Lucas 20 - Quechua Ayacucho Bible 1987

Jesusqa kamachikunanpaq munayniyoq kasqanmanta

¹ Huk punchawmi runakunata templopi Jesus yachachispan allin noticiata willachkarqa, rimaptinmi *f**sacerdotekunapa jefenwan Diospa leynin yachachiqkuna hinaspa judiokunapa kamachiqninkuna chayaruspa

² tapurqaku: —Niwayku ¿ima derechoykiwantaq chaykunataqa rurachkanki? ¿Pitaq autorizasurqanki? —nispanku.

³ Chaymi Jesusñataq nirqa: —Ñoqapas tapusqaykichikyá:

⁴ ¿Pitaq bautizananpaq Juantaqa kachamurqa Dioschu icha runakunachu? —nispa.

⁵ Chaynata Jesus tapuptinmi kikinpura tanteanakurqaku: —“Sichum Diosmi kachamurqa” niptinchikqa, “¿Imanasqataq manaqa creerqankichikchu?” niwasunchiki.

⁶ Manataqmi nichwanchu “Runakunallam kachamurqa” nispaqa, chaynata niptinchikqa llapa runakunam rumiwan chamqaparuwachwan, Juantaqariki hapinku Diosmanta willakuqpaqmi —nispa.

⁷ Chaymi Jesusta nirqaku: —Manam yachanikuchu pipa kachamusqantapas —nispa.

⁸ Hinaptinmi Jesusñataq nirqa: —Manataqmi ñoqapas nisqaykichikchu ima derechoywanmi kaykuna rurasqaytapas —nispa.

Mana allin llamkaqkunawan rikchanachisqanmanta

⁹ Jesusmi rikchanachispan runakunata nirqa: —Huk runam chakranpi uvasta plantarurqa hinaspam llamkaq runakunaman chakranta arriendakuruspan unaypaq illarurqa.

¹⁰ Uvas cosecha chayaramuptinmi runanta kacharqa llankaqkunamanta tupaqninta mañamunanpaq. Paykunañataqmi runanta maqaparuspanku mana imayoqta kutirichirqaku.

¹¹ Yapatawanmi huknin runanta kacharqa, paytapas insultaspankum maqaparqaku hinaspam mana imayoqta kutirichirqaku.

¹² Kimsa kaqpipas kacharqaraqmi huknin runanta, ichaqa paytapas maqaparuspankum chakranmanta wischururqaku.

¹³ —Chakrayoqmi tantearqa: “¿Imatañataq ruraykusaq? Chaynaqa, kuyasqay churiytañayá kachasaq, paytaqa respetanqakuch” nispa.

¹⁴ Ichaqa chay llamkaqkuna payta rikuruspankum ninakurqaku: “Paymi chaskinqa herenciataqa, paytaqa wañurachisunyá ñoqanchikña dueño kananchikpaq” nispa.

¹⁵ Chakramanta horqoruspam wañurachirqaku. Jesusmi paykunata tapurqa: —Chaynaqa ¿imatataq ruranqa chakrayoqqa?

¹⁶ Payqa kutiruspanmi llamkaqkunata wañurachispan chakranta hukkunamanña arriendakunqa. Jesuspa chayna nisqanta uyariruspankuñataqmi: —Amayá Diospas chaytaqa munachunchu —nirqaku.

¹⁷ Paykunata qawarispanmi Jesus tapurqa: —¿Ima ninantaq: “Wasi perqaqkunapa wischupakusqanku rumiqa, cimientopi esquinan hapiq rumiñam rikurirurqa” nispa Bibliapa nisqanqa?

¹⁸ Chay rumiman wichiqkunam pakipasqa kanqaku, rumipa hapisqankunañataqmi ñutusqa kanqaku.

Impuesto paganapaq tapukuymanta

¹⁹ Diospa leynin yachachiqkunapiwan *f**sacerdotekunapa jefenkunam musyakururqaku Jesuspa rikchanachisqanqa paykunapa contranpi kasqanta. Chay ratollapi presocharuyta munaspapas manam atirqakuchu runakunata manchakusqankurayku.

²⁰ Chaymi justo tukuq runakunataña kacharqaku imapipas pantarachimunankupaq chaynapi chaymansumlla acusaspa prefectoman entreganankupaq.

²¹ Paykunam Jesusta nirqaku: —Yachachikuq, yachanikum qamqa imam kaqllata rimaspayki yachachisqaykita. Pimanpas mana sayapakuspaykim cheqapllata yachachinki Diospa munasqanman hina kawsananchikpaq.

