Lucas 22 - Quechua Ayacucho Bible 1987

Jesusta wañurachinankupaq tanteanakusqankumanta

¹ Mana Qonchuyoq Tanta Mikunanku otaq *f**Pascua Fiestam hichpamuchkarqaña.

² Hinaptinmi *f**sacerdotekunapa jefenkunawan Diospa leynin yachachiqkuna runakunata manchakuspanku imaynam Jesus wañurachiyta maskarqaku.

³ Chunka iskayniyoq discipulonkunamanta Iscariotewan sutichasqanku Judasman *f**Satanas yaykuruptinmi

⁴ pay rirqa sacerdotekunapa jefenkunawan hinaspa templopi guardiakunawan parlaq, rirqaqa Jesusta imaynam traicionananpaq rimanakuqmi.

⁵ Chaymi kusisqallaña paganankupaq prometekurqaku.

⁶ Chaymi Judasñataq “allinmi” nispan runakunapa mana yachasqallanta maskarqa haykapim entregaykuyta.

Discipulonkunawan Jesus cenasqanmanta

⁷ Mana Qonchuyoq Tanta Mikunanku otaq *f**Pascuapi Diospaq carnero wañuchinanku punchawpim

⁸ Pedrotawan Juanta Jesus kacharqa pascua mikuyta alistamunankupaq.

⁹ Maypim mikunankupaq tapuptinkuñataqmi

¹⁰ Jesus nirqa: —Llaqtaman yaykuchkaspam puyñupi yaku apachkaq runawan tupankichik, paytam qatinkichik yaykusqan wasikama.

¹¹ Wasiyoqtam ninkichik: “Yachachikuqmi nimusunki: ‘¿Mayqan cuartopitaq *f**Pascua mikuyta cenasaq discipuloykunawan?’ nispa.”

¹² Chaymi qawachisunkichik hatun cuartota wasipa altosninpi ña allichasqataña, chaypiyá preparamuychik.

¹³ Rispankumá tariykurqaku Jesuspa nisqanman hina, chaypim *f**Pascua mikuyta prepararqaku.

¹⁴ Horaña karuptinmi *f**apostolninkunapiwan mikunanpaq tiyaykurqa.

¹⁵ Chaypim Jesus nirqa: —Manaraq ñakarichkaspaymi anchallataña munarqani qamkunawan kay pascua carnero mikuykuyta.

¹⁶ Nikichikmi: Manañam mikusaqchu Diospa munaychakusqanpi cumplikunankama —nispa.

¹⁷ Vinoyoq vasota hapiykuspanmi Diosman graciasta qoykuspan nirqa: —Kay vasomantayá sapakama tomaykuychik.

¹⁸ Nikichikmi: Kay vinotaqa manañam tomasaqñachu Diospa munaychakusqan chayamunankama —nispa.

¹⁹ Tantatapas hapiykuspanmi graciasta qorqa hinaspam parteykarispan nirqa: —Kaymi cuerpoy qamkunarayku entregasqa. Chaynatam qamkunapas rurankichik ñoqata yuyariwaspa —nispa.

²⁰ Cenaruspankuñataqmi vinoyoq vasota hapiykuspan nirqa: —Kay vinoqa yawarniywan rurasqa mosoq contratom. Yawarniyqa qamkunarayku chaqchusqam.

²¹ Traicionawaqniy runapa makinmi ñoqapawan kuska kay mesapa hawanpi kachkan.

²² Diosmanta Hamuq Runaqa Diospa nisqanman hinam wañusaq ichaqa ¡imaynaraq kanqa traicionawaqniy runaqa! —nispa.

²³ *f**Apostolkunañataqmi tapunakuyta qallaykurqaku: —¿Mayqanninchiktaq chaytaqa rurachwan? —nispa.

Jesuspa discipulonkunapa atipanakusqankumanta

²⁴ Discipulonkunam atipanakurqaku mayqanninkum astawan reqsisqa kanankumanta.

²⁵ Hinaptinmi Jesus nirqa: —Kay pachapi gobiernaqkunam runakunapi munaychakunku hinaptinmi munaychakusqan runakunañataq hapin allin ruraqpaq.

²⁶ Qamkuna ukupiqa manam chaynachu kanqa. Qamkunamanta aswan yuyayniyoq kaqqa sullka kaq hinam kanqa, kamachikuqñataqmi servikuq hina kanqa.

