañataqmi qaparirqaku: —Chay runaqa Galilea lawpipas chaynataq Judea lawpipas kayman chayamunankamaraqmi runakunata yachachichkan gobiernopa contranpi —nispa.

Rey Herodespa qayllanman Jesusta pusasqankumanta

⁶ Galileamanta rimasqankuta uyariruspanmi Pilato tapurqa cheqapchus Jesusqa Galileamanta kasqanta.

⁷ Herodespa gobiernasqanmanta kasqanta yacharuspanñataqmi Herodesman pusachirqa. Payqa Galilea lawpi gobiernaq kachkaspanpas chay punchawkunapiqa Jerusalenpim kachkarqa.

⁸ Herodesmi Jesusta rikuykuspan anchallataña kusikurqa. Paymanta uyarispanmi unayña munarqa ima milagro rurasqanpas qawaykuyta.

⁹ Achka kutita tapupayaptinpas Jesusqa manam imatapas rimarirqachu.

¹⁰ Chaypitaqmi kachkarqa *f**sacerdotekunapa jefenkunawan Diospa leynin yachachiqkunapas, paykunam Jesusta uyanpipuni acusachkarqaku.

¹¹ Herodesmi soldadonkunapiwan Jesusta despreciarqaku, burlakuspam suma-sumaq pachawan churaykachispa Pilatoman kutirichirqa.

¹² Herodeswan Pilato cheqninakusqa kachkaspankupas chay punchawpim amistarurqaku.

Jesusta wañunanpaq sentenciasqankumanta

¹³ Pilatom huñurachimurqa *f**sacerdotekunapa jefenkunata, judiokunapa kamachiqninkunata hinaspa wakin runakunata,

¹⁴ paykunatam nirqa: —Kay runatam pusamuwarqankichik: “Runakunatam hoqarin gobiernopa contranpi” nispaykichik. Aswanqa qayllaykichikpi tapuspaymi acusasqaykichikman hinaqa ima faltantapas mana tarinichu.

¹⁵ Mana huchayoq kasqanta yachaspanmi Herodespas kutirachimuwan. Qawasqaykichikpi hinapas manam imatapas rurarqachu wañunanpaq hinaqa.

¹⁶ Azotechispaymi kachaykusaq —nispa. [

¹⁷ *f**Pascua Fiestapim watan-watan Pilato huk presota kacharinan karqa.]

¹⁸ Aswanqa llapallankum qaparirqaku: —Chay Jesusta wañuchispayki Barrabasta kachaykapuwayku —nispa.

¹⁹ Chay Barrabasmi gobiernopa contranpi runakunata hatarirachisqanmanta hinaspa runa wañuchisqanmanta carcelpi kachkarqa.

²⁰ Jesusta kachaykuyta munaspanmi paykunata Pilato rimapayarqa.

²¹ Chaymi paykunañataq astawanraq qaparirqaku: —¡Chakataruy! ¡Chakataruy! —nispa.

²² Hinaptinmi Pilatoñataq kaywanqa kimsa kutitaña nirqa: —¿Ima mana allintañataq payqa rurarurqa? Wañunanpaq hinaqa manam ima faltantapas tarinichu. Azoterachispaymi kachaykusaq —nispa.

²³ Chakatananpaq mañaspankum astawanraq qaparirqaku. Chaynapimá runakunapa mañakusqanman hina rurarqa.

²⁴ Jesustamá wañunanpaq Pilato sentenciaykurqa.

²⁵ Runakunapa mañakusqanku Barrabastam ichaqa kachaykachirqa. Paymá gobiernopa contranpi runakunata hatarichispan runatapas wañurachirqa. Jesustam ichaqa runakunaman entregaykurqa munasqankuta ruranankupaq.

Jesusta chakatasqankumanta

²⁶ Chakatanankupaq Jesusta pusaspankum chakramanta kutichkaptin Cirene llaqtayoq Simonta hapirurqaku, paymanña cruzninta hombrochiptinkum Jesuspa qepanta rirqa.

²⁷ Paypa qepantam rirqa achkallaña runakuna, warmikunapas achkallañam rirqaku Jesusmanta qaparillawanña waqastin.

²⁸ Paykunata qawarispanmi Jesus nirqa: —Jerusalen llaqtayoq warmikuna, amayá ñoqamantaqa waqaychikchu, waqaspaqa-waqaychik kikikichikmantawan wawaykichikkunamantayá.

²⁹ Hamuq punchawkunapim ninqaku: “¡Mayna kusisqam mana wachakuqkunaqa hinaspa mana wawa ñuñuq señorakunaqa!” nispa.