²² Niykuwaykuyá: ¿Allinchu Rey Cesarman *f**impuesto pagayninchik icha manachu? —nispa.

²³ Llullawan tapusqankuta musyaruspanmi Jesus nirqa:

²⁴ —Qollqeta qawachiwaychik. Kay qollqepiqa ¿pipa uyanwan pipa sutintaq kachkan? —nispa. Hinaptinmi paykunañataq nirqaku: —Rey Cesarpam —nispa.

²⁵ Chaymi Jesusñataq nirqa: —Rey Cesarpa kaqtaqa paymanyá qoychik, Diosmanñataq paypa kaqta —nispa.

²⁶ Runakunapa qayllanpi mana pantaspa allinta contestaruptinmi admirasqallaña upallakururqaku.

Kawsarimuymantam tapunku.

²⁷ Wañuqkunapa kawsarimuynin negaq wakin *f**saduceokunam Jesusman asuykuspan tapurqaku:

²⁸ —Yachachikuq, Moisespa qellqasqanpim niwachkanchik: “Casado runa mana churiyoq wañuruptinqa, wawqenmi viudawan casarakunqa hinaptinmi churinpas wañukuqpa churin hinaña kanqa chaynapi wañukuqpa miraynin kananpaq” nispa.

²⁹ Huk kutipim qanchis wawqekuna karqa. Mayor kaq casarakuruspanmi mana churiyoq wañukurqa.

³⁰ Chaymi viudawanqa wañukuqpa sullkanña casarakururqa, ichaqa paypas mana churiyoqmi wañukurqa.

³¹ Kimsa kaq wawqenpas viudawan casarakuruspanmi mana churiyoq wañukurqa. Chaynallatam rurarqa qanchisnintin sullkankunapas, ichaqa paykunapas mana churiyoqmi wañukurqa.

³² Chaymantam viudapas wañukurqa.

³³ Chaynaqa wañuqkuna kawsarimuptinqa ¿mayqanpa warmintaq kanqa qanchisnintin paywan casarakuchkaptinqa? —nispa.

³⁴ Chaymi Jesusñataq nirqa: —Kay pachapi runakunaqa casarakunkum, hinaspapas casarachinakunkum.

³⁵ Hanaq pachaman chayaspa kawsarimunanpaq kaqkunaqa manañam casarakunkuchu nitaqmi casarachinakunkupaschu.

³⁶ Kawsarimuspankuqa manam wañunqakuñachu, paykunaqa angelkuna hinaña kaspam Diospa churin kanqaku.

³⁷ Wañuqkunapa kawsarimunanmantaqa Moisespas yachachirqam tankar kichkapi imam sucedekusqanwan. Señortam suticharqa Abrahampa Diosninwan, Isaacpa Diosninwan hinaspa Jacobpa Diosninwan.

³⁸ Chaynaqa Diosqa manam wañusqakunapa Diosninchu ichaqa kawsaqkunapa Diosninmi, paypaqa llapallanmi kawsachkan.

³⁹ Chaynata Jesus niruptinmi Diospa leynin yachachiqkunamanta wakinnin nirqa: —Yachachikuq, allintam rimarunki —nispa.

⁴⁰ Chayraykum manchakururqakuña tapukuytapas.

Cristoqa Rey Davidmantapas aswan hatun kasqanmanta

⁴¹ Jesusmi paykunata tapurqa: —¿Imaynanpitaq ninku Cristoqa Davidpa miraynin kasqanta?

^42-43 Davidmi Salmos libropi nichkan: “Señor Diosmi Señorniyta nirqa: ‘Enemigoykikunata vencenaykamayá *f**alleqniypi tiyay. Enemigokikunata saruchinaykamayá alleqniypi tiyaykuy’ nispa.”

⁴⁴ ¿Imaynataq Cristoqa Davidpa mirayninqa kanman, Davidpuni “Señorniy” nispa Cristomanta rimachkaptinqa?

Diospa leynin yachachiqkunata Jesus qaqchasqanmanta

⁴⁵ Llapa runakuna uyarichkaptinmi discipulonkunata Jesus nirqa:

⁴⁶ —Cuidakuychik Diospa leynin yachachiqkunamanta, paykunaqa qoysu pachawan puriytam gustanku, plazakunapipas respetollawanña rimaykunatam munanku, huñunakunanku wasikunapipas hinaspa convidokunapipas ñawpaqllapi tiyaytam munanku.

⁴⁷ Viudakunapa imallantapas qechuruspam allin runa tukuspa una-unayta Diosta mañakunku, chayraykum paykunaqa wakinmantapas aswan castigasqaraq kanqaku.