Lucas 19 - Quechua Ayacucho Bible 1987

Jesusmantawan Zaqueomanta

¹ Jerico llaqta ukunta Jesus pasachkaptinmi

² impuesto cobraq runakunapa jefen Zaqueo sutiyoq apu runa

³ Jesus reqsiykuyta munarqa, ichaqa manam atirqachu achkallaña runakuna kasqanrayku, payqa taksalla sayayniyoqmi karqa.

⁴ Kallpaylla ñawparuspanmi purun higos sachaman seqarurqa chayninta Jesus pasaptin reqsiykunanpaq.

⁵ Chay sitioman Jesus chayaruspanmi payta qawarispan sutinmanta qayaykurqa: —Zaqueo, chaylla uraykamuy, wasikipim kunan samasaq —nispa.

⁶ Utqayman uraykamuspanmi kusisqallaña wasinman pusarqa.

⁷ Rikuqninkunañataqmi Jesuspa contranpi rimarqaku: —Huchasapa runapa wasinmanmi yaykurun samakunanpaq —nispa.

⁸ Zaqueoñataqmi Señorpa qayllanpi sayaykuspa nirqa: —Señor, kapuqniykunatam partenta wakchakunaman qosaq, engañaspay suwakusqaykunamanñataqmi tawa kuti mirayniyoqtaña kutichipusaq —nispa.

⁹ Chaymi Jesusñataq nirqa: —Runakunapa salvaqninmi kay wasiman chayaramuni, kay runapas Abrahampa mirayninmanta kaqmi.

¹⁰ Diosmanta Hamuq Runaqa chinkasqakunata maskaspay salvaqmi hamurqani.

Serviqninkunaman qollqeta saqeykuspan illaruq apumanta

¹¹ Jerusalenman Jesus hichpachkaptinmi payta uyariqkuna piensarqaku Diospa munaychakusqanqa chay-chay punchawkunallapiña karunanmanta.

¹² Chayraykum rikchanachispan paykunaman nirqa: —Reqsisqa ayllumanta kaq runam huklaw nacionta rirqa rey kananpaq nombramienton chaskiq.

¹³ Manaraq richkaspanmi chunkantin serviqninkunata qayaykuspan sapakamaman waranqa qollqeta qoykarirqa: “Kutimunaykamam kaywan negociachkankichik” nispa.

¹⁴ Illaruq runapa enemigonkunañataqmi paypa qepallanta comisionta pasachirqaku: “Manam munanikuchu chay runaqa reyniyku kananta” nispa.

¹⁵ Rey kananpaq nombrasqaña llaqtanman kutiruspanmi qollqe qosqan serviqninkunata qayachirqa chaynapi sapakamapa qollqe mirachisqanta yachananpaq.

¹⁶ Punta kaq hamuruspanmi nirqa: “Señor, qollqekiqa huk chunka waranqatawanmi mirarun” nispa.

¹⁷ Chaymi reyñataq nirqa: “Kusallañam, allin sirviente. Pisillapas saqesqaywan confianapaq kasqaykimantam chunka llaqtapa gobiernaqnin kanki” nispa.

¹⁸ Chaymantañataqmi huknin hamuq nirqa: “Señor, qollqekiqa pichqa waranqatawanmi mirarun” nispa.

¹⁹ Chaymi reyñataq nirqa: “Qampas pichqa llaqtatam gobiernanki” nispa.

²⁰ Hukninñataqmi nirqa: “Señor, kayqa qollqeki. Kipuykuspaymi hinallata churapurqayki.

²¹ Manchakurqaykim qollqekitaqa mana kachariq kasqaykirayku, qamqariki mana churasqaykitam apakunki, cosechakuykunkipas mana tarpusqaykitataqmi” nispa.

²² Chaymi reyñataq nirqa: “¡Mana imapaq valeq sirviente! Simillaykim condenarusunki. Qollqeyta mana kachariq kachkaptiyqa, mana churasqayta apakuq kachkaptiyqa hinaspa mana tarpusqayta cosechakuykuq kachkaptiyqa,

²³ qollqeytaqariki prestaqkunamanmi qoykuwaq karqa chaynapi mirayniyoqtaña chaskikunaypaq.”

²⁴ Chaynata niruspanmi chaypi kaqkunata kamachirqa: “Chay runamanta qollqeta qechuspa chunka waranqa mirachiq runaman qoykuychik” nispa.