³⁰ Runakunam orqokunata ninqaku: “Tuñiykamuy” nispa, moqokunatañataqmi ninqaku: “Pakaykuwayku” nispa.

³¹ Kawsaq sachata kaynata ruraspankuqa ¿imananqakuraq chakisqa sachataqa?

³² Pusarqakutaqmi mana allin ruraq iskay runakunatapas Jesuswan kuskata wañuchinankupaq.

³³ Calavera sutiyoq moqoman chayaruspankum chakatarqaku Jesusta, chakatarqakutaqmi mana allin ruraq iskaynin runakunatapas, huknintam chakatarqaku *f**alleq lawninpi, huknintañataqmi chakatarqaku *f**ichoq lawninpi.

³⁴ [Chakatachkaptinkum Jesus nirqa: —Taytáy, pampachaykuy, manam yachankuchu imam rurasqankuta —nispa.] Soldadokunañataqmi Jesuspa pachanta sortearqaku mayqanmanpas tuparunanpaq.

³⁵ Llapa runakunapas sayaykuspam qawachkarqaku imam pasakusqanta, judiokunapa kamachiqninkunapas burlakuspam nirqaku: —Wakin runakunatam librarqa, chaynaqa kikinyá librakuchun Diospa akllasqan cheqap Cristo kaspanqa —nispa.

³⁶ Soldadokunapas asuykuspankum vinagreta mallichispanku burlakurqaku:

³⁷ —Judiokunapa reynin kaspaykiqa, kikillaykiyá librakuy —nispanku.

³⁸ Cruzninpa umanpim qellqasqa karqa: “KAYMI JUDIOKUNAPA REYNIN” niq.

³⁹ Chaypi warkusqa mana allin ruraq runapas Jesustam kamirqa: —Cristo kaspaykiqa librakuspayá ñoqaykutapas librawayku —nispa.

⁴⁰ Hukninñataqmi chay kamiq runata qaqcharqa: —¿Qampas wañunaykipaq sentenciasqa kachkaspaykichum Diosta mana manchakunki?

⁴¹ Mana allin rurasqanchikmantam ñoqanchikqa kaypi ñakarichkanchik, paymi ichaqa ñakarichkan mana imamanta.

⁴² Chaynata niruspanmi Jesusta niykurqa: —Jesus, munaychakusqaykiman chayamuspaykiqa yuyarillawankimá —nispa.

⁴³ Chaymi Jesusñataq nirqa: —Cheqaptam niki, kunanpunim ñoqawan kanki *f**paraisopi —nispa.

Jesusmi wañukun

⁴⁴ Kay pacham tutayarurqa yaqa chawpi punchawmanta las treskama.

⁴⁵ Inti tutayaruptinmi templopi santuario rakiq rakta telapas llikikururqa.

⁴⁶ Jesusñataqmi qaparirqa: —Taytáy, espirituytam qomuyki —nispa. Chaynata niruspanmi wañukurqa.

⁴⁷ Soldadokunapa capitanninmi chay pasasqankunata qawaspan Diosta alabarqa: —Cheqaptapunim kay runaqa mana huchayoq kasqa —nispa.

⁴⁸ Pasasqanta qawananpaq lliw huñunakuqkunam chayta qawaspanku qasqonkuta takakustin asurikurqaku.

⁴⁹ Jesuspa reqsinakusqankunañataqmi Galilea lawmanta riq warmikunapiwan karullamanta qawachkarqaku.

Jesusta pampaykusqankumanta

^50-51 Karqam judiokunapa cortenpi consejero Josey sutiyoq allin justo runa. Payqa karqa Judea lawpi kaq Arimatea llaqtayoqmi. Payqa manam hukllachu karqa *f**cortepi tanteasqankuwanpas nitaq rurasqankuwanpas, paypas Diospa munaychakusqantam suyachkarqa.

⁵² Paymi rirqa Pilatoman Jesuspa cuerponta mañaq.

⁵³ Cruzmanta uraykachispanmi fino sabanaswan wankuykurqa hinaspam pipapas manaraq pampakusqan qaqapi toqosqa sepulturaman churaykurqa.

⁵⁴ Chaykunaqa sucedekurqa *f**samana punchawpaq preparakunanku punchawpim otaq samana punchawpaq tumpallaña faltachkaptinmi.

⁵⁵ Galilea lawmanta Jesuswan riq warmikunapas sepulturantaqa rikurqakum, rikurqakutaqmi imaynam cuerpon churasqankutapas.

⁵⁶ Wasinkuman kutiruspankuñataqmi olorkunatawan miski asnaq hampita prepararqaku hinaspam leyman hina *f**samana punchawpi samarqaku.