²⁷ ¿Mesapi tiyaqchu icha mesaman serviqchu aswan reqsisqaqa kanman? Cheqaptapunipas mesapi tiyaqmi. Ñoqam ichaqa serviqnikichik hina qamkuna ukupi kachkani.

²⁸ —Sasachakuypi kaptiypas qamkunaqa ñoqawanmi karqankichik.

²⁹ Munaychakunaykichikpaqmi derechota qoykichik imaynam ñoqamanpas Taytay qowasqanman hina.

³⁰ Munaychakuptiymi qamkunapas ñoqawan mikunkichik hinaspa tomankichik, juezkuna hina tiyaykuspam Israelpa chunka iskayniyoq ayllunkunata juzgankichik.

Jesusta Pedro negananmanta

³¹ Señormi nirqa: —Simon, Simon, trigota hina suysusunaykichikpaqmi *f**Satanas mañakurun.

³² Ichaqa ñoqam Diosta mañakurqani iñiyniki mana pisinanpaq. Kutirimuspaykim iñiqmasikikunata kallpanchanki takyanankupaq —nispa.

³³ Chaymi Pedroñataq nirqa: —Señor, ñoqaqa listom kachkani qanwan kuska carcelman rinaypaqpas chaynataq qanwan kuska wañunaypaqpas —nispa.

³⁴ Hinaptinmi Jesusñataq nirqa: —Pedro, kaytam niki: Kunanpunim manaraqpas gallo waqaramuchkaptin reqsiwasqaykita kimsa kutikama negakunki —nispa.

Ñakarinanmanta yapatawan Jesuspa nisqanmanta

³⁵ Discipulonkunatam Jesus nirqa: —Mana qollqeyoqta, mana wayqayoqta hinaspa mana *f**usutayoqta allin noticiata willakuq kachaptiyqa ¿imapas pisisurqankichikchu? —nispa. Chaymi paykunañataq nirqaku: —Manam imapas pisiwarqakuchu —nispa.

³⁶ Hinaptinmi Jesusñataq nirqa: —Kunanyá ichaqa qollqekichikpas chaynataq wayqaykichikpas kaptinqa apaychik. Espadaykichik mana kaptinqa pachaykichikta *f**rantikuspayá rantiychik.

³⁷ Nikichikmi, ñoqamanta Bibliapi qellqasqa kaqmi cumplikunan, chaypim nin: “Mana kasukuq runakunaman hukllawasqam karqa” nispa. Ñoqamanta qellqasqa kaqkunaqa cumplikunqam.

³⁸ Chaynata Jesus niruptinmi paykunañataq nirqaku: —Señor, kayqa iskay espada —nispa. Jesusmi nirqa: —Chayllapaqñam —nispa.

Getsemani huertapi Jesus mañakusqanmanta

³⁹ Chaymanta lloqsiruspanmi hina rinan Olivos Moqoman Jesus pasakurqa, discipulonkunapas paywanmi rirqaku.

⁴⁰ Chayaruspanmi discipulonkunata nirqa: —Diosta mañakuychik ama tentasqa kanaykichikpaq —nispa.

⁴¹ Hinaspam paykunapa tumpa waklawninman asuriruspan qonqorakuykuspan Diosta mañakurqa.

⁴² Chaymi Jesus nirqa: —Taytáy, munaspaykiqa kay ñakariymantayá libraykuway ichaqa amayá ñoqapa munasqaychu kachun aswanqa qampa munasqaykiyá —nispa. [

⁴³ Hinaptinmi hanaq pachamanta angel rikuriykurqa kallpanchaykunanpaq.

⁴⁴ Llumpay llakisqallaña kaspanmi tukuy kallpanwan Diosta mañakurqa. Chikachachaq yawar sutuq hinaraqmi sudorninpas pampaman suturqa.]

⁴⁵ Mañakusqanmanta Jesus hatarispanmi discipulonkunaman asuykurqa, paykunatam tariykurqa llakimanta puñukuchkaqta.

⁴⁶ Chaymi nirqa: —¿Imanasqataq puñukuchkankichik? Hatarispayá Diosta mañakuchik ama tentasqa kanaykichikpaq.

Jesusta presochasqankumanta

⁴⁷ Jesus chaynata rimachkaptinraqmi Judas sutiyoq runapa pusasqan achkallaña runakuna rikuriykamurqa. Judasqa chunka iskaynintin discipulonkunapa hukninmi karqa. Jesusman asuykuspa muchaykuptinmi

⁴⁸ Jesusñataq nirqa: —¿Judas, Diosmanta Hamuq Runatachum muchaykuspa traicionaruwanki? —nispa.