²⁵ Hinaptinmi paykunañataq nirqaku: “Señor, payqa kachkan chunka waranqa qollqeyoqñam” nispa.

²⁶ Chaymi reyñataq nirqa: “Kapuqniyoqqa astawanraqmi chaskinqa, mana kapuqniyoqkunamantam ichaqa aslla kapuqninpas qechusqa kanqa.

²⁷ Rey kanaypaq mana munaq enemigoykunatapas pusamuspaykichikyá qayllaypi wañuchiychik.”

Jerusalen llaqtaman Jesus yaykusqanmanta

²⁸ Chay rikchanachiyta tukuruspanmi paykunapa ñawpaqninta Jerusalen llaqtaman rirqa.

²⁹ Olivos sutiyoq moqomanmi hichpaykurqa, chay lawpim kachkan Betfaqe llaqtachawan Betania llaqtacha. Chaymanta iskay discipulonkunata Jesus kachaspanmi nirqa:

³⁰ —Riychik wak chimpa llaqtachata, chayaruspaykichikmi tarinkichik manaraq pipapas sillakusqan watasqa malta asnota, paskaramuspayá aysaramuychik.

³¹ Pipas: “¿Imapaqtaq paskankichik asnoyta?” nispa tapusuptikichikqa qamkunam ninkichik: “Señormi necesitachkan” nispa.

³² Rispankum Jesuspa nisqanta hinalla tariykurqaku.

³³ Asnoyoqkunañataqmi paskasqankuta rikuruspanku nirqaku: —¿Imapaqtaq paskankichik asnoyta? —nispa.

³⁴ Chaymi paykunañataq nirqaku: —Señormi necesitachkan —nispa.

³⁵ Jesusman asnota aysaramuspankum pachankuwan caronarqaku chaymi Jesusñataq sillakuykurqa.

³⁶ Riptinmi ñanman runakuna pachankuta mastarqaku.

³⁷ Olivos Moqomanta uraykuchkaptinkum llapallan qatiqninkuna kusikuymanta qaparispa Diosta alabarqaku milagrokuna rikusqankumanta.

³⁸ Paykunam nirqaku: —¡Alabasqayá kachun Señorpa sutinpi hamuq Reyqa! ¡Hawkayay kachun hanaq pachapi! ¡Alto-altopi kaqkunayá Diosta alabachunku! —nispa.

³⁹ Wakin *f**fariseokunañataqmi, runakuna ukumanta lloqsiykuspanku Jesusta nirqaku: —Yachachikuq, upallachiy kay discipuloykikunata —nispa.

⁴⁰ Chaymi Jesusñataq nirqa: —Paykuna upallaruptinqa rumikunañach qaparinman —nispa.

⁴¹ Jerusalenman hichpaykuspanñataqmi llaqtata qawarispan waqarqa,

⁴² paymi nirqa: —¡Ima allinraq kanman kay punchawnikipi hawkayaynikipaq kaqta entiendeykuptikiqa! Kunanqariki qanmanta pakasqaraqmi kachkan.

⁴³ Hamuchkanmi punchawkuna, enemigoykikuna muyuriqnikipi cercota hatarichiptinkum mana maynintapas lluptiyta atinkichu.

⁴⁴ Pampamanmi wischurusunki chaypi yachaqkunatawan, perqaykipi rumikunapas manañam kanqachu, watukamusuqniki Diosta mana reqsikusqaykirayku.

Templopi rantikuqkunata Jesus qarqosqanmanta

⁴⁵ Temploman Jesus yaykuykuspanmi, chaypi *f**rantikuqkunata qarqoyta qallaykurqa, paykunatam

⁴⁶ nirqa: —Bibliam nin: “Temployqa Mañakuwananku Wasiwan sutiychasqam kanqa” nispa. Aswanqa qamkunaqa suwakunapa machayninta hinam rurarusqankichik.

⁴⁷ Sapa punchaw Templopi Jesus yachachiptinmi *f**sacerdotekunapa jefenwan Diospa leynin yachachiqkuna hinaspa llaqtapi kamachikuqkuna wañurachiypi rirqaku.

⁴⁸ Ichaqa manam imanaytapas atirqakuchu payta uyarinankupaq chaypi llapallan runakuna kasqankurayku.