⁴⁹ Chaykuna pasasqanta qawaspankum discipulonkuna nirqaku: —Yachachikuq ¿peleasaqkuchu espadaykuwan? —nispa.

⁵⁰ Chaymi huknin discipulon sacerdotekunapa jefenpa runanpa *f**alleq rinrinta qorururqa. Chaymi Jesusñataq:

⁵¹ —Dejaychik —nispan chay runapa rinrinta llapchaykuspan sanoyarachirqa.

⁵² Hinaspam *f**sacerdotekunapa jefenkunata, templopi guardiakunapa jefenta hinaspa judiokunapa kamachiqninkunata nirqa: —¿Suwatapas hapiq hinachum hamurqankichik espadayoq hinaspa kaspiyoq?

⁵³ Sapa punchawmi ñoqaqa qamkunawan karqani templopi, ichaqa manam presochawarqankichikchu. Ñam qamkunapa ruranaykichik horaña, kunanqa tutayaypi kamachikuqñam munaychakuchkan.

Jesusta Pedro negasqanmanta

⁵⁴ Jesusta presocharuspankum *f**sacerdotekunapa jefenpa wasinman pusarqaku. Pedroñataqmi karu qepallanta qatirqa.

⁵⁵ Patiopi ninata ratachispanku tiyaykuptinkum, Pedropas paykunawan kuska tiyaykurqa.

⁵⁶ Ninapa achkiyninwan Pedrota tiyachkaqta huk sirvienta qawarispanmi nirqa: —Kay runaqa Jesuspa puriqmasinmi —nispa.

⁵⁷ Chaymi Pedroñataq negakuspa nirqa: —Manam reqsinichu —nispa.

⁵⁸ Tumpa unayneqmantam hukpas rikuruspan nirqa: —Qampas paykunamanta kaqmi kanki —nispa. Hinaptinmi Pedroñataq nirqa: —Manam ñoqachu kani tayta —nispa.

⁵⁹ Huk horamanta hinañataqmi hukpas uyanpi niykurqa: —Cheqaptapunim kay runapas Jesuswan karqa, paypas Galilea lawmanta kaqmi —nispa.

⁶⁰ Chaymi Pedroñataq nirqa: —Imatachá rimakunkipas tayta —nispa. Chaynata rimachkaptinraqmi gallo waqaramurqa.

⁶¹ Jesus muyuriykuspa Pedrota qawariykuptinmi Pedro yuyarirurqa Señorpa nisqanta, paymi nirqa: “Kunanpunim manaraqpas gallo waqaramuchkaptin reqsiwasqaykita kimsa kutikama negakunki” nispa.

⁶² Chaymi hawaman lloqsiruspan aminankama waqakurqa.

Jesusta burlakusqankumanta

⁶³ Jesusta cuidaq runakunam paymanta burlakurqaku hinaspa waqtarqaku.

⁶⁴ Ñawin watasqata uyanpi takaspankum nirqaku: —Musyakuy ¿pitaq maqasuchkanki? —nispa.

⁶⁵ Tukuyta nispankum insultarqaku.

Jesus juzgasqa kasqanmanta

⁶⁶ Punchawña karuptinmi judiokunapa kamachiqninkunawan *f**sacerdotekunapa jefenkuna hinaspa Diospa leynin yachachiqkuna huñunakuruspanku Jesusta pusarqaku *f**corteman. Chaypim payta tapurqaku:

⁶⁷ —Niwayku ¿qamchu kanki Cristo? —nispa. Chaymi Jesusñataq nirqa: —“Arí” niptiyqa manam creewaqchikchu.

⁶⁸ Qamkunata tapuptiyqa manam contestawankichikchu.

⁶⁹ Aswanqa, Diosmanta Hamuq Runam kunanmantapuni tukuy atiyniyoq Diospa *f**alleqninpi tiyaykusaq.

⁷⁰ Chaymi llapallanku nirqaku: —Chaynaqa ¿Diospa Churinchu kanki? —nispa. Hinaptinmi Jesusñataq nirqa: —Arí ñoqam kani qamkunapa nisqaykichikpi hina —nispa.

⁷¹ Chaymi paykunañataq nirqaku: —Kayqaya kikinpuni rimarun ¿imapaqñataq testigotaqa munanchik? —nispa.